Imajem : Jornalista hosi Mídia Nasionál 15 hala’o entrevista ba autoridade lokal sira iha Lauana,20/11/2024.
SAPNewsTL, Ermera – Autoridade Lokal Aldeia Leu-Basa Suku Lauana, munisipiu Ermera agradese mídia nasionál 15 tanba liu hosi programa Média tour bele to’o iha area rural hodi fo sai lian laek sira nia lian ba governante sira.
Objetivu hosi sorumutu ne’e hodi rona preokupasaun no dezafiu ne’ebé komunidade sira hasoru iha aldeia Leu-Basa hodi hato’o ba parte relevante sira, nune’e tau atensaun iha preokupasaun komunidade.
Xefe Aldeia Leu-Basa Alfredu Maia Pires agradese tebes ba média 15 ne’ebé marka ona prezensa iha sira nia Aldeia Leu-Basa tamba nia parte konsidera média mak sai sira nia liman, ain no tilun hodi hatutan preokupasaun ne’ebé sira enfrenta ba governu.
“Hanesan sefe suku ha’u agradese tebes ba media ne’ebé mai ona iha ami nia fatin, tamba imi mak sai hanesan ami nia liman, ain no matan hodi hato ami nia lian ba iha nai ulun sira”. Dehan Xefe Suku Alfredu Maia Pires iha aldeia Leubasa, Kuarta 20/11/2024.
Xefe aldeia ne’e informa governu aprova ona osan miliaun ba miliaun iha setor agrikutura maibe sira nunka hetan osan refere, nune’e liu hosi média sira hakarak hato’o ba iha parte relevante sira hodi tau atensaun ba komunidade sira.
“Governu aprova ona osan barak ba setor agrikultora maibe to’o agora ha’u nia aldeia nunka hetan, osan ne’ebé aprova ba agrikultor miliaun ba miliaun maibe osan ne’e ba para iha ne’ebé mos ita la hatene, mudansa klimatika ida ne’e governu atu prevene kuda ai-oan mos ha’u seidauk haree, nune’e hato’o ba imi hodi bele ba to’o iha governu hodi tau atensaun ba aldeia no suku ida ne’e”. Nia husu.
Iha fatin hanesan, delegasaun Xefe Aldeia Fransisco Maia Baptista hateten, governu aloka osan barak liu ba infrastrutura maibe to’o agora dalan seidauk diak no ske’e estrada ho inisiativa hosi komunidade.
“Ita haree governu dalabarak aloka osan barak liu iha infraestrutura maibe to’o agora dalam seidauk diak, maibe ami mós ke’e hela estrada ne’ebé apoiu inisiativa hosi komunidade sira”. Nia subliña
Autoridade lokal akresenta ninia komunidade sira labele asesu ba merkadu hodi fa’an sira nia produtu tanba estrada aat nafatin to’o agora.
“Haree ba area produtu ervila, koto no kafé barak maibe dalan seidauk diak hodi komunidade lori ba merkadu, tanba sira lori produtu ba merkadu tenke to’o iha atsabe, Letefoho no Hatubuliku”. Nia dehan
Iha fatin hanesan, Professor hosi eskola Ensinu Baziku Filial nú. 238 Tata-Mailau-Leu-Basa Daniel da Conceição husu ba parte relevante sira hodi rezolve sira nia preokupasaun ba edifisiu eskola nian ne’ebe atu fahe estudante sira ba iha dader no lokraik.
“Hanesan manorin iha difikuldade ne’ebé maka fatin seidauk sufisiente ba ami, hakarak aumenta edifisiu tanba total alunus iha nee atus-ida ualunulu resin-sia (189) foin daudauk hosi ministeriu edukasaun apoiu ona manorin na’in haat mai iha ne’e, nunee iha anu letivu oin mai ami bele fahe estudante sira balun eskola dader no balun lokraik”.
Entretantu, iha sorumutu refere hetan partisipasaun hosi komunidade Leu-Basa, autoridade lokal, profesor inklui jornalista hosi media nasional 15 (SAPNews, RTTL, Tatoli, STL, LABEH, Diligente, Timor Post, Lafaek News, Media Mudansa, RCC, Guardamor News, Neon Metin, Media Demokrasia, Média ONE Timor, no Independente), representante AJTL no OXFAM.
Jornalista : Marciana da Conceição