Hari’i Uma Dignu 90 ! Ema Ne’ebe Hela Sei Hetan Rendimentu $ 500 Kada Fulan

SAPNewsTL, Likisa — Vise Primeiru Ministru, Ministru Koordenadór Assuntu Sosiál no Ministru Dezenvolvimentu Rurál no Habitasaun Comunitaria (MDRHC) Mariano Assanami Sabino, hateten uma dignu ba povu sei hari’i 90 iha Munisipiu haat, maibe ema ne’ebe hela sei selu wainhira hetan rendimentu liu $ 500.00 kada fulan.

MDRHC Mariano Assanami Sabino deklara ligadu ho politika hari’i uma dignu ba komunidade sira tantu funsionariu sira, tenderizasaun ba uma dignu la’o tiha ona, uma dignu hamutuk 90 ne’e sei hari’i uluk iha Munisipiu Bobonaru, Lautem, Manatutu no Manufahi.

“Uma dignu hari’i uma 25 iha Tunubibi (Maliana-Bobonaru), uma 25 iha Fatuberliu (Manufahi), 25 iha Natarbora (Manatutu) no 15 iha Muapitine (Lautem), iha tinan 2024 ne’e la’o tarde uituan tanba prosesu naruk liu husi Ministeriu Obras Publikas (MOP), Ajensia Dezenvolvimentu Nasional (ADN), Land Property (Terras Propriedades) no koordenasaun ho uma na’in ne’ebe atu hela, maibe tinan 2025 bele aslera liutan tanba iha ona dezenhu aprovadu ba uma no fatin sira, hein katak kuantidade uma ne’e bele bo’ot hodi bele muda ba fundus infrastrutura”. Tenik MDRHC Mariano Assanami Sabino ba jornalista sira iha Likisa, 07/12/2024

Ligadu ho selu ba uma dignu ba komunidade sira ne’ebe hela, Ministru ne’e dehan uma na’in bele selu wainhira nia hetan rendimentu liu atus lima kada fulan liu hosi halo negosiu, hasa’e produsaun, buka moris maibe wainhira la’o to’o nia bele hela ho gratuita.

“Politika implementa uma-dignu ne’e sei tuir rendimentu hetan $500 sei selu ba estadu $50, se rendimentu $1.000 sei selu $100, ida uma-dignu ne’e tanba, ita atu hadia ninia ekonomia, nia buka moris iha ne’eba ne’e mak naran dignu, dignifika nia tanba laos estadu mak fo ba nia, estadu fasilita nia halo ninia uma, mai husi sira nia osan rasik, mai husi hasa’e nia kapasidade rasik”. Tenik nia.

Assanami hatutan, atu públika bele hatene katak politika uma-dignu ne’e iha buat barak iha ne’eba, hari’i mós fasilidade publiku iha bairu ne’e no mós halo buat hotu-hotu, ne’e laos Ministeriu Dezenvolvimentu Rural mak halo mesak sei konvida Ministeriu hotu-hotu, Politika ne’e sei implementa iha munisípiu hotu-hotu agora tenderiza ona dadaun ne’e hala’o ona no implementa iha tinan 2024.

Politika Uma Dignu ba povu, governu sei kontinua halo ba populasaun sira iha tinan 2025, iha ne’ebe ho tipu uma sosial, uma kreditu, no uma dignu hodi dignifika populasaun sira ho kondisaun ne’ebe sufisiente.

Governu liu husi Vice-Primeiru Ministru, Ministru Koordenadór Assuntu Sosiál no Ministru Dezenvolvimentu Rurál no Habitasaun Comunitaria hatur politika revilitalizasaun komunitaria apoiu grupu produtividade sira ho osan $50.000.00 kada aldeia, hari’i uma dignu hamutuk sianulu (90) ba populasaun sira no hari’i haris fatin publiku sira no seluk tan iha tinan 2024.

Jornalista : Conzita Mota