Imajem : Telkomcel apoia komunidade Musulmanu iha munisipiu Baukau
SAPNewsTL : Timor-Leste nu’udar estadu direitu demokrátiku ne’ebé ukun an, hari’i husi vontade popular no respeitu ba dignidade moris ida-idak nian, estadu ne’ebé povu 99,6% relijiaun katólika, sempre fo respeitu ba diversidade no universalidade, loke dalan ba investimentu oioin inklui Telekomunikasaun Telkomcel ne’ebé mai ho kultura família unidade, servi ho domin no impaktu sosial hodi fornese internet, falisita komunikasaun, ajuda komunidade no kontribui ba dezenvolvimentu.
Iha tinan 1989, Santu Padre João Paulo II vizita Timor-Leste ho lema ‘imi masin rai nian no naroman mundu nian’, liu tiha tinan tolunulu resin-lima, Papa Francisco halo vizita pastoral ho eslogaun ‘Atu Imi Nia Fiar Sai Imi Nia Kultura’ nu’udar tema sentral, liafuan save maka fiar no kultura, fiar hanesan buat abstratu ne’ebé labele haree ho matan no kaer ho liman, maibe fiar ne’e bele expresa hosi hanoin, orasaun, hahalok no toman ema nian. Kultura mak ábitu ne’ebé sosiedade hatudu hosi atetude no prátika iha família, igreza no nasaun.
Tuir biblia, Saun Tiagu haktuir, ‘fiar moris ho nia hahalok, fiar sai lolos ho hahalok moos, Abrão fiar ida ne’e nu’udar Maromak nia justisa’(Tiago 3:22-23). Fiar ne’ebe la ho hahalok, fiar ne’e mate, enkuantu hahalok ne’ebe la ho fiar, hahalok ne’e la folin. Fiar ne’e konkretiza liu hosi hatudu dalan, serví no domin, karidade no moris ho unidade iha diversidade, la haree kor, ras, relijiaun, etnia no grupu. Telkomcel hatur valor hirak ne’e sai kultura institusaun nian hodi servi ho domin, promove família unidade hodi fo impaktu pozitivu ba sosiedade.
Durante halo lansamentu ba konstrusaun Uma-Domin ne’ebe Telekomunikasaun Telkomcel hari’i ba Kongresaun Misionária Jesus Futar Fuan Domin (KMJFFD), Reprezentante Chief Ezecutive Officer (CEO) Iqbal Miala hateten Telkomcel hamrik ho kultura servi no domin, família unidade no impaktu sosial, nune’e liu hosi Programa Corporate Social Responsibility halo infraestrutura refere hodi dezenvolve edukasaun kualidade ba foinsa’e sira.
“Ami kontenti los tanba hahú lansamentu fatuk dahuluk hodi apoiu uma domin ba komunidade misionária, hafoin dezenvolve infraestrutura kontinua ho komitmentu ba futuru hadia fasilidade eskola, biblioteka no hasa’e kualidade edukasaun ne’ebé benefisia komunidade liu hosi programa Corporate Social Responsibility”. Tenik Reprezentante CEO Iqbal Miala ba SAPNewsTL iha Manleuana,15/02/2024
Madre Superior Misionária, Ermelinda Soares ho laran kontenti fó apresiasaun no agradese ba Telkomcel tanba apoiu uma domin ba komunidade misionária.
“Operador Telkomcel hari’i fatin formasaun ba labarik sira, antes ne’e komunidade misionária kolabora hodi fasilita formasaun vida ispiritual ba funsionáriu Telkomcel kada fim semana, iha loron sexta-feira liu husi reza hamutuk no reflesaun, Telkomsel hamosu inisiativa hodi fó apoiu ba komunidade Misionária nu’udar símbolu agradesimentu, ami la iha buat ida atu selu sira, só liafuan agradese no ami husu nafatin tulun ba misaun uma-domin ne’e”. Madre Ermelinda Soares informa ba SAPNews iha Bairo-Pite, 24/08/2024
Kontrusaun ne’ebé Telkomcel apoia nu’udar rezultadu husi fiar no ispíritu santu nia haruka ba lideransa Telkomcel hodi apoia labarik sira iha kongregasaun.
