Imajem : Bispu Dioseze Baukau, atual Sejretáriu Ezekutivu Conferénsia Episkopál Timorense (CET), Dom Leandro Maria Alves. Foto : Arkivu SAPNews
SAPNewsTL, Dili : Karta Pastoral Bispu sira nian ba Tempu Adventu-Natal 2024, Konferénsia Episkopál Timorense (CET) nia karta ba sarani ho tema esperansa la bosok.
“Ami Bispu sira konvida ita hotu atu halo: conversão pastoral no missionária; conversão estrutural; conversão hosi maromak falso sira mundo ohin loron nian: kan ba isin, osan no poder conversão”.
“Esperança La Bosok” (Rm: 5,5)
Na’i-Lulik, diácono, madre, irmão, seminaristas, maun-alin no bin-feton sira no ema hotu nebé iha hakaran di ‘ak:
Graça no domin Maromak nian horik ho imi hotu!
“Sira nebé titu Na’i sei hafoun sira nia kbiit hodi semo ho liras hanesan makikit, sira sei halai no sei la kole, sira sei la’o no kbi’it sei la nahas” (Is 40,31).
Povu Timor, povo ne’ebé hatene hein. Ita sei hanoin, wainhira povo ida ne’e hahu nia luta ba ukun an, mundu tomak la fiar katak mehi ne’e ikus mai bele sai realidade. Experiência hatudu katak, maske timoroan sira mate rihun ba rihun maibe ninia esperança nunca mate. Povo nebé hatene hein, nia iha futuru. Mesmo que futuro ne’e nakonu ho incerteza no insegurança, ba ema nebé hatene hein la hein nale’et de’it. Basa, hein mak atitude nebé nakonu ho optimismo katak loron aban sei sai diak liu.
Iha era ukun an nian, sei iha nafatin ka la’e razões de esperança? Atu reflete no descobre hikas kbit ida ne’e ita precisa uluk nanain hateke ho laran mos ba realidade Timor ohin loron nian: iha desafio oi-oin nebé sadik ita nia consistência no persistência nu’udar povo ida hein nain to’o halo ema barak halerik tamba lakon esperança ba moris diak iha futuro; injustiça social la fo fatin ba solidariedade no justiça atu nadelun.
Sarani sira lakon confiança ba malu tamba sira nebé simu knaar atu serbi ladun fo sasin nu’udar matadalan no banati kmanek; timoroan sira nebé matenek ladauk haroman didiak consciência critica nação nian; familia nu’udar sélula sociedade nian ladauk sai fatin dahuluk ba escola humanidade nian; foinsa’e sira ladauk hatudu sira nia an nudar esperança Kreda no Nação nian; escola sira seidauk sai fatin ba criatividade no iniciativa nebe bele haburas esperanca rai ne’e nian.
Falta de kontrolu ba uso media social ida responsável, halo ema lakon tiha respeito, hahi no tane malu, to’o harahun valor sira cultura, ética no moral iha sociedade Timor nian. Ita hotu akompanha, ikus ikus nee mosu fenómeno grupo oi-oin nebé kahur politica, religião, cultura no fiar.
Grupu balun laiha fundamentu moral no étika, hakiak distúrbiu no desordem social hodi usa arbiru atributo sagrado sira to’o hasai lia foer hasoru autoridade Kreda Católica nian iha Timor-Leste. Seita sira ne’e, sai desafiu boot pastoral no katequese Kreda Católica nian. Ba ida ne’e, ami Bispu sira tane aas sarani sira nebė fiar metin nafatin no husu atu matan moris neon nain hodi la monu ba tentação sira nebé mak mosu.
Prezidente Conferénsia Episkopál Timorense (CET), Buspu Dioseze Maliana, Dom Norbeto do Amaral
Apostasia katak ema sarani ne’ebe publikamente la fiar ka nega total doutrina Igreja Católica nian, heresia katak ema sarani nebe publicamente nega parte balun husi doutrina Igreja Católica nian, cisma katak ema sarani nebe publikamente rezeita comunhão plena ho Igreja Católica.
Na ‘ilulik, diácono, madre, irmão, seminaristas, maun-alin no bin-feton sira no ema hotu nebé iha hakaran di ak:
Hori wain kedas Maromak nunka husik nia povu la’o mesak: iha moris atan nian iha rai Egipto”, iha dalan sira rai fuik maran nian”, iha halerik sira povy nian ba hamlaha no hamrook”, iha povo sira nia murmura hasoru Moisés no Maromak, iha sira nia neon nakukun no tauk nia laran”, iha sira nia dúvida no sira nia fila kotuk ba Maromak”. Iha situação hirak ne’e hotu, Maromak hatudu nafatin nia laran luak no nia laran sadia, Nia promesa sira la’os liafuan mamuk”, maibe nakonu ho esperança”.
