Imajem : Negosiante Francisco da Costa Lopes Iha HNGV Dili, 15/12/2024
SAPNewsTL, Dili : Relasiona ho karreta ida ne’ebé soke Negosiante iha Hudi-Laran, Francisco da Costa Lopes hateten nia parte la haree, derepente karreta ne’ebé kondus husi Xineza mai soke ona nia.
“Ha’u tur iha loza oin, derepente karreta mai soke ha’u, hafoin soke nia halai lakon tiha, orseik ha’u bolu mama no papa tanba ema ida seidauk mai kaer ha’u nia liman, liu tiha minutu balun mak kolega mane sira mai kaer ha’u nia liman kous ha’u ba ambulánsia”. Tenik Negosiante Francisco da Costa Lopes ba SAPNews iha HNGV Bidau, 15/12/2024.
Francisco Lopes informa, durante karreta soke, komunidade balun mak komunika ambulánsia hodi tula nia ba Hospital Nacional Guido Valadares (HNGV), nune’e bele hetan tratamentu.
“Ha’u nia ain moras los ona, la kleur sira kontaktu ambulánsia hodi to’o kedas hodi tula ha’u mai ospital”.
Negosiante ne’e deklara nia sei la lori kazu ba oin, maibé husu ba autor soke ne’e hodi selu nia no tau matan ba ninia nesesidade kada fulan.
“Ha’u sei la lori kazu ba oin, maibé ha’u nia familia sei ko’alia ho nia hodi selu ha’u no haree nia nesesidade kada fulan, tanba ha’u nia ain tohar fatin tolu, karik diak fali mós ha’u labele haleu tan Dili hodi fa’an”.Francisco hateten
Francisco husu mós ba Ministériu Solidariedade Sosial no Inkluzaun (MSSI) hodi tau matan mós ba nia.
“Ha’u husu Governu liliu MSSI tau matan ba ha’u”.
Francisco mós husu ba nia maluk negosiante sira hodi bele matan moris neon na’in wainhira buka moris iha dalan ninin.
“Ha’u husu ba kolega sira, matan moris wainhira la’o ba no mai fa’an iha Dili laran”. Nia husu
Francisco da Costa hetan tohar iha ain-karuk, ain parte karuk tohar iha fatin tolu no kanek iha ain parte los. Oras ne’e sei halo baixa iha Hospital Nasional Guido Valadares (HNGV) Dili.
Francisco da Costa Lopes hahu halo negosiu iha tinan 2009 to’o 2016, Hafoin kontinua fali iha tinan 2019 to’o ohin loron. Negosiante refere hela iha Suku Fatuhada, husi Postu Administrativu Baukau Villa, munisipiu Baukau.
Jornalista : Marciana da Conceição