Imajem : Prezidente Komité Orientador 25, Constancio da Conceição Pinto “Terus”.
SAPNewsTL, Díli – Komemora ezistensia tinan rua nulu-resin lima (25) loron Konsulta Populár 30 Agostu 1999, governu orienta Komite Orientador 25 (KO) hamutuk ho populasaun husi munisípiu sanulu resin-haat (14) inklui Atauro hodi halo reflesaun memoria luta ba Timor-Leste nia ukun rasik aan.
Presidente Komite Orientador 25 Constâncio Pinto “Terus” hateten Primeiru Ministru (PM) Kayrala Xanana Gusmão orienta Komite Orientador 25 ne’ebé hakerek istória Timor-Leste ba luta ukun rasik aan hodi halo reflesaun hamutuk ho populasaun iha ambitu selebrasaun ezistensia ba dala-25, komemorasaun loron konsulta populár 30 Agostu iha munisípiu.
Presidente Komite Orientador 25 Constâncio Pinto “Terus” ne’e salienta, KO25 ne’ebe estabelese husi VIII governu konstitusional ho rezolusaun mandatu propriu peskiza no hakerek livru istoria Timor-Leste luta ba ukun rasik aan, nune’e IX governu PM Kayrala Xanana Gusmão apoiu sira halo atividade selebrasaun 30 de agustu iha kada postu administrativu.
“Komité orientador 25 ne’ebé estabelese husi VIII Governu ho nia rezolusaun mandatu propriu peskiza no hakerek livru istória Timor-Leste ba luta ulun rasik aan nian, entaun PM Kayrala Xanana Gusmão apoiu ami atu halo atividade selebrasaun 30 Agustu iha munisípiu husi kada postu administrativu tomak”. Dehan Constâncio Pinto ba jornalista sira iha komferensia imprensa iha knaar fatin Bidau Akadiruhun(23/05/2024).
Prezidente ne’e akresenta, espera ema hotu hatene KO25 sei hala’o atividade barak hodi halo refleksaun, expozisaun, troka ideia no memória kona-ba luta Timoroan nian.
“Hau fiar katak iha Munisípiu hotu hatene ona Komité Orientador 25 sei hala’o atividade lubuk ida hodi halo reflesaun, expozisaun, troka ideia no memoria kona-ba ita nia luta, halo aprezentasaun filme konaba ita nia luta ukun rasik aan hodi ajuda populasaun no partisipante tomak iha postu idak-idak, ita bele hamutuk hodi halo reflesaun ba tempu passadu, agora no futuru nian”.
Nia informa, loron 30 fulan Agostu 1999 povu tomak no timoroan ne’ebé atinje idade sanulu resin-hitu (17) partisipa iha referendum hodi deside futuru Timor-Leste iha pregu nia tutun.
“Ita hatene ona katak loron 30 fulan Agusto tinan 1999 ita nia povu no populasaun tomak iha Timor-Leste ho idade 17 ba leten partisipa iha referendum hodi deside futuru Timor-Leste ho de’it pregu nia tutun, ohin loron ita sai nasaun ida ne’ebé independente, sai estadu direitu no demokrátiku”.
“Ezistensia tinan 25 loron konsulta Populár 30 Agostu, reflesaun kona-ba passadu povu nia luta, terus no sofrimentu ne’ebé timoroan infrenta hakat liu hotu ona, hafoin alkansa independensia”. Nia Hatutan.
Entretantu, aktividade reflesaun ne’ebé komite Orientador 25 sei halo iha munisípiu, postu administrativu tomak iha Timor-Leste, hetan apoiu orsamentu husi Ministeriu Administrasaun Estatal (MAE) hamutuk 160.000 mil hodi halo dialogu ho reflesaun loke filme kona-ba luta ulun rasik aan hamutuk ho populasaun ne’ebe hahú iha loron 27 to’o 30 fulan Agostu Tinan 2024.
Jornalista : Ermelinda Soares