Imajem : Kapela Sagradu Korasaun Puno, Lautém, 02/11/2024
SAPNewsTL, Lautém – Iha ambitu selebrasaun misa eukarustia ba loron matebian ha loron 2 fulan novenbru tinan 2024, Katekista Jeral Lautém Constantino da Silva preokupa kapela Puno aat kleur tebes ona maibe seidauk hadia maske komunidade husu beibeik.
Katekista Jeral Lautém Constantino da Silva hateten, kapela Sagrada Korasaun Puno hahu hari’i iha tinan 1992 maibe situasaun funu nia laran konstrusaun la konsege finaliza ho diak, nune’e to’o ohin loron.
“Kapela Sagrada Korasaun Puno, hahú hari’i iha tinan 1992 tanba iha situasaun difisil nia laran iha tempu Indonezia, konstrusaun ne’e para kedas iha tinan 1999”.Tenik Katekista Jeral Lautém Constantino da Silva ba SAPNews iha Puno, Lautém, 02/11/2024.
Hafoin Dom Bazilio do Nacimento nia tempu kapela refere rehabilita fila-fali maibe ho kondisaun anin bo’ot sobu hotu kalen sira ne’e.
“Nune’e, ami husu kontribuisaun hosi na’i ulun sira maibe to’o agora seidauk iha rezultadu, dioseze maka promete tiha ona hodi husu tulun iha Vatikanu maibe to’o agora ami hein maibé nafatin seidauk hetan rezultadu”. Nia hateten
Xefe Katekista ne’e mos husu ba governu hodi tau matan ba sira nia kapela, nune’e sarani sira bele uza ba misa ho diak.
“Ami husu ba Governu karik iha posibilidade bele ajuda ami hodi rehabilita lalais ami nia kapela tanba ida ne’e kleur tebes ona no ami hein maibe nunka iha ema ida mai hodi ajuda ami”. Nia husu
Partisipasaun sarani iha misa eukaristia kada semana sarani sira sempre nakonu iha igreja, liu-liu iha loron festa paskoa, natal, tinan foun no loron finadu.
“Ohin loron matebian nian, ita haree sarani barak mak mai partisipa misa maske ho kapela nia kondisaun ne’ebe aat”
“Ami nafatin ezize nafatin governu liu-liu parte Dioseze nia tulun tanba ami presiza material ka orsamentu hodi rehabilita lalais kapela tanba tempu udan besik ona”. Nia sublinha
Ligadu ho preokupasaun kapela barak aat iha Dioseze Baukau, Bispu Dioseze Baukau Dom Leandro hatan katak nia parte sei haree ho fazeadamente tanba igreza laiha osamentu sufisiente hodi rehabilita ka halo kapela sira.
“Ami sei haree ida ne’e ida por ida, ita sei halo fazeadamente tanba igreza laiha osamentu sufisiente hodi halo kapela sira iha Dioseze Baukau, ita sei haree uluk ida ne’ebé prioridade liu”. Tenik Bispu Dom Leandro Maria Alves ba SAPNews hafoin inaugura Kapela iha Lore, 30/10/2024
Imajem Kapela Sagradu Korasaun Puno
Tuir observasaun SAPNews iha Kapela Puno nota katak Kapela Sagradu Korasaun Puno nia janela aat, kalen katak, didin-lolon kuak no laiha kadeira ne’ebé naton ba sarani sira hodi uza iha selebrasaun eukaristia.
Jornalista : Marciana da Conceição