Imajem : Entrevista foinsa’e Nofiana Colo ne’ebé kuru bee ho distánsia dook iha Aldeia Saben, Oesilo, 23/01/2025
SAPNewsTL, RAEOA : Komunidade suku Bobometo, aldeia Saben, sub-rejiaun Oesilo nafatin enfrenta problema ba bee-moos desde Indonezia nia tempu to’o mai agora, situasaun ne’e halo sira sente seidauk ukun an iha estadu direitu demokrátiku ida ne’e.
Komunidade aldeia Saben Maria Delfiana Oki hateten, sira nafatin preokupa ba bee-moos tanba tenke la’o distansia ne’ebe dook, tuun no sa’e foho hodi asesu ba bee-moos desde tempu invazaun Indonezia to’o mai Timor-Leste ukun aan.
“Durante Timor ukun an, ami nafatin la’o ho distansia ne’ebe dook hodi ba kuru bee iha bee-matan Oel-bibon. Ami ba kuru bee iha bee matan Uelbibon distansia husi uma ba bee matan ne’e han 30 mitutus mai 30 minutus entaun ba mai oras ida”. Dehan komunidade Maria Delfiana Oki iha nia knua aldeia Saben, (23/01/2025).
Imajem : Nofiana Oki
Inan feto ne’e informa, bainhira ba kuru bee lori deit masa tolu tanba kolen no laiha forsa hodi hiit bee sa’e foho hosi bee-matan, nia mos sente triste husik oan mesak iha uma hodi ba kuru bee.
“Baibain ami ba kuru bee-moos lori masa 3 de’it, tanba kolen no forsa la too atu hiit bee masa hodi sae foho mai uma, hanesan inan ida ha’u sente kolen no triste tanba husik oan ne’ebe sei ki’ik mesak hodi ba kuru bee. Ami sente hanesan seidauk ukun aan”. Maria konta ho triste.
Iha tempu udan sira kolleta udan been hodi uza ba nesesidade uma laran, iha tempu bailoron tenke selu transporte públiku hodi ba kuru bee iha fatin seluk.
“Tempu udan hanesan ne’e ami ba kuru bee iha bee-matan no udan been ami uza ba fase bikan no ropa, maibe tempu bailoron ami tenke selu kareta ho montante 25 dolares hodi ba kuru bee iha mota Noel-ekat. Hau husu ba parte relevante sira atu tau matan ba ami nia bee”. Nia hakotu.
Imajem : komunidade kuru bee ho distánsia dook iha Aldeia Saben, Oesilo,23/01/2025
Foinsa’e husi Oesilo, Nofiana Colo haktuir kada loron nia sempre ba kuru bee ho masa 6 hodi uza ba nesesidade família
“Ami la’o mai ho masa rua, la’o durante 30 minutus husi mai mai bee-matan, husi bee-matan la’o minutu 40, Ha’u sente todan tanba kuru bee iha fatin ne’ebé dook, ami hakarak asesu bee-moos”. Nia husu
Imajem : Felisanti Oki
Felisanti Oki informa nia bee ne’ebé sira kuru lor-loron uza ba nesesidade báziku família nian, maske nune’e nia parte sente kolen maibe obrigadu tenki kuru tanba laiha bee-matan alternativa seluk ne’ebé sira bele asesu besik.
“Ami sente kolen wainhira lor-loron kuru bee hodi ba tein, fase roupa haris no nesesidade lor-loron”. Nia dehan
Enkuantu, Suku Bobometo iha aldeia 9 ho uma-kain hamutuk rihun rua atus tolu ualunulu (2.380) ho populasaun hamutuk rihun sia atus sia limanulu resin-ida (9.951).
Jornalista : Marciana da Conceição