Imajem Partisipantes iha dialogu Nasional ne’ebe organiza husi INDDICA no UNICEF, iha salaun CCD Merkadu-Lama, kinta-feira (16/02/2023)
SAPNewsTl, Dili: Instituto para a Defesa dos Direitus das Criansas, Instituto Publica (INDDICA I.P) ho UNICEF halo dialogu nasional, objetivu husi dialogu ne’e hodi labarik sira bele trasmite sira nia hakarak no labarik sira bele goza sira nia direitu nu’udar umanu.
“Eventu ida ne’e nia objektivu principal ba ita hotu ne’ebe mak kaer kargu ukun ka kargu pozisaun ruma atu rona direita kikoan sira nia halerik no preokupasaun maski esforsu lubuk ida ita halo ona maibe sira kontinua hetan situasaun sensitivu iha sira nia moris loron-loron, atu goja sira nia direitu fundamentu ne’ebe mak hakerek ona iha konvensaun direitu labarik ne’ebe mak estadu ratifika ona iha tinan 2003” dehan Prezidente INDDICA Dinora Granadeiro iha nia diskursu ba jornalista iha salaun CCD Merkadu-Lama, kinta-feira (16/02/2023)
Prezidente hatutan, esforsu lubuk ida ne’ebe halo ona husi governu uluk mai to’o governu atual maibe seidauk rezolve mal nutrisaun ne’ebe aas iha Timor-Leste no mos Azia tomak, ida ne’e hatudu katak esforsu hotu ne’ebe governu halo no apoiu husi parseiru sira seidauk hamenus problema sira ne’e maibe hatene katak labarik mak futuru nasaun nian, investimentu ne’e tenki hatuur kedas husi sira idade 0-10 atu nune bele kontribui ba dezenvolvimentu nasaun ida ne’e nian
Iha Sorin Seluk, Reprezentante UNICEF Bilal Durrani hatete, nia esperansa katak buat ruma sei muda ba labarik sira iha Timor-Leste tan ne’e tenki rona sira hodi fo solusaun ba sira nia direitu
“Ha’u iha esperansa katak buat ruma sei muda ba Labarik sira iha Timor-Leste tanba ami sei servisu ba labarik sira nia direitu sira, Timor – Leste, ita – nia servsisu urjensia bo’ot liu ita halo agora , hamutuk hodi labarik no foinsa’e sira – nia naran, ita sei define kursu jerasaun sira tuir mai ne’e, notisia diak ida mak iha nia solusaun – simplesmente presiza kompromisiu no asaun lolos ho urjente, no mos rona ba labarik sira no servisu ho sira hodi dezenvlove politika no fo solusaun ba sira”, tenik Bilal
Imajem entre PR Jose Ramos Horta, Representante UNICEF, INDDICA hamutuk ho labarik sira
Bilal akresenta, sira hakarak aproveita oportunidade atu bolu ba lider aktual sira hotu no sira hotu mak aspira hodi partisipa iha eleisaun mai ne’e atu tau asuntu direitu labarik nudar asuntu sentral ba iha sira – nia manifestu sira no konkretiza promesa sira bainhira eleitu no sira promote katak UNICEF ho nia parseiru sira , hanesan Governu Japaun, sei kontinua suporta Governu Timor – Leste nia servisu hodi alkansa progresu ba labarik sira iha Timor – Leste tanba sira sei la deskansa to’o labarik sira hotu iha Timor – Leste , goza ona sira – nia direitu hotu
Entrentantu, dialogu ne’e hetan partisipa maximu husi Prezidente Republica Jose Ramos Horta, Vise Ministra MSSI, Sekretariu Estadu Igualdade Nnkluzaun, reprezentante sekretariu estadu juventude no desportu, komandante PNTL munisipiu dili, embaixador japaun, reprezentante UNICEF no lina ministeriais sira hotu.
Enkuantu, tuir dadus ne’ebe SAPNewsTL asesu husi Peskija UNICEF hatudu katak labarik ho idade tinan 10 mai kraik hasoru sub-nutrisaun iha Timor Leste hamutuk 48%, Portantu, Numeru Kiak iha Timor Leste atinje ona 42%, Dezempregu sa’e ba 30%, rendimentu minimu no ekonomia timor leste kontinu dependente ba importasaun tanba produsaun rai-laran minimu, kada tinan Orsamentu Jeral Estadu 80% sai ba rai liur, OJE 20% deit mak sirkula iha rai laran.
Jornalista : Marcela Lemos & Antonio Tilman