Imajem : Treinador Karketu Dili FC Bernard Teye hala’o konferensia imprensa iha edifisiu orgaun LFTL Merkadu Lama, Dili sexta (23/05/2025).
SAPNewsTL, Dili: Klube Karketu Dili FC hakarak pontu tolu iha jogu abertura kontra AD SLB Laulara iha Liga Timorense 2025 maibe klube adversariu hein minutu 90 mak sei determina rezultadu
Augusto dos Santos – SAPNews
“Ami preparadu ona, nune’e aban hasoru AD SLB Laulara ami sei hatudu jogu furak, ami hakarak joga atu hetan pontu tolu no manan iha jogu aban”, dehan treinador Karketu Dili FC Bernard Teye ba jornalista sira liu konferensia imprensa iha edifisiu orgaun LFTL Merkadu Lama, Dili sexta (23/05/2025).
Treinador hatutan, “Kona ba ami nia estratejia ba jogador aban mak sei hare’e iha kampu maski Karketu mai ho Jogador husi Ghana nain hitu, aban mak hare’e sira sei bele tun hotu ka lae tanba jogador diak barak inklui jogador lokal mak reforsa ami nia klube”.
Iha sorin seluk, Jogador kapitaun husi Karketu Dili FC Daniel Adade hatete, sira preparadu hodi joga hasoru nia adversáriu.
“Ami prepardu ona ba jogu aban, ami nu’udar ekipa zigante iha Timor-Leste, tan ne’e aban jogu ami hakarak manan”, tenik Daniel
Iha Fatin Hanesan, Treindor AD SLB Laulara Efrem Dos Santos dehan, sira preparadu maibe triste oituan tanba aban sira sei joga ho jogador lokal tanba sira nia jogador estranjeiru seidauk bele mai reforsa ekipa.
“Durante ne’e, ami prepara ho diak maibe triste oituan tanba ami la’o ho jogador lokal tanba ami nia jogador Mouzinho de Lima ho Jogador Estranjeiru nain rua husi Rusia no kolombia seidauk bele mai hamutuk ho ami ba jogu aban maibe kontra Karketu Dili FC jogu minutu 90 mak sei determina rezultadu ”, Efrem hateten.
Iha biban hanesan, kapitaun husi AD SLB Laulara Filomeno Junior Da Costa informa, tarjetu ba jogu aban kada ekipa hakarak hetan rezultadu pozitivu inklui AD SLB Laulara ho Karketu Dili FC.
“Tarjetu ba jogu aban kada ekipa hakarak hetan rezultadu pozitivu inklui AD SLB Laulara ho Karketu Dili FC, tan ne’e ba jogu aban ne’e ami preparadu ona minutu 90 mai sei determina saida mak sei akontese iha kampu laran”.Filomeno hateten
Entretantu, jogu abertura Liga Timorense 2025 Karketu Dili FC kontra AD SLB Laulara sei hala’o iha loron ohin, 24 fulan maiu 2024 iha Estadium Manatuto iha tuku 16;00.