Adventubmak tempu esperança nian. Tempu atu hakbiit ita nia neon titu; tempu atu halakon ita nia laran taridu no neon nakraik; tempu kmanek ba perdão no reconciliação ho Maromak, maun-alin sira no kriatura tomak, tempo atu foti ulun hateke ba oin, ho laran metin katak, ita la la’o mesak, Nia la’o hamutuk no horik ho ita nafatin basă Nia naran mak Immanuel katak Maromak ho ita.”
Maromak ida nebé hori uluk koalia fila-fila ona ba ita nia bei-ala sira ho dalan oi-oin, liu husi profeta sira, no oras ne’e, iha tempo ikus, Nia koalia mai ita liu husi nia Oan Mane. Jesus Cristo mak ita nia esperança! Esperança nebé ita hala’o iha biban adventu ne’e hetan nia sentido nakonu wainhira Jesus tama no hola isin ema nian no horik ho ita iha ita ema nia história.
Tinan rihun rua resin liu ba, Jesus hiit an tiha ona iha ita nia história; oras ne’e Nia mai nafatin iha Eucaristia no nia sei hiit an mai iha tempubikus hodi tesi-lia ba ema moris no ema mate. Esperança ida ne’e mak ita haklaken fila-fila iha eucaristia: “Na’i ami fo hatene ita nia mate, ami haklaken ita nia moris hias, Na’i Jesus hi’it an mai”.
Hasoru Na’i nia hi’it an mai, husu husi ita: laran badinas atu reza, laran haraik an atu hakribi salan, laran manas ba caridade. Iha biban nebé Kreda tomak hafoun an fali ho espiritubsinodalidade nian hodi moris iha comunhão, participação no missão.
“Ami bispu sira convida ita hotu atu halo: conversão pastoral no missionária; conversão estrutural; conversão hosi maromak falso sira mundo ohin loron nian: kan ba isin, osan no poder conversão”.
Imajem : Bispu Metropolita de Dili, Dom Virgílio Cardeal do Carmo da Silva. Foto : Marcela Mery da Costa
Na’ilulik, diácono, madre, irmão, seminaristas, maun-alin no bin-feton sira no ema hotu nebè tha hakaran di’ak:
Esperança advento nian realiza iha mistério Natal. Mistério konaba Kosok Oan Jesus nebé “maske Maromak, la tanesan An ho Maromak, maibe hamamuk nia An, hodi halo An sai atan, no sai ida de’it hanesan ema. Nu’udar ema, Nia haraik An liutan hodi halo tuir to’o mate no mate iha cruz”, Husi exemplo lala’ok moris Cristo nian nebe hatene hamamuk no haraik An mak ami Bispo sira exorta:
Atu ita hatene configura an ho Cristo Jesus, iha ita nia hanoin, hakaran, hahalok no lala’ok; Atu virtude haraik an no simplisidade sai iis moris sarani nian, tuir lia menon Papa Francisco nian iha Tasi tolu dehan: “Keta tauk atu sai ki’ik iha Maromak futar oin no iha ema nia oin. Atu hatene saran ita nia moris, fo ita nia tempo, dedica ita nia programa sira ba ema seluk nia diak. Nune’e, ita bele husik buat ruma husi ita nia an atu maun-alin ida ka inan feton ida bele soi moris diak no haksolok”;
Atu ita ida-idak moris tuir vocação nebé ita simu ona, bele aproveita biban adventu nian hodi halo exercicio espiritual nebé lori ita sai instrumento no manu ain esperança nian ba futuro;
Atu toman sira halo presépiu iha dalan ninin ho ahi lakan artificial oi-oin bele sai biban kmanek atu hafutar presépio fuan nian;
Atu ho Kosok oan Jesus nia moris halo Natal sai festa dame, domin no ksolok boot, nune’e fuan nebé malirin sai manas, fuan nebé toos sai mamar, néon nebé nakraik nakfilak ba néon ksolok, no ida nebe lakon esperança hetan néon metin.
Hamutuk ho Rahun diak Virgem Maria, inan esperança no banati kmanek haraik an nian, ita la’o hamutuk ba hasoru Na’i nia loron moris, ho néon nakloke no fuan metin katak ho Maromak buat hotu bele deit no loron aban sei sai diak liu.
Ami deseja Rahun Diak Advento no Ksolok Natal 2024 nian ba imi hotu.
Karta pastorál ne’e asinadu hosi Dom Norberto Bispo de Maliana e Presidente da CET, Dom Virgilio Cardeal do Carmo da Silva, SDB, Arcebispo de Dili e Pro-Presidente da CET. Dom Leandro Marjaa Alves, Bispo de Baucau e Secretário Geral da CET.
Dili, 1 Dezembru 2024
Jornalista : Marciana da Conceição