Imajem : Dom Leandro Maria Alves asina plaka konventu Kongregasaun Santa Ana iha Luro, 12/11/2024
SAPNewsTL, Lautém : Hafoin inaugura Konventu Kongregasaun Santa Ana Iha Parokia Luro, Bispu Dom Leandro Maria Alves konsidera presenza madre sira nian iha nu’udar grasa ida ba sarani sira.
“Madre sira mai iha ne’e hanesan grasa ida, tanba ne’e husu ba sarani sira hodi aproveita grasa moris ne’e hodi didiak tanba madre sira la’os deit hala’o servisu pastoral maibe hala’o mos prestasaun servisu iha edukasaun no saude”. Tenik Bispu Dioseze Baukau Dom Leandro Maria Alves iha Parokia Luro, 12/11/2024.
Dom Leandro husu ba sarani sira hosi hakbesik an nafatin ba eukaristia tanba eukaristia mak sentru ba moris ema nian, buka hatudu hahalok ne’ebe diak liu hosi respeita malu no hadomi malu.
“Eukaristia mak ita ema nia sentru moris, tanba ne’e ita tenki hakbesik an nafatin ba eukaristia hodi komunga, sarani diak tenki hatudu hahalok ne’ebe diak, respeita malu no hadomi malu”. Tenik Bispu Dioseze Baukau Dom Leandro
Dom Leandro Maria mos husu ba ema hotu atu prevene an no hadok an hosi hahalok violensia liliu tuda malu no estraga malu.
” Imi tenki evita halo krime no violensia, baku malu, tuda malu, estraga malu, hanoin aat ba malu, foti ema nia sasan”. Nia husu
Konventu Kongregasaun Santa Ana ne’ebe inauguradu refere, madre sira sei uza formasaun edukasional, pastoral no seluk tan.
Iha misa agradesimentu ne’e hetan partisipasaun maksimu hosi sarani sira, autoridade lokal sira, madre kongregasaun Santa Ana no konvidadu sira.
Jornalista : Denilia Soares