Imajem : Presidente PDC Francisco de Araujo iha Munisipiu Manufahi, 21/04/2023
SAPNewsTL, Manufahi : Prezidente Partidu Democrata Cristão (PDC) Francisco de Arauju hateten, PDC sei halakon Programa Sexta Baziku tanba programa sexta Bazika ne’e la fo benefisiu ba povu iha area rural,
“Partidu PDC iha Programa atu halakon Sexta Baziku ne’ebe la fo benefisiu diak ba povu iha area rural sira, tanba ne’e mak ita hakarak sexta Baziku ne’e halakon tiha hodi fo de’it orsamentu tuir ema ida-idak nian, nune’e komunidade rasik jere tuir sira nia direitu atu bele sosa sasan no nesesidade ne’ebe sira persija”. Dehan Prezidente PDC Francisco de Arauju liu husi Mini kampaña iha Aldeia kakeu–Laleletek suku Taituda Postu Administrativu Alas Munisípiu Manufahi, 21/04/2023
Presidente PDC fundamenta Sexta Baziku ne’ebe 50 dolar pois komunidade sira simu 25 dolar, signifika 25 dolar ne’e lakon tiha de’it, tanba osan ne’ebe gasta ba programa sexta Baziku nia folin la to’o 30 ou 40 dolares
“Ita hola fos saku ida karik ita hiit sa’e labele maibe Sexta Baziku, ita hiit ki’koan ne’e ita bele hiit sa’e, sasan ne’ebe komunidade sira simu la tuir orsamentu ne’ebe mak gasta ba programa sextu baziku, signifika ita hatene katak buat ne’ebe tau iha laran ne’e nia folin ne’e la to’o 30 dolares ou 40 dolares mos la to’o signifika ita halo programa ne’e habokur no hariku deit kompanha sira”. nia kestiona
Lider PDC ne’e hatutan, durante ne’e osan la fo ba povu sira hodi jere rasik, hare katak buat ne’ebe povu iha sei lori fila fali povu mak han nafatin, hola buat ne’ebe mak ki’ik maibe fo ba povu ho folin ne’ebe mak bo’ot signifika habokur ema ida ga rua nia hakarak.
“Di’ak ida ita halo programa sira hanesan ne’e habokur ema ida pois ita hatene katak se fo ona ba kompania ida sira sei buat ida kontratu iha kotuk ne’e iha, ha’u la fiar ema ne’ebe simu pois nia la fo porsentu ruma ba ema ne’ebe hetan projektu ne’e signifika ita gasta osan estadu tuir ita nia hakarak, tuir PDC nia hakarak se ita kontinua mak ne’e ita fo direta osan povu mak jere no povu hakarak sosa saida nia hakarak sosa naan nia prejisa sosa saida la presija ita fo tutan fali ba ema seluk mak atu jere ida ne’e signifika ita gasta osan estadu la tuir nia dalan.” Haktuir Prezidente PDC
Nia mos afirma, wainhira PDC hetan konfiansa husi povu maka sei hamosu programa foun no PDC sei defende kumunidade ne’ebe seidauk hetan asesu ba eletrisidade, moderniza setor agrikultura, no desenvolve setor turizmu hodi hasa’e rendimentu ba populasaun sira inklui kria kampu servisu hodi ba dezempregu sira
Imajem : Militante PDC iha Manufahi, 21/04/2023
Iha fatin hanesan, Vise Adejuntu Sekretáriu Jeral Manuel Camiliu Sarmento reforsa liu tan katak, Partidu hamrik metin duni, iha PDC ko’alia klaru katak joven barak mak sei vota ba PDC.
“Tanba la’os foin partidu hari’i mak ha’u ransu ho sira maibe loron bailet ami hamutuk iha ne’e, Ha’u konkorda iha Postu Administrativu Alas, PDC sei metin liu tan, ha’u apela ba juventude tomak hodi hili PDC, nune’e bele hadia povu nia moris no lori mudansa ba povu nia moris.”Hakotu Nia.
Entretantu,Mini kampanha ne’ebe PDC realiza iha Aldeia kakeu–Laleletek Suku Taituda Postu Administrativu Alas Munisípiu Same ne’e hetan supervisiona husi Centru Nasionál Eleisoens (CNE) no mos Militantes husi Partido Democrata Cristão
Jornalista : Lidia Amaral