Komunikadu Imprensa Forum Organizasaun Naun – Governamental Timor – Leste (FONGTIL) iha salaun FONGTIL Caicoli, Dili sexta, (13/01/2023).
SAPNewsTL, Dili: Relasiona ho kazu oho malu no sona malu iha kapital Dili, Forum Organizasaun Naun – Governamental Timor – Leste (FONGTIL) liu husi komunikadu imprensa sexta-feira orseik, husu ba Polisia Nasional Timor-Leste (PNTL) hodi asegura Seguransa Sidadaun tanba kazu omesidiu, tentativu omesidu akontese iha Dili laran sa’e husi fulan dezembru 2022 to’o janeiru 2023.
“Ami hare hahú husi Dezembru tinan 2022 to’o Janeiru 2023, akontese kazu omisidiu no tentativa Omesidu akontese iha Dili Laran sa’e makas tan ne’e PNTL nu’udar forsa seguransa ida ne’ebé iha misaun atu defende legalidade demokratiku hodi garante seguransa sidadaun nian no proteje direitu sidadaun nian tuir termu ne’ebé estabelese iha konstituisaun no iha Lei sira”, dehan protokolu ofisial advokasia Jorge Madeira ba jornalista sira iha salaun FONGTIL Caicoli, Dili sexta, (13/01/2023).
Jorge konsidera atuasaun Komandu PNTL Munisipiu Bobonaro kontra Konstituisaun Artigu 147, alinea 1. katak Polisia defende legalidade demokrátiku no garante sidadaun sira nia seguransa interna, maibé sira nota katak membru komandu munisipiu Bobonaro halo agresaun fiziku ba sidadaun sivil iha Bobonaro ne’e la obedese ba orden konstitusionál inklui Lei Organika PNTL nian, dekretu lei no. 16/2009, loron 18 fulan marsu, artigu 4 alinea 1 no 2 tuir lei , PNTL bele uza forsa bainhira iha perturbasaun ba orden no Trankuilidade públika.
Nia Informa, bainhira laiha meius seluk ne’ebé sufisiente hodi hasoru rezisténsia kontra membru PNTL, hala’o sira nia funsaun, forsa bele uza de’it hodi defende an ka hodi defende ema seluk hodi hasoru hahalok ne’ebé agresivu, kontra lei ka kontra integridade fizika membru PNTL ka sidadaun seluk nian
Ofisial advokasia ne’e akresenta tan, sira konsidera mos atuasaun Falintil Forsa Defesa Timor – Leste (F-FDTL) destakadu iha Munisipiu Covalima kontra Konstituisaun Artigu 146, katak F.FDTL garantia independensia nasional , Intregridade territoriál , liberdade no populasaun nia seguransa hasoru agresaun ruma ka ameasa esterna, ho respeitu ba orden konstitusional, labele halo fali agresaun fiziku ba sidadaun sira.
Jornalista : Marcela Lemos