Imajem : Entrevista Sekretariu Jeral KONISTIL Boaventura Soares da Silva, iha masjid An-Nur kampung-alor, 17/06/2024. Foto : Dircia Baptista Belo
SAPNewsTL, Díli – Primeiru Ministru Interinu Mariano Assanami Sabino, partisipa selebrasaun loron Idul-Adha 1445 Hizria husi komunidade musulmanu, Iha vizita ne’e Assanami hato’o Minal aidin wal faizin, mohon maaf lahir dan batin ba komunidade sira.
Iha selebrasaun ne’e, komunidade musulmanu sira oferese animal hamutuk-30 kompostu husi karau 17 no Bibi 13 hodi oferese ba komunidade sira ne’ebe presiza.
“Sira halo sakrifisiu hodi oferese animal ne’ebé sira oho, bibi hamutuk sanulu resin-tolu (13) no karau hamutuk sanulu resin-hitu (17), nan hirak ne’e sei oferese ba oan-kiak, ferik, katuas no ba ema sira ne’ebé iha loron bot laiha kbiit hodi sosa naan, laos de’it iha mesjid An Nur Díli, maibé iha fatin hotu-hotu sira nafatin halo oferese, ne’ebé bolu dehan tinan sakrifisiu, tinan ida ne’ebé solidariu fó apoiu hodi fahe kontente ba sira ne’ebé sende triste”. Dehan Primeiru Ministru Interinu Mariano Assanami Sabino ba jornalista sira iha masjid An-Nur kampung-alor, 17/06/2024.
Primeiru Ministru Interinu husu ba relijiaun hot-hotu hodi foku ba formasaun karater foinsa’e sira nian ne’ebe moris iha esperansa, saudavel, forte no kualidade ba futuru.
“Ita presiza hametin rekonsiliasaun, toleránsia no fraternidade humana, relijiaun sira hotu presiza foka ba formasaun karater joven sira nian, oinsa joven sira sai foinsa’e ne’ebe moris ho esperansa, saudavel no forte hodi la’o ba oin”. Assanami hateten
Imajem : Primeiru Ministru Interinu Mariano Assanami Sabino iha Majid An-nur Kampu Alor.
Liga ba vizita Sua Santidade Papa Francisco nian, Governante ne’e dehan Amu Papa mai nu’udar bainaka ida ba povu Timor-Leste, entaun la’os deit ba sarani katólika maibe ba Timor oan hotu.
Relasiona ho infraestrutura balun ne’ebe ladun diak, Vise Primeiru Ministru, Koordenador Asuntu Sosiais ne’e afirma nia parte sei haree, oinsa bele apoia buat ne’ebe presiza tuir nesesidade.
Iha fatin hanesan, Sekretáriu Geral Konsellu Nasionál Islámiku Timor-Leste (KONISTIL) Bonaventura Soares da Silva, Sente orgullu ho presenza Primeiru Ministru Interinu Mariano Assanami Sabino ne’ebé reprezenta governu halo vizita hodi selebra loron boot Idhul-Adha.
“Sente orgullu ho presenza Primeiru Ministru Interinu Mariano Assanami Sabino ne’ebé reprezenta governu, mai vizita ami hodi selebra loron boot Idhul-Adha”. Dehan Sekretáriu Geral Konistil Bonaventura Soares da Silva.
Bonaventura Soares da Silva akresenta, iha situasaun atuál iha asuntu barak ne’ebé relevante ba sira nia instituisaun, nune’e presiza tu’ur hamutuk hodi ko’alia malu.
“Hato’o mos mensajen, liu-liu ba ita nia situasaun atual iha asuntu barak ne’ebé relevante ba ami nia instituisaun, iha buat barak ne’ebé mak ita tenke tu’ur hamutuk hodi ko’alia, ami prontu koopera hodi asegura rai ida ne’e hamutuk ho estadu”. Nia hato’o.
“Ita hare iha fatin hotu-hotu dalaruma relijiaun sai fali hanesan fonte konflitu, ita hakarak Timor-Leste mai ho nia karakteristika própriu, dialogu ne’e importante ho nune’e tenke halo dialogu, tanba liu husi dialogu ita bele rezolve problema hun no nia abut, importante liu ita tenke komunika ba malu, tanba ita laos povu baibain ita iha karakteristika, personalidade no kultura rasik”.
Enkuantu Bonaventura hatutan, Timor-Leste tenke hatudu ba mundu maske iha separasaun Relijiaun maibé la hatuduu katak laiha kontribuisaun ba malu.
“Ita tenke hatudu ba mundu katak, ita nia estadu iha separasaun Relijiaun maibé laos hatudu katak ita la kontribui hamutuk, ita tenke kontribui hamutuk tanba nasaun ne’e ita nian, ami mós hola inisiativa rasik hatudu uniku iha Timor hodi hatudu ba mundu katak Timor-Leste mai ho nia karakteristika própriu no personalidade rasik tanba ita mai ho luta ne’ebe naruk”. Nia hakotu.
Jornalista : Marciana da Conceição & Dircia Baptista Belo