Imajem : Konseleiru Konsellu Imprensa hamutuk Presidente Parlamentu Nasional no orador internasional sira iha Salaun Multiozu GMN, 10/05/2024. Foto : Media KI
SAPNewsTL, Dili- Relasiona ho Relatóriu Reporter sem Fronteira (RSF), ne’ebe monu husi top 10 ba top 20, Presidente Konselho Imprensa (KI) Oteli Ote rekunhese katak sente kahur sentimentu tristeza maibe ida ne’e mak evolusaun husi liberdade imprensa.
Iha loron hitu liuba, Timor-Leste rona anunsiu husi Reporter Sem Fronteira (RSF) kona – ba Ranking Liberdade Imprensa, ne’ebe hatudu Timor-leste nia ranking tun husi Top 10 ba Top 20.
“Ita rekunhese, kahur ho sentimentu triste to’o hatudu malu se mak loos se ma sala. Maibe, ita presiza mos konsiente katak, ida-nee mak evolusaun husi Liberdade imprensa”. Tenik Presidente KI Otelio Ote liu husi diskursu iha Salaun Multiozu GMN Dili, 10/05/2024
Lider Orgaun regulador komunikasaun sosial ne’e informa, iha enkontru nasaun membru Rede Konsellu Imprensa Sudeste Aziatiku ka South East Asia Press Council Network (SEAPC-net), kuaze oras haat, hare mos asuntu ranking Liberdade imprensa ne’e, katak labele konsira RSF nu’udar fonte úniku iha avaliasaun liberdade imprensa.
“Nasaun membru SEAPC-Net konsidera Reporter Sem Fronteira (RSF) mos nu’udar Organizasaun Naun Governamental ida, ne’ebe iha sira-nia avaliasaun, dalaruma simu de’it informasaun husi ema ida ka grupu ida, kona-ba dezenvolvimentu Liberdade imprensa iha nasaun sira”.
“Nune’e, labele uza RSF nu’udar fonte uniku, iha avaliasaun Liberdade imprensa, tanba iha Organizasaun seluk tan ne’ebe mos halo avaliasaun ho aprosimasaun diakliu, importante ba ita, kontinua iha Espiritu luta atu sidadaun hotu iha asesu ba informasaun, iha Liberdade espresaun, no iha Liberdade imprensa. Liberdade imprensa tenki ekuilibru ho kualidade produtu midia.” Nia husu
Presidente Konsellu Imprensa, Otelio Ote
Otelio ote husu ba Estadu, Governu no Parlamentu Nasional atu hare produtu lejislasaun sira, atu labele taka dalan ba liderdade asesu informasaun no Liberdade imprensa.
“Tanba Liberdade imprensa mos sai sasukat importante ba ranking demokrasia iha kada nasaun, tan ne’e ha’u konvida ita hotu atu aprende husi frakeza pasadu, hadia aan ohin kedas no hakat ba oin nafatin, ba midia ne’ebe ho kualidade di’ak no midia independente, ba povu nia Liberdade opiniuan di’ak no ba Timor-leste nia demokrasia di’ak, di’ak iha rejiaun ne’e no iha mundu”. Nia hakotu
Iha fatin hanesan, Prezidente Parlamentu Nasional Maria Fernanda Lay konsidera ranking liberdade imprensa tun husi top 10 ba top 20 husi nasaun 180, signifika la’os kategoria hanesan pior, tan ne’e nia kontinua enkoraja media no jornalista sira hodi garante nafatin liberdade imprensa no expresaun iha Timor-Leste.
“Ita nia ranking tun husi top 10 ba top 20 husi 180 paizes, entaun ne’e kategoria la pior, tan ne’e ha’u enkoraja media no jornalista sira hodi kontinua ba oin, liliu mos luta hasoru krize ambiental ne’ebe oras ne’e ita hasoru”. Hameno Presidente PN Maria Fernanda Lay liu husi nia diskursu abertura.
Presidente Assosiasaun Jornalista Timor-Leste (AJTL) Zeovania Vieira mos preokupa kona ba ranking RSF ne’ebe monu, tan ne’e nia partz husu ba governu atu labele halo interferensia ba redasaun media sira.
“Ha’u mos preokupa kona ba ranking liberdade imprensa ne’ebe tun, ha’u ba governu, nune’e mos SEKOMS iha ne’e atu labele halo intervensaun ba redasaun media sira”. Nia Husu ba governu iha Dili Dialog Forum
Iha eventu Dili Dialog Forum ne’e hetan partsipasaun husi Presidente Parlamentu Nasionál Maria Fernanada Lay, Sekretaria Estadu Komunikasaun Sosial, Prokuradoria Jeral da Repúblika, Orador internasional nain haat, Estrutura Media sira, Jornalista sira no konvidadu sira.
Jornalista : Ermelinda Soares