“Bainhira observa fatin, liu fulan haat, deside hari’i uma hodi uza ba formasaun, apoiu ne’e la’os husu maibé tanba Maromak nia ispíritu toka sira nia fuan, momentu ne’ebá CEO Telkomcel Benedictus Ardi dehan ispíritu santu mak haruka ajuda Timoroan liliu labarik sira, ami konsidera ne’e milagre ida, agradese tanba Maromak loke Telkomsel nia neon halo kontrusaun ne’e”. Madre Ermelinda subliña
Imajem : Pe. Inosencio Barreto
Padre Inosencio Barreto apresia Telkomsel ne’ebé fó apoiu ba Komunidade Misionária, sira hatudu duni komitmentu iha servi, sai ezemplu no fó impaktu pozitiva ba sosiedade.
“Apresia ba Telkomcel nia domin no komitmentu forte hodi tulun kbi’it la’ek sira iha situasaun ne’ebe presiza, grasa boot ne’ebé la espera maibé Maromak hatudu nia domin liu husi ema laran-luak sira hodi ajuda, signifika Maromak nia domin ba ema hotu husi dalan oi-oin, bainhira ita kolabora malu”. Pe. Inosencio Barreto dehan
Mensagem, ‘atu imi nia fiar, sai imi nia kultura’(que a vossa fé, seja a vossa cultura), katak ita nia fiar sai identidade, sai adultu iha fiar no hahalok, hanesan Dom Bosco dehan ‘sai sarani di’ak no sidadaun honestu’ la‘os de’it iha igreja wainhira tuir missa, maibe sai kultura ba missa, toman orasaun, respeita, haraik an, perdaun, serví malu iha familia, grupu, instituasaun, nasaun no mundu inteiru.
Imajem : Pe. Antonio Quenser iha Timor-Plaza,13/03/2024
Sikun seluk, Telkomcel hala’o retiru no reflesaun ba funsionáriu sira hodi refleta ba Maromak nia mistériu iha tempu kuaresma, Padre Antonio Quenser husu funsionáriu sira labele hadok an husi Maromak.
“Ita presiza prepara an molok tama ba festa paskua, tempu kuaresma fo atensaun mai ita ho Kristu nia terus, mate no moris hias, ita rona Maromak nia liafuan hodi hametin fiar, investe iha fiar no moral ne’e importante ba futuru.” Tenik Pe. Antonio Quenser iha Timor-Plaza,13/03/2024
Funsionária Joana Pereira Miranda orgullu tanba bele partisipa retiru no halo reflesaun ba sira nia moris, nune’e bele hametin liután sira nia fiar sai kultura ba funsionáriu sira iha empreza telkomcel.
“Ha’u haksolok bele partisipa retiru ne’e tanba enkoraja ami nu’udar sarani la’os hanoin deit buka osan maibe númeru dahuluk mak tenki buka uluk maromak, tanba Maromak dehan, buka uluk Maromak nia reinu maka buat hotu sei aumenta ba ita”. Dehan Joana
Santu Padre nia visita ho vizaun hametin fiar katóliku, promove unidade nasionál, inspira ema hotu halo nia fiar sai kultura damen, amizade, fraternidade, solidariedade, karidade, toleránsia, halakon violénia, diskriminasaun, explorasaun, exploitasaun, korupsaun, koluzaun, nepotismu no injustisa sosial iha mundu. Telkomcel banati tuir duni valor hirak ne’e liu hosi Responsabilidade Sosial Korporativa.
“Halo doasaun ba komunidade-musulmanu Meskita An’nur Dili no Baucau, tinan barak Telkomcel servi komunidade sai komprimisu hodi serve malu no servi ho domin, Telkomcel nia prezensa fó impaktu ba komunidade”. Informa Joana Pereira, An’nur,03/04/2024
Imajem : Staff Telkomcel hala’o limpeza iha tasi-ibun area Pantai-Kelapa to’o Motael.
Telkomcel mós kolabora ho Telemor no Timor Telkom limpeza lixu ne’ebé komunidade sira soe arbiru iha tasi-ibun, Telkomcel la’os deit halo negosiu maibe asume responsablidade hodi proteze ambiente ne’ebé moos no saudável.
Ligadu vizita Papa Francisco, Telkomcel apoia komisaun organizador, involve servisu voluntáriu, apoia simkard, fasilita internet estavel hodi fo susesu ba eventu istóriku ne’e, Tuir dadus ne’ebé SAPNews asesu Telekomcel regista ona kliente hamutuk 450.000 no fó servisu ba Timoroan hamutuk 240 inklui ema ho defisiensia.
Hein katak vizita apostólika Papa Francisco ne’e bele fanun no motiva ema hotu hodi moris iha fiar no hahalok ne’ebé loos sai kultura ba unidade familiar, servi ho domin, laran metin ba Maromak, tulun komunidade no moris ho toleránsia, fraternidade humana iha família, institusaun no nasaun.
Jornalista : Marcela Mery da Costa