Imajem : Estrada Ligasaun Suku Tibar, Postu Administrativu Bazartete, 14/12/2024
SAPNewsTL, Liquiça : Komunidade Aldeia Fatunea Suku Tibar, postu administrativu Bazartete preokupa kondisaun estrada ne’ebe mak aat durante tinan barak no karreta saneamentu ne’ebe akumula lixu husi Díli ba Tibar halo rai rahun semo ba mai iha komunidade ninia uma oin, nune’e fo impaktu ba saúde komunidade.
Tuir abitante Joaquim Almeida katak uluk sira preokupa los kona bá lixu tanba lixu ne’ebe akumula hamutuk iha Tibar ne’e sunu deit, nune’e halo poluisaun makas hodi fo impaktu negativo bá komunidade sira nia saúde maibe ohin loron hahú tun ona tanba la sunu hanesan uluk.
“Ami nia preokupasaun ne’e bá lixu tanba iha kedas tempu Indonesia nia ne’e foer lori mai sunu deit no halo suar makas, lalar barak no dois, maibe agora diak uitoan tanba iha ona teknologia ne’ebe bele resolve lixu no la sunu ona hanesan uluk”Dehan Joaquim Almeida bá jornalista sira iha Tibar Sabado/14/12/2024.
Komunidade sira mós preokupa makas kona bá estrada tanba estrada refere ho kondisaun ne’ebe aat kleur ona no fo impaktu bá komunidade nia saúde liliu bá labarik sira.
“Ami nia estrada ne’e aat kedas iha tempu Indonesia nia to’o mai agora seidauk iha solusaun, kuandu iha tempu udan hanesan ne’e ami nia estrada nakfilak bá tahu dodok no iha tempu bai loron ami nia estrada nakfilak bá rai rahun, rai rahun makas los entaun ha’u tenki hasai osan sosa óleu hodi rega bá estrada nune’e bele hamenus rai rahun tanba nia suar fo impaktu mai ami nia saúde liliu bá labarik sira tanba komunidade barak ona mak hetan moras hanesan mear-raan, inus-ben, isin-manas nst.”Nia Preokupa.
Iha fatin hanesan, Miranda dos Santos husu bá servisu saneamentu munisipiu Díli atu rutinamente rega estrada ligasaun postu Bazartete Tibar tanba rai-rahun nia suar lori moras bá sira.
“Ami nia preokupasaun bá lixu ne’e diak oitoan ona maibe ami nia preokupsaun ne’e maka estrada tanba halo Rai rahun makas tanba ne’e ami husu bá servisu Saneamentu munisipiu Díli atu rega ami nia estrda loron ida dala tolu tanba ami senti la konfortavel ho Rai rahun nia Suar halo loro-loron ami tenki rega rasik hodi bele redus Rai rahun nia suar mai ami nia Uma oin”Nia preokupa
Sorin seluk, Xefe suku Tibar Marcelino Ananeias Correia Lemos husu bá Ministério Obras Públicas (MOP) tenki tau atensaun ba estrada ne’ebé sei aat.
“Ha’u husu ba MOP atu tau atensaun maximu ba estrada ne’ebe ami enfrenta hela tanba estrada ne’e difikulta tebes ami nia movimentasaun no fo impaktu bá komunidade sira liliu sira ne’ebé hela besik iha estrada ninin”.Xefe Suku husu
Entretantu, hafoin notisia ne’e Publika SAPNewsTL seidauk halo konfirmasaun ho MOP ligadu ho rai-rahun ne’ebe fo impaktu ba komunidade Tibar Postu Bazartete, Munisipiu Liquiça.
Jornalista : Conzita Mota