Imajem : Boxista Daniel Assis Belo no Treinador El-Matador Abílio Orlando dos Santos iha Aeroportu Nicolau Lobato, 20/05/2025
SAPNewsTL, Dili : Hafoin manan iha eventu Holy Wings Sports Show (HSS) ne’ebe hala’o iha Bali-Indonésia, Boxista timoroan Daniel Asis Belo hateten vitória ne’ebe hetan dedika ba loron restaurasaun independénsia Timor-Leste ba dala XXIII.
Ermelinda Soares & Daniel da Silva – SAPNews
Boxista Daniel Asis Belo husi El-Matador Boxista Club manan Krispinus ho Valor 116-112 tanba hatudu performánsia diak iha ring leten liu hosi halo defeza no tuku makaas durante jogu Atlas Super Club Bali.
“Sentimentu kontente no agradese ba El-Matador no treinardor sira hotu ne’ebe durante ne’e fo treinu to’o ohin loron, ha’u bele hetan vitoria. Vitória ne’ebe ha’u hetan dedika ba loron restaurasaun independénsia Repúblika Demokrátika Timor-Leste ba dala-23, loron ohin nian”. Hateten Boxista Daniel Asis Belo iha Aeroportu Internasionál Nicolau Lobato Comoro, 20/05/2025
Daniel hatutan, “primeira vez ha’u hasoru boksista ne’ebe makaas no forte, ha’u hanoin ida ne’e sai esperiensia ba ha’u atu prepara an diak no hadia an diak no dixiplina diak iha mundu boxing nian no sai boksista ne’ebe diak iha futuru oin mai”. Nia afirma
Treinador El-Matador Boxing Club, Abilio Orlando dos Santos hateten Matador fo obrigadu ba povu Timor-Leste ne’ebe fo orasaun no suporta ona ekipa El-Matador hodi hetan tan vitória.
“El-Matador agradese ba parte hotu ne’ebe durante ne’e apoiu El-Matador, imi hotu nia apoiu no orasaun maka ohin loron ami nafatin iha no atividade sira kontinua la’o to’o agora”.
“Ami iha komprimisiu ida ne’ebé antes, ita nia boksista Daniel nia vitoria ne’e hanesan sai vitoria ida ba independénsia 20 Maiu ba dala 23”.
Imagem : Daniel Assis Belo iha Bali, 18/05/2025
Ligadu ho dezentendimentu ne’ebe mosu iha jogu HSS, treinador klarifika mosu desintendimentu tanba sira-nia parte la simu rezultadu, nune’e sira rasta Bandeira Timor-Leste maka ekipa El-Matador halo asaun hasoru sira.
“Dezentendimentu iha ne’eba, los duni katak bainhira ita nia boksista Daniel sai manan na’in ba eventu HSS, sira nia parte la simu ba iha realidade ida ne’e, sira koko atu rasta ita nia Bandeira ne’e mak ami mos halo asaun hasoru sira”.
“Timoroan hotu sei la fo ulun ba ema ida atu rasta ita nia Bandeira Timor nian tanba ne’e dignidade nasaun nian, ita tenke luta ba ita nia Bandeira ida ne’e”.
“Iha momentu ne’eba iha reasaun maibe hotu husi ne’eba ami konsege resolve no parte rua ne’e diak malu kedas iha ne’eba”.
“Vitória ne’e, ita nia Boksista Deniel Asis Belo hetan medalha ida, ne’e vitoria Timor nian, dedika ba loron restaurasaun independénsia Repúblika Demokrátika Timor-Leste ba dala-23”.
Daniel Belo hanesan boksista potensial no sai ona kampiaun ba dala 3 iha HSS, El-Matador no treinador sira fiar katak iha futuru sei mantein nafatin ho rezultadu ne’ebe maka pozitivu ba ita-nia rain.
Eventu Holy Wings Sports Show (HSS) ka Holywings Sport Night ne’e hala’o iha Bali, Indonésia iha loron 18 Fulan Maiu tinan 2025.