Imajen Presidente Republika Jose Ramos Horta iha aviaun atu aranka ba Singapura
SAPNewsTL, Dili : Singapura no Timor Leste hakesi relasaun Diplomata hahu kedas iha fulan maio tinan 2002, Embaixada Timor Leste nian iha Singapura inaugura iha fulan Dezembro tinan 2010.
Durante vizita Xefe estadu ba Singapura, Xefe Estadu Horta sei hala’o enkontru ho nia omologo Presidente Da Republika Singapura,Halimah Yacob no Primeiru Ministro Singapura, Lee Hsien Loong.
Primeiru Ministru sei oferese almosu ofisial ida ba Presidente Da Republika no delegasaun, tuir mai banquete/Han kalan Estadu ida sei oferese husi Presidente Da Republika Singapura ba ninia omologo Presidente Timor Leste Jose Ramos Horta.
Presidente Republika sei hala’o mos palestra publika ida iha Institutu Yosuf Ishak, ne’ebe sei modera husi Ministru Relasoes Exteriores Singapura, Vivian Balakrishnan.
Iha biban hanesan Presidente Da Republika Timor Leste mos sei partisipa forum Empresarial, ne’ebe organiza husi Governu Timor Leste ho apoiu no partisipasaun husi sektor privadu sira husi nasaun rua nian.
Ikus liu Presidente Republika sei lao ain turiztiku ida, hodi haleu reservatoriu ba Reaproveitamentu bee.
Enkuantu, Singapura ho Timor Leste hametin parseria forte tebes ne’ebe hatur iha valor ho objetivu komum sira. Rai rua ne’e mos asina Ko-operasaun Bilateral kona ba akordu servisu Aereu no Singapura fo ona asistensia teknika ba Timor Leste, Liu husi formasaun ba funsionariu publiku sira, Liu atus 700.
Entertantu Presidente Republika hahu desloka ba Singapura hahu loron 6 Fulan Dezembro no fila fali mai iha loron 11 fulan Dezembru tinan 2022.
Jornalista : Vinsensius saldanha Morais De Araujo