Imajem : Komunidade Usi-Tasae hamutuk halo Impréstimu iha Oesilo, RAEOA, 10/05/2025
SAPNewsTL, RAEOA : Komunidade Aldeia Pune suku Usi-Tasae Posto Administrativu Oesilo Rejiaun Administrativu Especial Oe-Cusse Ambeno (RAEOA) halibur malu hari’i Grupu Kooperativu ho naran Am Colo Namaub.
Tuir Xefe Grupu Kooperativu Am Colo, Tome Mala hateten kria grupu kooperativu ne’e ho hanoin hakarak hadia ekonomia familiar no enkoraja membru sira servisu ho produtivu hodi hetan rendimentu liu hosi hasa’e produsaun no fa’an iha merkadu.
“Ami nia grupu ne’e hari’i iha tinan 2013, foufoun ami deside hari’i grupu ne’e ami na’in 7 deit iha momentu ne’eba, iha fali tinan 2020, ami simu tan membru nain uala (8), agora ami hamutuk 15 maka hala’o atividade agríkola no fo kréditu ba membru sira”. Dehan Xefe Grupu Xefe Grupu Kooperativu Am Colo, Tome Mala ba SAPNews iha Oesilo, 10/05/2025
Xefe Grupu Kooperativu Am Colo ne’e sublinha hari’i grupu ne’e hamutuk hodi rai osan no impresta osan hodi sustenta ami nia nesesidade moris loron-loron nian liu hosi halo lia, selu oan sira-nia eskola no produsaun agríkola.
“Wainhira ami hetan difikuldade iha uma laran hanesan hetan lia moris no lia mate ka ami nia oan sira presiza osan urgente atu selu sira-nia estudu, entaun fasil tebes mai ami hodi empresta osan iha ami-nia grupu ne’e”.
Tome Mala konta, “grupu kooperativu ne’e hakmaan tebes nesesidade uma-laran liu-liu ami nia oan sira nia estudu, ami nia oan balun sai ona lisensiadu, balun sei iha hela banku estudu hanesan Pre-primariu, Ensinu Baziku 3⁰ Ciclo, Sekundaria no Universidade”. Nia sublinha
Kada tinan, sira fahe osan funan durante tinan ida nian ba estrutura no membru grupu kooperativu hotu nu’udar rezultadu husi sira-nia kooperativa ka servisu hamutuk.
“Ami nia espera ba futuru, ami nafatin unidade, nakloke ba malu no susesu, tanba liu husi kooperativu mak sei responde ami nia nesesidade komun sira iha area ekonomia, social no kultura”.
Grupo kooperativu ne’e lokaliza iha bairo Kuafe’u Aldeia Pune suku Usi-Tasae Postu Administrativu Oesilo Rejiaun Administrativu Especial Oe-Cusse Ambeno (RAEOA), kompostu husi membru grupu na’in 15.
“Osan ne’ebe ami rai hela iha ami nia kooperativu hahú husi tinan 2013 to’o tinan 2025 hamutuk $ 7.000,00, kada fulan ami rai osan depende ba membru ida-idak nia osan, membru balun rai $ 5.00, 10.00 dolar ba leten, wainhira ami ami empresta osan montante $ 20.00 dolar nia fulan $ 1.00 dolar, $ 100.00 dolar nia funan 5.00”.
Lider grupu ne’e husu ba Sekretaria Estadu Kooperativa (SEKoop) hodi bele fasilita sira asesu ba formasaun no fundu hodi dezenvolve sira-nia kooperativa no hadia kualidade moris iha area rural.
“Ami husu ba parte relevante sira liliu SEKoop, karik bele apoiu netik ami hanesan fasilidade kooperativu nian, apoia formasaun no osan hodi bele hadia no hametin ami-nia kooperativa iha rural”. Nia hakotu
Jornalista : Ariqui Crisanto Colo