Hari’i Futuru Brillante ! Tinan 2024, ISC Produz Graduadu Hamutuk 972

SAPNewsTL, Díli : Ensinu Superior Cristal (ISC) realiza judisium ba Fakuldade Siensia Edukasaun (FCE, sigla Portugés) no Fakuldade Siensia Saúde hamutuk (FCS, sigla Portugés) ba dala-XVI iha tinan 2024 ho total estudante atus sia hitunulu resin-rua (972).

Dekanu Fakuldade Siensia Edukasaun Jelio da Conceição Freitas hateten judiusium laos momentu importante deit ba estudante maibe ba mos edukadór, família no ema hotu ne’ebe suporta ona sira nia prosesu aprendizajen.

“Ita hotu agradese ba Nai Maromak kbiit-na’in ba nia laran luak no grasa atu ita bele halibur malu iha loron ne’ebé nakonu ho ksolok no kontenti. Ohin hanesan momentu espesiál ida, la’os de’it ba ita- boot judisiariu sira, maibé mós ba ami edukadór, família sira no parte hotu-hotu ne’ebé maka suporta ona ita-boot sira nia viajen to’o pontu ida-ne’e”. Dehan Dekanu Fakuldade Siensia Edukasaun Jelio da Conceição Freitas liu husi nia diskursu iha ISC Balide Díli, (27/12/2024).

Dekanu Jelio da Conceição Freitas salienta, estudante sira ofisialmente kompleta ona prosesu aprendizajen iha Fakuldade Edukasaun realiza ho estraordináriu ne’ebe laos reflete deit ba sira nia estuda makaas maibe iha reziliénsia, kompromisu no espíritu luta nian.

“Ohin loron ita-boot sira ofisialmente kompleta ona prosesu aprendizajen iha Fakuldade Edukasaun, realizasaun estraordináriu ida ne’ebé reflete la’ós de’it ba ita-boot sira nia servisu maka’as, maibé mós reziliénsia, kompromissu no espíritu luta nian ne’ebé ita-boot sira hatudu durante tinan 4 no 2 nia nia laran”. Nia informa.

Dekanu Fakuldade Edukasaun ne’e informa ba estudante sira katak, judisium la’os rohan husi viajen iha estudu maibe sai pasu inísiu nu’udár edukadór, ida ne’e sai hanesan profisaun ne’ebe nakonu ho responsabilidade, laos deit hanorin maibé hodi orienta, inspira no transforma jerasaun Timor iha futuru.

“Judisium ida-ne’e la’os viajen nia rohan ba imi nia estudu, maibé ida-ne’e maka pasu inísiu ida ba imi nia moris ne’ebe bolu nu’udar edukadór, ne’e hanesan profisaun ida ne’ebé nakonu ho responsabilidade lolos. Imi nia kna’ar la’ós de’it atu hanorin maibé mós orienta, inspira no forma jerasaun Timor tuir mai ho kapasidade briliante, matenek, iha karakter no iha morál neʼebé as”. Nia subliña.

Jelio da Conceição Freitas konsidera judisiariu maka iha liña oin hodi hasoru dezafiu iha mundu era teknologia edukasaun nian, sai sentru hodi kria mudansa, inovasaun no kreativu hodi hari’i futuru ida ne’ebe di’ak liu.

“Nu’udar edukadór ita-boot sira sei iha liña oin hodi hasoru dezafiu sira iha mundu era teknologia iha edukasaun nian. Ita-boot sira sei sai sentru ba kriasaun mudansa, inovasaun no kreativu hodi hari’i futuru ida ne’ebé di’ak liu. Kna’ar ida ne’e la fasil, maibé ha’u fiar katak imi hotu iha kbi’it, dedikasaun no fuan boot atu hala’o responsabilidade ida ne’e”.

“Edukasaun maka xave ba mudansa, hanesan Nelson Mandela hatete, “Edukasaun maka arma ne’ebé maka’as liu ne’ebé ita bele uza hodi muda mundu.” Ho koñesimentu hirak ne’ebé naton, ita-boot sira aprende ona iha fakuldade edukasaun ISC, imi iha ona arma atu forma mundu edukasaun ida ne’ebe kompetitivu no di’ak liutan, uza meius ida-ne’e ho responsabilidade no ho domin”. Nia hatutan.

Dekanu Jelio mós husu ba judisiariu sira bainhira hasoru dezafiu iha futuru tenke hanoin katak sira ultrapasa ona obstákulu, dezafiu no susar hotu hafoin to’o iha momentu ekstraordinariu hodi judisium.

“Bainhira hasoru dezafiu sira iha futuru, hanoin hikas momentu ida- ne’e. Hanoin katak ita-boot sira ultrapasa ona obstákulu, dezafiu no susar hotu-hotu antes atu to’o iha momentu ekstraordinariu ida ne’e. Fiar iha ita-nia an, fiar ita-nia abilidade, koñesimentu no forsa espiritu ne’ebé Maromak fó ba ita. Ba família sira ne’ebé prezente ohin loron, obrigadu ba orasaun, apoiu domin ne’ebé ita-boot sira fó ona ba judisiariu sira, sira nia susesu maka fuan husi ita-boot sira nia domin no sakrifisiu”.

Jelio da Conceição sente orgullu ba judisiariu no husu atu sira sai edukadór ne’ebe laos deit matenek maibe tenke iha fuan hodi sai ezemplu ba estudante, sai inspirasaun ba sosiedade no fonte orgullu iha nasaun republika demokratiku Timor-Leste.

“Ikus liu, ba judisiariu sira hotu husi Fakuldade Edukasaun ISC, ami orgullu ho imi, sai edukadór ne’ebé la’ós de’it matenek, maibé mós iha fuan hodi sai ezemplu ba ita-boot sira nia estudante hotu, sai inspirasaun ba sosiedade, no fonte orgullu ba nasaun doben Timor-Leste”.

