Imajem : MJDAK Nelyo Isaac Sarmento & CEO Benedictus Pryio iha salaun Metin Room Hotel Palm Spring, Quinta (24/04/2025).
SAPNewsTL, Dili : Ministériu Juventude Desportu Arte no Kultura (MJDAK) ofisialmente asina nota entendimentu serbisu hamutuk ho operador Telekomunikasaun Internasional Indonésia Telkomsel hodi prepara ba eventu Jogus Deportivus Comunidade dos Países da Língua Portuguesa (CPLP) ne’ebe sei hala’o iha Timor-Leste.
Ministru Juventude Desportu Arte no Kultura (MJDAK) Nelyo Isaac hateten, governu liu-husi nia aparelu Ministériu Desportu iha faze preparasaun ba atividade jogu CPLP maibé seidauk atinji 100 %, nune’e ohin loron operator Telkomsel hamutuk ho MJDAC asina nota entendimentu ida hodi apoiu governu intensifika atividade preparasaun.
“Ita hotu hatene katak tinan ida ne’e hanesan tinan ba ita nia nasaun Timor-Leste atu hatudu ba mundu katak ita mos prontu ona hodi prepara eventu internasional sira, la’os iha desportu deit maibe konferénsia no semináriu internasional sira, tanba ne’e Telkomsel hanesan patriosinu Governu nian asina memorandu entendimentu ida hodi reforsa servisu ba jogu CPLP”. Dehan MJDAC Nelyo Isaac Sarmento, ba jornalista sira iha salaun Metin Room Hotel Palm Spring, Quinta (24/04/2025).
Ministru Nelyo hatutan, preparasaun Timor-Leste nian ba atividade jogu CPLP hanesan faze ida hodi apoiu prosesu diplomasia entre estadu Timor-Leste ho países CPLP sira, nune’e bele hametin komitmentu husi nasaun Portugués sira reforsa politika Timor-Leste nia adezaun ba ASEAN.
“Hirak ne’e hotu hanesan parte ida ba ita nia preparasaun hodi sai membru ba ASEAN nian, aktividade desportu ida ne’e sai hanesan aktividade bo’ot ba da-rua, hafoin visita ita nia Sua Santidade Papa Fransisco ne’ebe mak ita hotu hatene katak loron tolu (3), liu ba nia fila hikas ba Aman Maromak nia kabunan santu, entaun esforsu hirak ne’e parte ida husi kompromisu nasaun portugués sira hodi apoiu Timor-Leste ba ASEAN” Dehan nia.
Governante ne’e aprofunda bainhira governu simu hodi sai uma nain ba eventu desportu CPLP nian, buat hotu governu prepara maibé sente katak bainhira governu mesak labele, tenke servisu hamutuk ho instituisaun ka organizasaun sira seluk, nune’e MJDAC hili Telkomcel sai hanesan parseiru no sponsor ba eventu jogu CPLP ne’ebe sei hala’o iha fulan Jullu.
“Buat hotu ita halo ona maibé ita senti katak ita tenke servisu hamutuk ho organizasaun ruma, nune’e sira bele apoiu Governu nia servisu, entaun ami hili operador Telkomcel sai hanesan ami nia parseiru hodi asina nota entendimentu oinsa bele estabelese servisu sira ho diak” Tenik Nelyo Isaac.
Nelyo hatutan nia parte representa povu no Governu Timor-Leste hato’o agradesimentu ba operdor Telkomcel nian hodi hatan ba pedidu ne’ebe governu husu atu estabelese ekipa hodi apoiu ba atividade desportivu jogu CPLP.
“Agradese ba Telkomcel, ohin ita asina nota entendimentu servisu hamutuk entre MJDAK ho Telkomcel. Nune’e ba oin, ita bele hahu servisu hodi halo preparasaun ba desportu CPLP nian ne’ebe mak sei realiza iha fulan Jullu tinan ida ne’e, representa governu ha’u hakrak agradese ba parte hotu, liu-liu ba operdor Telkomcel”.
Imajem : Chief Executive Officer (CEO) Telkomcel Benedictus Ardiyanto Priyo
Iha fatin hanesan, Chief Executive Officer (CEO) Telkomcel Benedictus Ardiyanto Priyo haktuir, operador Telkomsel iha komitmentu hodi apoiu governu Timor-Leste estabelese servisu dignu ba públiku liu-husi servisu hamutuk no hametin liu tan kompromisu hodi hatutan inovasaun teknolojia ba futuru ho diak iha eventu jogu despostu CPLP.
“Kolaborasaun ida ne’e sai hanesan komitmentu Telkomcel hodi promove inovasaun no hari’i futuru foin-sa’e Timor-Leste nian, ne’ebe mak ligasaun barak iha area dijitál nian, la haluha mós kultura no identidade nasionál, entaun ita espera katak ita hotu hamutuk halo preparasaun ba atividade jogu CPLP nian iha Timor-Leste”.
Benedictus Ardianto Priyo salienta termu asina nota entendimentu bele hametin liu tan koperasaun entre instituisaun Telkomsel ho governu Timor-Leste tanba asina memorandu ida ne’e hanesan renovasaun ba kompromisu sira ne’ebe hala’o ona.
“Ho kolaborasaun ida-ne’e, ami hein katak ita bele hamosu solusaun ne’ebe fo impaktu diak, hanesan ho misaun Telkomcel nian katak Impaktu Sosial Timor-Leste liu husi teknolojia no kreatividade.”
Enkuantu, antes ne’e Governu aprova ona orsamentu hamutuk $511.250 hodi halo preparasaun ba eventu desportu ne’ebe sei realiza iha loron 17-26 fulan Jullu 2025 iha Timor-Leste, Governu mós preve orsamentu kuaze 3.730.500, hodi finansia atividade jogu refere.
Entretantu, atividade jogu CPLP refere kompostu husi modalidade futebol, basketbol no Voleibol, dadaun ne’e governu prepara ona fatin hanesan Jinaziu Dili, Estadiun Munisipal Dili, Kampu ba Voleibol no basketbol jogu futebol sei hala’o iha Estadiu Gleno munisipiu Ermera.
Jornalista: Guilhermino Ramos & Marcela Mery