Imajem : Konseleiru Supremu Partidu KHUNTO José dos Santos Naimori Bucar iha Manleuana, 28/06/2025. Foto : Cejar Tutuhafa
SAPNewsTL, Dili : Partidu Kmanek Haburas Unidade Nasional Timor Oan (KHUNTO) realiza Konferénsia Munisipal hodi estrutura munisipiu, Koordenador Partidu KHUNTO Munisípiu Díli Mário Kobra hamutuk ho estrutura sei tun ba baze iha nivel aldeia , suku to’o postu hodi prepara ba eleisaun prezidensial no eleisaun parlamentár.
Jornalista : Marciana da Conceicao & Conzita Mota – Midia SAPNews TL
“Iha mandatu, ha’u sei hamutuk ho estrutura sira tun ba baze hodi halo estalasaun iha nivel aldeia, suku too ba postu, nune’e ami bele prepara hein ba eleisaun prezidensial iha 2027 no eleisaun parlamentár 2028 nian”.
“Karik posibilidade governu kria tan eleisaun ba poder lokal, ami munisípiu Dili prontu atu kompete”. Dehan Koordenador Partidu KHUNTO Munisípiu Díli Mário Kobra, hafoin simu pose iha sede partidu KHUNTO, 28/06/2025.
Imajem : Koordenador Eleitu Partidu KHUNTO Munisipiu Dili Mario Cobra
Mario Cobra deklara, nia parte sei servisu maka’as hamutuk ho estrutura hodi hetan vitoria, nune’e nia prepara ona formasaun politika ba estrutura iha nivel postu, suku to’o iha aldeia.
“Ha’u sei servisu maka’as ho estrutura sira hodi hetan vitoria, prepara ona formasaun politika ba estrutura iha nivel postu, suku to’o ba aldeia sira, iha preparasaun barak ne’ebe ami prepara hodi tun ba baze”. Nia subliña.
Iha fatin hanesan, Konseleiru Supremu José dos Santos Naimori Bucar hateten, iha partidu KHUNTO oinsa ema haburas nia polítika, oinsa hakbesik ba povu, nune’e sira bele rona programa hodi hetan fiar hosi povu ba partidu.
“Iha KHUNTO, oinsa ema atu haburas tan partidu nia politika ne’ebe maka iha. Idak-idak nia munisípiu presiza servisu, oinsa ita hakbesik ba povu, atu bele rona ita nia programa, KHUNTO sei hetan fiar ruma husi povu”. Dehan Konseleiru Supremu José dos Santos Naimori Bucar.
Konseleiru Supremu Partidu KHUNTO ne’e husu ba membru ne’ebe simu pose nu’udar Koordenador partidu KHUNTO munisípiu Dili atu labele nonok maibe tenke fahe hanoin tuir planu partidu nian ba povu sira ne’ebe seidauk hatene.
“Ba sira ne’ebe ohin simu tomada pose laos atu nonok deit, tenke fahe mos hanoin ruma tuir planu partidu KHUNTO nian ba ema ne’ebe seidauk hatene hodi bele hatene, nune’e mos ba ho respeita ema seluk tanba partidu KHUNTO no partidu hotu-hotu hanesan instrumentu nasaun nian”. Nia akresenta.
“Iha bairu ba bairu laos partidu KHUNTO nia ema deit maibe partidu hotu-hotu, nune’e ita tenke mos hato’o ho programa sira ne’ebe iha, atu bele iha koñesimentu ida husi povu ba partidu rasik”.
Nia afirma, daudaun ne’e seidauk tama ba eleisaun, nune’e sira prepara oinsa hadia estrutura iha suku, aldeia, postu no munisípiu hodi prepara ba eleisaun prezidensial 2027 no eleisaun parlamentár 2028.
“Agora seidauk tama iha eleisoens, nune’e oinsa maka ita hadia estrutura iha suku, aldeia, postu no munisípiu, nune’e ita mos bele prepara ba tinan 2027 no 2028 nian”.
Konferénsia ne’e hetan partisipasaun maximu husi Konseleiru Supremu José dos Santos Naimori Bucar, Presidente KHUNTO Armanda Berta dos Santos, Sekretariu Jeral Partidu KHUNTO no militante Partidu KHUNTO iha Munisipiu Díli nian.