Imajem : Prezidente Eleitu EUA Donald Trump. Foto : Noticia ao Minuto
SAPNewsTL, Amérika : Eleisaun Prezidensial Estadus Unidos da Amérika (EUA) ne’ebé realiza iha loron 6 fulan Novembru 2024, Kandidatura Donald Trump konkista vitória ho votus hamutuk 69,527,189 ekivale 51,2%.
Donald Trump ho JD Vance hosi Partidu Republikanu eleitu ho votus total 69,527,189 ekivale 51,2%, enkuantu, Kamala Harris e Tim Walz hosi Partidu Demokrátiku sofre derrota ho votus 64,172,861 ekivale 47,2%.
Hafoin rona rezultadu, mosu reasaun oioin liu hosi lider nasional sira hosi Portugal, Australia, Fransa, Hungaria, no Israel hodi parabeniza Donald Trump tanba konsege konkista vitória kontra Kamala Harris.
Tuir informasaun ne’ebe SAP News TL asesu liu hosi Notisia ao Minuto haktuir katak maske kontajen votu sira seidauk hotu, maibé rezultadu hatudu katak Donald Trump sei fila fali ba Casa Branca nu’udar Prezidente Estadus Unidus ba dala 47.º, hafoin okupa kargu xefe Estadu ba dala 45.º iha tinan haat liu ba.
Prezidente Israel Benjamin Netanyahu kongratula Donald no Melania Trump ba vitória boot ida ne’ebe konkista iha istória Estadus Unidos Amerika.
“Ninia regresu istóriku ba Uma-Mutin reprezenta inísiu foun ida ba Amérika no kompromisu maka’as ida ba aliansa boot entre Israel ho Amérika”, nia hakerek iha rede sosial X (Twitter), SAPNews screenshot liu hosi Notisia ao Minuto, Loron 06/11/2024
Primeiru-Ministru Hungaria nian, Viktor Orbán, mós fó parabéns ba Donald Trump, katak vitória refere maka konkista ne’ebe mundu presiza tebes
“Retornu boot liu iha istória polítika norte-amerikanu nian! Parabéns ba Prezidente Donald Trump tanba nia vitória boot. Vitória ida ne’ebé presiza tebes ba mundu!”, nia hatete, iha rede sosial hanesan.
Iha sorin seluk, Prezidente Fransés, Emmanuel Macron, garante katak nia prontu atu serbisu hamutuk ho Donald Trump iha tinan haat oin mai.
“Parabéns, Prezidente Donald Trump. Prontu atu serbisu hamutuk hanesan ami halo durante tinan haat ho konviksaun, respeitu no ambisaun ba dame no prosperidade barak liután”, nia hakerek iha rede sosiál X.
Eis-prezidente brazileiru, Jair Bolsonaro, mós ko’alia, konsidera katak Donald Trump fila ba Prezidénsia Repúblika Estadus Unidus Amérika hodi kompleta nia misaun no defende povu nia interese.
“Ema ida ne’ebé maski hasoru prosesu eleitorál brutál iha 2020 no persegisaun judisiál ne’ebé la justifikavel, hamriik fali, hanesan ema uitoan de’it iha istória maka bele halo. Kontra buat hotu no ema hotu, Donald Trump sei fila ba Prezidénsia Repúblika Estadus Unidus Amérika nian hodi kompleta nia misaun: restaura nasaun nia grandeza, proteje povu nia interese sira no serbisu ba mundu ida ne’ebé livre liu ho dame no hakmatek liu .” , nia hakerek, iha rede sosiál X.
Prezidente Ukránia nian, Volodymyr Zelensky, garante katak nia bele konta ho “kontinuasaun hosi apoiu bipartidáriu maka’as ba Ukránia iha Estadus Unidus”.
“Ha’u hein oportunidade atu felisita pesoalmente Prezidente Trump no atu diskute dalan sira hodi hametin Ukránia nia parseria estratéjiku Ukránia ho Estadus Unidus.”
Primeiru-Ministru Reinu Unidu, Keir Starmer, ekspresa ninia sentimentu orgullu hodi parabeniza Prezidente Eleitu EUA Donald Trump.
“Parabéns, Prezidente eleitu Trump, ba ita-boot nia vitória istóriku iha eleisaun. Ha’u hein oportunidade atu serbisu ho ita-boot iha tinan hirak tuirmai. Nu’udar ami nia aliadu besik liu, ami hamriik sorin-sorin hodi defende ami nia valór komún sira kona-ba liberdade, demokrasia no empreendedorizmu”.
“Husi kreximentu no seguransa ba inovasaun no teknolojia, ha’u hatene relasaun espesiál entre Reinu Unidu no EUA sei kontinua buras iha parte rua Atlántiku nian iha tinan hirak tuirmai,” nia hatete.
