Imagem : Padre Domingos Maubere
SAPNewsTL, Díli : Padre Domingos Maubere sofre moras grave no oras ne’e hala’o hela tratamentu iha Intensive Care Unit, Hospital Nacional Guido Valadares (ICU-HNGV), Nune’e, Arquidioseze Metropolitana Díli liu hosi karta sirkular katak sarani sira, Padre, Religiosa no Religiosu sira hodi reza ba Padre Domingos Maubere.
Reverendos Padres, Religiosos e Religiosas, no Sarani sira
“Ho comunicado ida ne’e, hakarak comunica ba Ita boot sira hotu Amu Cardeal nia Pedido, husu atu Ita boot sira fo netik horas ida iha Paróquia, iha comunidade religiosa hodi envolve sarani sira halo adorasaun Santissimo hodi dedica ba Amu Domingos da Silva Soares (Amu Du) ne’ebe horas ne’e iha condisaun ne’ebe susar kona ba nia saúde (nia agora iha ICU)”. Sita iha Karta Sirkular Arquidioseze Metropolitana Díli, 11/05/2025
“Bele karik hahu kalan ida ne’e iha Ita boot sira nia fatin. Intensaun ida ne’e husu Maromak Nia tulun hodi halo Amu Du sai lalais husi situasaun kritis”.
Antes ne’e, Presidente Repúblika José Manuel Ramos Horta mós halo ona visita no nia informa katak Padre Domingos Maubere sofre infesaun pulmaun ne’ebe perigozu.
“Ha’u visita ona dala barak, nia dala barak ba ona halo tratamentu iha rai-liur, mais finalmente doutor sira foti liman, agora iha HNGV, halo tratamentu para estabiliza, nia sei rona maibe la haree, triste los tanba Padre ne’e heroi duni, simples, sedu demais ke nia husik hela rai ne’e”. Hateten Presidente Repúblika José Ramos Horta iha Salaun Multiozu GMN Bebora, 10/05/2025
Xefe Estadu hatutan, “Ita haree doutor sira iha Hospital Guido Valadares sira tau matan didiak, iha médiku ne’ebe akonpaña 24 oras. Ohin sira chek nia fuan diak hela, iha infesaun pulmaun mak perigozu, iha medikamente ha’u hatene sei bele halo buat ruma, iha Malazia doutor sira hateten labele ona, so milagre ruma karik”. Ramos Horta informa
Ohin, loron 11 Maiu 2025, Primeiru Ministru Kay Rala Xanana Gusmão mós hala’o ona vizita ida ba Padre Domingos Maubere iha ICU-HNGV maibe kondisaun saúde krítiku.
Fo hanoin fali katak Padre Domingos Maubere hala’o ona tratamentu ba nia saúde dala barak iha rai liur maibe doutor sira foti liman no to’o agora seidauk rekupera.
Jornalista : Marciana da Conceição