Iha fatin hanesan, Diretor Programa Mestradu Edukasaun Dr. Agusto da Costa sente onradu iha loron espesifiku ujudisium ba graduadu Lisensiatura no Mestradu iha area Edukasaun, nu’udar rezultadu hosi estudante sira nia esforsu maka’as, persisténsia no kompromisu ne’ebe konsistente hodi aprende no dezenvolve-an.

“Ha’u sente honra ba loron espesifiku iha serimónia iudisium ba Graduadu Licensiatura no Mestradu iha area Edukasaun, ohin loron ha’u haksolok tebes atu selebra ita hotu nia susesu, nu’udar rezultadu husi imi hotu nia servisu maka’as, persisténsia no kompromisiu ida neʼebé konsistente hodi aprende no dezenvolve-an”. Nia dehan.

Nia hateten judisium laos faze final husi sira nia estudu maibe ne’e simboliza kapitulu foun iha viajen profisionál, hanesan graduadu iha area edukasaun ne’e sai responsabilidade ida hodi louva no transforma koñesimentu, abilidade no atitude ne’ebe hetan durante hala’o prosesu aprendizajen iha ISC.

“Loron ida ne’e la’ós de’it faze final husi imi nia estudu, maibé ida ne’e simboliza kapitulu foun iha ita nia viajen profisionál pessoal. Hanesan graduadu edukasaun, ita hotu nia responsablidade mak louva no transforma koñesimentu, abilidade no atitude valioza ne’ebé ita hetan durante prosesu aprendizajen iha Institutu Superior Cristal ne’e”.

Judisiariu sira iha kapasidade no matenek hodi hasoru dezafiu fundamentál edukasaun iha komunidade. Papel importante hodi transforma jerasaun foun nia hanoin no inspira sira, sai lider inovadór iha komprensaun avansadu hodi influensia politika.

“Ba judisiariu lisensiatura sira, agora imi iha kapasidade no matenek atu enfrenta dezafiu fundamentál ba edukasaun iha ita nia komunidade. Ita nia papel importante mak atu forma jenerasaun foun nia hanoin no inspira sira nia kuriosidade. Imi mak lider inovadór iha área edukasaun, iha komprensaun avansadu no kapasidade ne’ebé barak fó oportunidadu atu influensia politika, reforma sistema no lidera prátika inovativa neʼebé resolve dezafiu kompleksu edukasaun iha tempu ida ne’e”.

“Bainhira ita sai husi fatin ne’e hatene katak ita la’os lori de’it diploma, maibé esperansa ida atu hari’i futuru ida neʼebé di’ak no klaru liu hosi edukasaun. La’o hela ho audásia (korajem), ha’u hakarak atu imi hotu hetan susesu no satisfeitu iha kada asuntu ida. Parabéns, no ha’u hakarak atu ita nia viajen iha oin sei sai própositu no signifikadu”. Nia hatutan.

Judisiaria Gestaun Edukasaun Inacia Tamele fo agradese ba fundador ISC no dosente ne’ebe oferese ona nia tempu no matenek, liafuan agradese sei la naton maibe sei aplika matenek hotu ne’ebe sira simu iha servisu fatin.

“Ha’u agradese ba fundador no dosente Instituisaun Fundasaun Cristal tanba oferese sira nia tempu no matenek, ohin loron ami bele yudisium. Liafuan agradese sei la naton maibe ami sei hakerek dosente hotu-hotu nia diak no matenek iha ami nia fuan hodi aplika iha ami nia servisu fatin”.

Judisiaria ne’e mos hateten, la fasil atu sai estudante ne’ebe susesu tanba hasoru dezafiu oin-oin, maibe ho apoiu manorin no fundador bele realiza yudisium, halo misa agradesimentu hafoin to’o ba finalidade hodi simu graduasaun iha loron 30 fulan dezembru.

“Ohin loron ha’u sente kontente tebes, la fasil atu sai estudante ne’ebe susesu tanba tenke luta hodi hasoru dezafiu oin-oin, maibe ho apoiu moral hosi dosente sira liu-liu fundador, ohin ami bele realiza yudisium aban halo misa agradesimentu, ita labele halo buat hotu ho ita nia forsa rasik, tenke tau Maromak hanesan sentru hodi tulun ita iha situasaun saida deit, hafoin loron 30 dezembru mak sai finalidade no istoria ikus ba ami hodi estudu iha ensinu superior hodi simu graduasaun”.

“Siensia hirak ne’ebe ha’u hetan iha masteradu jestaun edukasaun ida ne’e sai baze legal ida hodi bele implementa iha ha’u nia servisu fatin nu’udar sekretariu regional edukasaun no sosial sei implementa iha rejional espesial administrativu Oe-Cusse nian”.

Entretantu, total graduadu Ensinu Superior Cristal (ISC) tinan 2024 hamutuk atus sia hitunulu resin-rua (972) hosi Fakuldade Siensia Edukasaun graduadu grau Licensiatura departamentu hamutuk sanulu (10) mak hanesan departamentu Pscicologia, Fisica, Matematica, Sosiologia, Biologia, Quimica, Informatica, Lingua Inglesa, Lingua Portuguesa no departamenrtu Ekonomia e Kontabilidade. Programa Mestradu em Edukasaun rua (2) departamentu Gestaun de Edukasaun no Teknologia de Edukasaun ho total graduadu hamutuk atus tolu neen (306). Fakuldade Siensia Saúde ho total graduadu atus neen neennulu resin-neen (666) husi departamentu rua (2) departamentu Enfarmagem no Parteira.

Jornalista : Marciana da Conceição