SAPNewsTL, Baukau : Relasiona ho udan boot ne’ebe akontese orseik iha Postu Administrativu Baguia, Munisipiu Baukau rezulta mota Lacamutu lori karreta ho Padre Mateus da Cruz no Augusto Asunção Delfim de Sá.
Tuir informasaun ne’ebe ne’ebe Jornalista SAPNewsTL asesu liu husi Pe. Mateus da Cruz ne’ebe lori hela karreta refere haktuir, sira ba atende konfesaun no selebra missa ba sarani sira iha Suku Samalari, Lawateri no Defawasse mak hafoin fila husi ne’eba maka mota ho korrente boot hodi lori karreta no sira na’in rua.
“Ha’u (Pe. Mateus da Cruz) hamutuk ho Pe. Augusto Assunção Delfim de Sa ba atende confessaun no missa iha Suku Samalari, Suku Lavateri no Suco Defawasse orseik (20/12/2023), hafoin fila husi missa maiz ou meniz tuku 6:00 mak mota lori karreta no ami rua, maibe ami rua konsege hakur sai tiha husi mota, ikus mai mota lori deit karreta”. Informa Pe. Mateus da Cruz ba Jornalista SAPNewsTL liu husi via telefone iha Baguia, 21/12/2023
Karreta ne’ebe mota lori, ohin eskavator ida husi Kompanha Finlos mak hasai ona karreta refere husi mota, maibe infelismente karreta refere labele uza tanba ninia mesing sira aat hotu.
“Ohin dader mak eskavator ida husi Kompanha Finlos mak hasai ona karreta husi mota maibe karreta refere labele ona atu uza tanba ninia kondisaun aat hotu liliu mesing sira karreta nian sai avaria hotu”. Pe. Mateus Informa
Padre Mateus informa, wainhira nia hala’o misaun iha Parokia Nossa Senhora Ranha dos Apostolus de Luro, Munisipiu Lautem mos sofre dezastre mota lori nia dala rua.
Liga ba dezastre ne’ebe akontese iha mota Lacamuto, Padre Paroku Baguia ne’e husu guvernu hodi halo ponte nune’e bele fasilita komunidade sira tanba beibeik ona mota ne’e lori ema barak ona
“Mota ne’e beibeik ona lori ema barak, tanba ne’e husu ba Guvernu atu halo ponte hodi fasilita komunidade sira halo movimentasaun ho transporte ba no mai inklui komunidade sira ne’ebe la’o ain”. Nia Husu
Enkuantu, Pe. Mateus da Cruz hanesan Amu Paroku Parokia São José Operáriu Baguia, Baguia iha Kompostu husi Suku sanulu (10) estasaun hamutuk sanulu resin-sia (19). Parokia refere eleva ona husi kuaze Parokia ba Parokia iha loron 01 Dezembru 2023 iha semana tolu liu ba kotuk.
Jornalista : Marcela Mery da Costa