SAPNewsTL, Dili: Federasaun Motosiklizmu Timor-Leste (FMTL) sei realiza Road Race 2023 hodi komemora loron FALINTIL ba da-48 durante loron tolu, Eventu ne’e sei komesa iha loron 18 Fulan Agostu 2023 iha Tasi Tolu.
“Ohin ami federasaun hamutuk komisaun organizador ba Road Race 2023 hakarak fo sai ba públiku katak eventu Road Race ne’e sei realiza iha loron 18 to’o 20 fulan agostu tinan ne’e hodi komemora loron FALINTIL da-48”.
“Tan ne’e fo hatene mos ba ekipa hotu prepara motor no kondisaun sira hotu”, dehan Vise Presidente FMTL Helder Vieira ba jornalista sira liu husi konferensia imprensa iha salaun Haksolok Vila Verde, Dili tersa (15/08/2023)
Vise Prezidente hatutan, Race Road ne’e partisipa laos raider Timor oan deit maibe partisipa mos raider husi Indonesia ne’ebe agora balun iha ona Timor-Leste no balun sei iha dalan Indonesia mai Timor-Leste
Raider sira sei kompete iha klase 21 Mak klase beginner, sport, sport campuran, super moto, MP7, beginner U-14 no klase veteranu husi klase sira ne’e mak sei kompete ho motor sira ho cc la hanesan tan ne’e sira fahe to’o klase 21.
Nia informa tan, rejistrasaun ba partisipante sira hala’o ona iha loron tolu kotuk ba, nune’e aban sira sei realiza technical meeting ho ekipa sira hotu husi rai laran no mos husi Indonesia
Tan ne’e sira mos husu ba adeptu sira keta haluha ba Tasi Tolu iha loron 18 to’o 20 fulan agostu 2023 para bele asiste Road Race ne’e, ekipa rejistu husi rai laran kuaze rejistu hotu ona hamutuk rua nulu resin hamutuk ho Indonesia nian ekipa lima maibe sei aumenta tanba balun iha dalan hela
Helder afirma tan, ba fatin kompetisaun komisaun preparadu hotu ona no sei seguru ba hare’e nain sira, kompetisaun ne’e hetan apoiu masimu husi Ministériu Juventude Desportu Arte Kultura (MJDAK) no hetan suportasaun prinsipal husi Pertamina Internasional hamutuk ho patrosinador sira seluk
Prémiu sira sei prepara ba manan klase 21 nian fahe ba klase lokal 16 no internasional 5, kada klase sira sei fo premiu ba manan dahuluk to’o dalimak ho diferente
Nune’e sira sei prepara premiu ba manan nain hamutuk 105 no sira mos fo ona karta kuñesimentu ba parte seguransa PNTL ho F-FDTL, sira mos fo karta ba bombeiru, saúde, media no parte relevante ne’ebe apoiu sira nia eventu.
Entretantu, Road Race 2023 ne’e realiza tanba hetan apoiu masimu husi patrosinador prinsipal Pertamina Internasional hamutuk ho MJDAK, Haksolok Group, Mandiri Timor-Leste, Yamaha, ESM, Brother Motor, Maxxis Tires, JDL 89, MAX ADS, Novo Turizmo, Jenic, Zefra, Chrame Unipessoal Lda, Grafika Taliti, SM, HV Store no HF.
Reportajen: Augusto dos Santos