Imajem Prezidente Repúblika, José Ramos-Horta Lansa Ofisial no Entrega Ai-kakau Iha Postu Administravu Same, Munisipiu Manufahi, 17/03/2023. Foto : Media PR
SAPNewsTL, Manufahi : Prezidente Repúblika, José Ramos-Horta, Sesta-Feira sexta-feira semana kotuk, lidera lansamentu nasionál ba ai-Kakau ho tema “Programa Kakau Di’ak, Importante ba Futuru Timor-Leste Nian”, Ai-Kakau ne’e hamutuk atus lima ne’ebe daudaun ne’e kuda ona iha Munisípiu Manufahi. Xefe Estadu Jose ramos Horta argumenta importante tebes aumenta produsaun Ai-kakau iha Timor-Leste, tanba halo ona teste iha li’ur, ho rezultadu pozitivu.
“Kakau uluk kedas tempu Indonézia hatama iha Timor-Leste, ideia di’ak ida ke Indonézia halo, ita buka aumenta, tanba kakau Timor nian halo teste iha li’ur sira hateten, kualidade di’ak loos,” hateten Xefe Estadu, iha serimónia Lansamentu Nasionál Aí Kakau iha Aldeia Raiubu Suku Letefoho Postu Administrativu Same Villa, Sesta (17/03/2023)
Nia fundamenta Programa kuda Kakau integra iha polítika nasionál, hodi aumenta no salva kafé ne’ebé ho idade 100 liu, tanba hola parte iha istória, tradisaun, kultura no ekonomia Timor-Leste nian.
“Hanesan ita-nia polítika nasionál mak ida-ne’e, ita tenki aumenta, salva ita-nia kultura kafé, ke tinan 100 ida ona, hola parte istória, tradisaun, kultura, ekonomia, tanba ne’e mak ha’u halo kampaña, hahú iha Prezidénsia ajuda governu ajuda ita-nia instituisaun sira par ita salva kafé,” Tenik PR Horta.
Imajem : Presidente Republika Jose Ramos Horta
Alende ne’e, Xefe Estadu mós husu atu asegura produsaun Sorgun iha Timor-Leste, tanba iha kualidade di’ak liu fo’os no laiha efeitu ba ema nia saúde.
Iha Fatin hanesan, Administradór Munisípiu Manufahi, Arrantes Isaac Sarmento, fo agradese bá Xefe Estadu ho ekipa, tanba bele hili Munisípiu Manufahi ba lansamentu nasionál programa kuda aí kakau.
“Agradese boot tebes ba ida-ne’e, tanba ida-ne’e parte ida importante teb-tebes ba ita-nia futuru no parte ida mós bele kria ekonomia sosial ida-ne’ebé di’ak, bá ita-nia komunidade,” hateten Administradór Munisípiu Manufahi.
Munisípiu Manufahi iha poténsialidade bá agrikultura, tan ne’e Administrador Munisípiu husu agrikultor sira atu kuída no prezerva aí kakau oan ho didi’ak, tanba kakau importante tebes atu kontribui bá hadia ekonomia no sosial komunidade ho nasaun nian.
Sorin seluk, Liberato da Costa, hanesan to’os na’in sente orgullu , hodi oferese nia rai hamutuk ektár 1,3 ba estadu hodi realiza programa lansamentu nasionál kuda aí kakau oan.
“Lansamentu ba atividade kuda kakau ne’e ba ha’u hanesan to’os na’in ha’u sente orgullu kontente, husu para programa ida-ne’e labele para de’it iha Munisípiu Manufahi, sé karik bele habelar territóriu nasionál,” dehan Liberato.
Liberato Salienta, provizoriamente aseita atu kuda aí kakau oan hamutuk 603 iha nia rai, maibé, sei iha planu atu kuda tan aí kakau hamutuk 403 ne’ebé oferta husi Kooperativa Kafé Timor-CCT.
“Ho lansamentu nasionál kuda aí kakau oan ne’e, to’os na’in, Liberato da Costa, husu estadu no governu atu implementa mós atividade kuda kakau iha Munisípiu seluk no halo akompañamentu, fó apoiu finanseiru, ekipamentu inklui asisténsia téknika, nune’e bele iha rezultadu di’ak no fó benefísiu bá povu” Nia dehan
Iha oportunidade ne’e, Xefe Estadu ho komitiva mós, hala’o vizita feira livru ne’ebé organiza husi Gabinete Prezidénsia Repúblika, liu husi Gabinete Asessoria Edukasaun servisu hamutuk ho parseiru hanesan, Planu Internasionál, UNICEF, Fundasaun Alola no seluk tan.
Entretantu, partisipa iha serimónia ne’e, mak hanesan Xefe Estadu Maior Jenerál Forsas Armadas, Tenente Jenerál Falur Rate Laek, Vise Ministru Agrikultura no Peskas, Kórpus Diplomátikus, Komandante PNTL Munisípiu Manufahi, Superintendente Joni Viana das Regras, autoridade lokál, veteranus komunidade no entidades seluk tan.