Primeira-Ministra Italianu, Giorgia Meloni, dirije mos nia parabéns sinseru ba Prezidente eleitu Estadus Unidus Amerika.
“Itália ho Estadus Unidus hanesan nasaun maun-alin ligadu hosi aliansa ida ne’ebé la nakdoko, valór komún sira no amizade istóriku ida. Ida-ne’e hanesan lasu estratéjiku ida ne’ebé ha’u iha serteza, agora ita sei hametin liután. Serbisu di’ak, lori ha’u nia naran no Governu Italianu nia naran hato’o parabéns sinseru liu ba Prezidente eleitu”.
Sekretáriu Jerál NATO, Mark Rutte mós kongratula Donald Trump ba nia vitória ne’ebé hetan tanba konsidera katak nia lideransa sei sai fundamentál fali hodi mantein sira nia Aliansa ne’ebé forte.
“Ha’u foin fó parabéns ba Donald Trump tanba nia eleitu nu’udar Prezidente Estadus Unidus nian. Ninia lideransa sei sai krítiku dala ida tan hodi mantén ami nia Aliansa ne’ebé forte. Ha’u hein oportunidade atu serbisu hamutuk fali ho nia hodi promove dame liuhosi forsa NATO nian, ” nia hakerek, iha rede sosiál X.
Prezidente Komisaun Europeia Ursula Von Der Leyen “Fó parabéns ho laran-manas ba Donald J. Trump” enkuantu subliña katak “UE no Estadus Unidus la’ós de’it aliadu sira”.
“Ami iha ligasaun hosi parseria ida ne’ebé loos entre ami nia ema sira, ne’ebé halibur sidadaun millaun 800. Tanba ne’e, ami sei serbisu hamutuk iha ajenda transatlántiku ida ne’ebe forte”, nia hatete.
Iha Portugál, sosialista Ana Gomes maka personalidade dahuluk ida ne’ebé maka halo reasaun, tanba konsidera katak vitória ne’ebé projeta hosi Trump “halo hakribit” no “halo tauk”.
“Ida-ne’e maka’as tebes. Ne’e halo tauk. Maibé to’o ona tempu ba Uniaun Europeia atu hadeer, reajen, defende nia-an hodi defende Ukránia no sai konsistente iha polítika sira ne’ebé bazeia ba prinsípiu no valór umanista sira. Bemvindu, halo diferensa no sai hanesan faru esperansa nian, justisa no igualdade nian”, nia destaka.
Deputada Partidu Sosialista (PS) Isabel Moreira hatete mós, iha rede sosiál X, katak “iha ema barak maka sei sofre vitória ódiu nian”.
Iha ema barak ne’ebé sei sofre vitória ódiu nian rasik. Buat úniku ne’ebé ita tenke halo maka luta. Sempre. Hanesan Demokrata sira.
“Buat úniku ne’ebé ita tenke halo maka luta sempre, luta ba demokrasia hanesan pais demokratiku sira iha mundu,” nia hakerek.
Ministru Negósiu Estranjeiru, Paulo Rangel, hatete, iha antena TSF nian, katak “ami respeita no simu ho laran-haksolok desizaun sira hosi povu Amerikanu.”
Nia mós garante katak “relasaun sira ho Estadus Unidus hanesan relasaun ne’ebe di’ak liu iha área oioin no ami hakarak kontinua parseria ne’e”.
Primeiru-Ministru, Luís Montenegro, kompromete atu dezenvolve kolaborasaun besik iha espíritu relasaun naruk no sólidu entre Portugál no Estadus Unidus.
“Parabéns, Prezidente Donald Trump. Ha’u komprometidu hodi serbisu iha kolaborasaun besik, iha espíritu hosi relasaun naruk no sólidu entre Portugal ho Estadus Unidus, iha nível bilaterál, no multilaterál”, nia hakerek.
Prezidente hosi Partidu Extrema-direita Chega, André Ventura, felisita Trump ba nia vitória ba Prezidente EUA.
“Vitória boot ba Donald Trump iha EUA. Hasoru interese sira hosi sistema ne’ebé estabelese ona, hasoru meiu komunikasaun sosiál tradisionál, hasoru globalizmu despertadu. Amérika muda ohin no nakfilak ba direita. Europa tenki halo hanesan!”, nia hatete.
Donald Trump ho JD Vance hosi Partidu Republikanu eleitu ho votus total 69, 527,189 ekivale 51,,2%, enkuantu, Kamala Harris e Tim Walz hosi Partidu Demokrátiku sofre derrota ho votus 64,172,861 ekivale 47,2%.
Notisia hirak ne’e Média SAP News – Ofisial asesu liu hosi Notisia ao Minuto hosi Portugal no Sky News Australia.
Jornalista : Conzita Mota & Marciana Conceição