Imajem : Tenente Jeneral F-FDTL Falur Rate Laek presta Omenajem ikus ba Saudozu Ernesto Fernandes Dudu iha Kuartel Jeral F-FDTL Fatuhada, 07/05/2025
SAPNewsTL, Dili : Saudozu Ernesto Fernandes Dudu nia mate isin hala’o vizita ikus ba Kuartel Jeral F-FDTL Fatuhada Dili hodi halo presta omenajem ikus.
Durante Vizita, Tenente Jeneral Falur Rate Laek hateten Saudozu Ernesto Dudu hanesan ema ne’ebe aten brani, responsivu no dedikasaun boot ba determinasaun ukun rasik an, espíritu hirak ne’e sei grava nafatin iha memória.
“Saudozu Ernesto Dudu nia aten brani, dedikasaun no espíritu servi nian sei grava nafatin iha ita nia memória, nia istoria kontinua inspira ita sai sidadaun ne’ebe responsável, konsiente, dedikadu, patriótika no nasionalista hodi defende independênsia nasional”. Teni Tenente Jeneral Falur Rate Laek iha Kuartel Jeral F-FDTL Fatuhada, 07/05/2025
Falur Rate Laek mós solidariza família saudozu Ernesto Dudu, nia parte afirma instituisaun F-FDTL prontu atu ajuda bainhira família sira precisa.
“Hahalok diak hirak ne’e merese ita nia sentidu gratidão, ita nia sentidu solidariedade ba família sira iha tempu susar ida ne’e, obrigadu barak ba ita nia dedikasaun no deskansa ho hakmatek”.
Saudozu Ernesto Fernandes Dudu
Komandante Rejiaun IV no Eis Deputadu Ernesto Fernandes “Dudu” fila hikas ona ba Aman Maromak nia kadunan santu, wainhira hala’o tratamentu iha Hospital Nacional Guido Valadares (HNGV) tanba sofre moras.
Antes ne’e, Saudozu Ernesto Dudu hetan atakasaun derepente iha loron 10 fulan Abril, nune’e família lori ba halo tratamentu iha Hospital Nasional Guido Valadares hodi halo tratamentu ba ninia saúde maibe infelismente Saudozu hakotu iis tanba sofre moras grave.
Durante Saudozu Dudu baixa iha ospital, hetan vizita hosi Primeiru Ministru Kay Rala Xanana Gusmão, Jeneral Reformadu Lere Anan Timur, Vise Primeiru Ministru Mariano Assanami Sabino no Membru Governu dasia sira iha fulan Abril liu ba.
Jornalista : Ermelinda Soares & Dircia Belo