SAPNewsTL, Dili : Prezidente Liga Futebol Timor-Leste (LFTL) sei buka dalan kompleta orsamentu ne’ebe Sekretariu Estadu Juventude Desportu (SEJD) ho Federasaun Futebol Timor-Leste (FFTL) prepara ona atu apoiu ba Liga Timorense Epoka 2022 tanba orgaun liga hakarak liga futebol tinan ne’e tenki la’o
“FFTL ho SEJD tau ona osan ho montante 400,000 USD ne’ebe ami prontu atu kompleta liu husi patrosinador sira ne’ebe hakarak kontribui maibe ami la iha orsamentu rasik tanba ami depende ba SEJD no FFTL ne’ebe ami lá hetan subsidiu tan husi fatin seluk maski ami la iha osan atu tau maibe ami esforsu buka kompania sira ne’ebe hakarak fo kontribuisaun ba liga futebol epoka ne’e “, tenik Prezidente LFTL Nílton Gusmão ba jornalista sira iha hotel JL Villa Fatuhada, Dili segunda (05/09).
Prezidente informa tan, agora tama fulan setembru tinan ne’e hein hela fulan hira ba tinan foun maibe orgaun liga garantia hodi buka nafatin patrosinador para agraria fundu hodi kompleta orsamentu ba liga tinan ida ne’e
Nilton akresenta, LFTL nu’udar orgaun ezekutor laos osan nain ba realizasaun liga futebol epoka 2022, SEJD tau ona osan maibe la to’o tenki buka aumenta tan maski ida ne’e todan ba orgaun LFTL
“Ami nu’udar orgaun ezekutor, ami organiza deit laos ami mak osan nain ba realizasaun liga futebol ne’ebe husi orsamentu ba liga epoka 2022, SEJD disponibiliza ona 200, 000 USD, ami halo ona analiza karik halo kompetisaun metade orgaun liga tenki buka tan 195,000 USD maibe sei halo kompetisaun nakonu ami tenki buka tan 295,000 USD.”nia hatete
Entretantu, nia fundamenta uluk liga futebol hahú husi amadora apoiu orsamentu 600,000 USD neneik governu husik hakarak orgaun LFTL atu sai independente, maibe guvernu keta haluha atividade ne’e emprega ema lubuk ida hanesan jogador, treinador no ofisial sira iha klube sira ne’ebe bele fo kontribuisaun sira nia ekonomia iha família laran
Prezidente Liga ne’e sublinha, Timor-leste seidauk merkadu futebol hanesan nasaun dezenvolvidu sira iha Europa, governu husik orgaun LFTL bele moris independente foin mak tinan haat ka lima ne’e sedu demais ne’ebe hakarak halo milagre iha futebol Timor-Leste ne’e impossível sei la halo milagre iha kualker atividade ne’ebe iha Timor-Leste
Enkuantu, nia husu governu ne’ebe iha kondisaun ekonomia katak governu bele haree no tetu fali desizaun sira labele haree ba aspetu seluk haree desportu liu husi futebol bele lori vantajen ba sosiedade sira no hakmaan ekonomia familia lubuk ida nian.
Jornalista : Augusto dos Santos
Editor : Ekipa Editorial