Imajem : Primeiru Ministru Kayrala Xanana Gusmão hasoru malu ho Sekretáriu Jeral ONU António Guterres iha Antígua No Barbuda
SAPNewsTL, Antígua no Barbuda– Primeiru Ministru (PM), Kay Rala Xanana Gusmão hala’o enkontru ho Sekretáriu Jerál Organizasaun Nasaun Unidas (ONU), António Guterres.
Iha sorumutu ne’e, PM Xanana entrega karta konvite hosi Prezidente Repúblika (PR), José Ramos-Horta ba António Guterres hodi partisipa iha komemorasaun tinan 25 Konsulta Populár iha 30 Agostu 2024, iha Timor-Leste.
“Hasoru malu kortejia ho Sekretariu Jeral ONU António Guterres, komprimenta no felisita nia, ha’u mos entrega karta husi Prezidente Repúblika hodi konvida Sekretáriu Jeral atu bele karik nia partisipa iha 30 Agustu 2024, ita sei halo 25 anus selebrasaun referendum”Tenik PM Kayrala Xanana Gusmão iha São João, Antígua no Barbuda, segunda (27/05/2024), SAPNewsTL asesu liu husi pajina ofisial Facebook Primeiru Ministru
Konvite ho karráter espesiál hosi Xefe Estadu Jose Ramos-Horta no povu Timor-Leste nian ne’e, entrega ofisialmente hosi Xefe Governu Ka Xanana Gusmão bá Sekretáriu Jerál ONU, António Guterres, hafoin partisipa abertura IV konferénsia internasionál kona-bá Estadu Illa Kiik Dezenvolvidu (SIDS) sira ho tema “Hamutuk Trasa Planu bá Prosperiedade Reziliente,”
Primeiru-Ministru konsidera, konvite ne’e espesiál tebes bá Sekretáriu Jerál ONU, António Guterres hosi povu Timor-Leste.
Alende ne’e, konvite espesiál ne’e mós sei hato’o bá bainaka importante sira seluk hanesan Xefe Estadu no Xefe Governu nasaun balun, ne’ebé sei konvida atu partisipa iha festa komemorasaun konsulta populár hosi 20 to’o 30 Agostu 2024, hodi fó lembra kona-bá istória luta Timor-Leste nian bá independénsia.
Iha fatin hanesan, Sekretáriu Jerál ONU, António Guterres sente onradu bele hasoru hikas, Kay Rala Xanana Gusmão hanesan líder rezisténsia Timor-Leste nian ho povu Timor-Leste ne’ebé sai nu’udár belun di’ak bá líder ONU ne’e.
“Benvindu Amigu Boot, Kayrala Xanana Gusmão, orgullu tebes bele hasoru malu ho ita iha fatin ida ne’e, agradese ba ita nia presenza iha enkontru ida ne’e”. António Guterres hateten bainhira simu karta hosi Xanana Gusmão no kaer-liman, haku’ak-malu nu’udár belun di’ak.
António Guterres agradese ba konvite ne’e, maibé líder ONU ne’e seidauk bele fó respota kona-bá ninia partisipasaun, tanba sei haree bá servisu ONU nian ne’ebé daudaun ne’e foka bá pás iha nasaun hotu-hotu.
António Guterres durante ne’e iha relasaun di’ak ho povu no lider sira Timor-Leste nian to’o assume kargu nu’udár Sekretáriu-Jerál Organizasaun Nasoens Unidas (ONU), kontinua hakle’an kooperasaun ho Timor-Leste, estabelese parseiru oin-oin ho nasaun membru hirak ne’ebé halo parte iha sistema globál ONU hodi ajuda hadi’a no dezenvolve Timor-Leste iha seitór oioin.
António Guterres assume kargu Primeiru-Ministru Portugál hosi tinan 1995 to’o tinan 2022, no hala’o knaar hanesan Altu Komisáriu ONU nian bá Refujiadus hosi tinan 2005 to’o tinan 2015.
Hosi loron 1 fulan-janeiru tinan 2017 simu knaar hanesan Sekretáriu-Jerál ONU. Eleitu hikas ho lian ida de’it hosi Estadu-Membru ONU nian hamutuk 193, bá mandatu foun iha 1 janeiru 2022 to’o agora.
Jornalista : Dircia Baptista Belo