Imajem : Entrevista Kordenador Juventude Belbatu Anan, Flávio dos Santos iha Monumentu Koronel Santu António Manatutu,07/12/2024. Foto : Daniel da Silva
SAPNewsTL, Manatuto : Relasiona ho loron natál no tinan foun 2025 ne’ebé mai daudaun, Juventude Belbatu Anan hari’i prezépiu, ai-natál no halo manutensaun ba lampu iha monumentu Santu Antóniu Manatatu
Kordenador Juventude Belbatu Anan, Flávio dos Santos hateten joven sira inisia hanoin ida atu halo ai-natál, prezépiu no halo manutensaun ba lampu sira ne’ebé aat liu hosi tau osan hamutuk no halo servisu.
“Antes ne’e Santu António quaze tinan rua ahi-oan mate entaun ami juventude bolu malu fo idea no hanoin hamutuk kona bá ai-natál, halo prezépiu no hadia lampu hirak ne’ebé aat ona, tanba monumentu ne’e la hadia hafoin estudante Fakuldade Ekonomia no Gestaun UNTL mai ajuda ami hadia iha 2022”. Informa Kordenador Juventude Belbatu Anan, Flávio dos Santos iha Monumentu Santu Antóniu Manatuto,07/12/2024
Flávio hatutan grupu refere sei servisu makaas liután hodi halo manutensaun ba lampu, CCTV, hadia ambiente no hadia mós moru ne’ebé ho kondisaun tuan ona.
“Agora ami hahú halo manutensaun depois ami sei troka fila fali lampu no fiu sira ne’ebe aat ona, hadia CCTV ne’ebé aat ona, ami sei halo manutensaun hotu no hamos ambiente ne’ebe foer”. Nia afirma
Koordenador ne’e husu atu ema hotu ne’ebé halo vizita bele kuidadu no la soe foer arbiru, nune’e bele garante ambiente ne’ebé moos no saudável ba vizitante sira.
“Ami husu katak ita tenki iha konsiensia rasik, ambiente importante bá ida-idak nia an maibe presiza konsiénsia rasik oinsa para bele hadia ita nia rain liu husi buat kiik oan sira ne’e hanesan limpeza no soe foer iha nia fatin hodi asegura ambiente moos no seguru, ne’e impornta no kontribuisaun ida”.Nia husu
Imajem : Kakuluk Estátua Santu António
Nia argumenta, sítiu relijiozu ida ne’e nakloke ba ema hotu tantu relijiaun sira seluk mós mai halo vizita ba fatin ne’e kada loron tanba ne’e presiza atu hadia ninia infraestrutura ne’ebé aat ona inklui kalen hirak kuak ona maibé seidauk hadia.
“Ami halo buat hirak ne’e atu hatudu ba joven sira katak halo tuir buat ne’ebé diak, halo buat diak hahú husi kiik to’o sai bo’ot hodi desenvolve ita nia rai no desenvolve turismu relijiozu iha fatin ida ne’e para dada ema husi munisipiu seluk no estranjeiru”. Nia dehan
Monumentu Koronel Santu António Manatutu inaugura hosi Bispu Dom Carlos Filipe Ximenes Belo iha 11 Junhu tinan 1992, fo hanoin fali katak loron boot Santu António de Badua monu iha loron 13 fulan junhu, nune’e kada tinan sarani Manatutu sempre halo selebrasaun iha monumentu refere.
Tuir observasaun SAPNews iha terrenu nota katak ema barak sempre ba vizita, halo orasaun, hasai foto, halo reflesaun, meditasaun maibe kondisaun infraestrutura iha monumentu ne’e hahú aat liliu uma kakuluk estátua Santu António nian tanba desde 1992 to’o ohin loron seidauk iha rehabilitasaun ruma.
Iha monumentu ne’e iha lixeiru, toilet, ambiente matak, iha ne’ebé ema bele hasai foto ho background ne’ebé furak ba tasi, foho no sidade Manatutu.
Jornalista : Marciana da Conceição & Daniel da Silva