Imajem : Komunikadu Imprensa hosi Partidu Koligasaun entre PD- CNRT iha CCD, 03/10/2024
SAPNews TL, Díli — Garante governasaun entre Partidu Congresu Nasionál Rekonstrusaun Timorense (CNRT) ho Partidu Demokratiku (PD) to’o mandatu remata, Primeiru-Ministru Kay Rala Xanana Gusmão hala’o reuniaun ho membru Parlamentu sira husi bankada Governu hodi konsolida no asegura estabilidade governativa.
Tuir Komunikadu Imprensa ne’ebe redasaun SAPNews asesu, Portavós António da Conceição informa katak, objetivu husi reuniaun ne’e atu foka ba pontu importante sira ne’ebe, sai baze fundamentu, atu hametin liu tan governasaun entre partido CNRT no PD.
“IX Governu Konstitusional entre CNRT no PD ne’ebe lidera husi Primeiru Ministru Maun Boot, Kay Rala Xanana Gusmão, hala’o reuniaun ho membru Parlamentu sira husi bankada governu nian, Objetivu oinsa hametin governasaun entre partidu rua (2),” Informa António da Conceição liu hosi komunikadu imprensa, ne’ebe hala’o iha Centru Convençoens Díli, Sexta ( 03/10/2024)
Tuir deklarasaun liu husi Komunikadu Imprensa sita katak objetivu prinsipal husi sorumutu entre Partidu CNRT no PD, Primeiru-Ministru Kay Rala Xanana Gusmão hala’o reuniaun ho membru Parlamentu sira husi bankada Governu nian, deskreve pontus sira tuir mai ne’e.
1. Konsolida hodi hametin liu tan entre relasaun partido CNRT no PD atu asegura estabilidade governativa IX governu konstitusional to’o mandatu remata too 2028.
2. Membru Governu no Membru Parlamentu halo avaliasaun hamutuk haree ezekusaun OGE 2024 no identifika dezempenu ne’ebe seidauk masimu no buka atu hadiak liutan ba 2025 no kontinua dezempenu diak atinji ona iha 2024.
3. Membru governu sira aprezenta programa asaun ne’ebe reflete iha orsamentu jeral estadu 2025 ba membru parlamentu husi bankada governu, nune’e membru parlamentu iha intendimentu diak iha OGE 2025 no prepara ba proposta OGE 2025 iha parlamentu nasional iha tempu besi.
4. Hametin koordenasaun servisu entre membru governu sira atu implementa ho diak planu no programa anual ba tinan 2025.
5. Reuniaun ne’e mos deside atu selu dívidas husi governu uluk maibe nafatin halo auditória ba ezekusaun orsamentu jeral estadu governu uluk niań.
6. Nonu Governu promete atu kontrola ezekusaun orsamentu ba instituisaun estadu hotu hotu, IX governu mós selebra ona kontratu autoridade auditoria internasional no halo daudaun auditoria, reunião ne’e mós deside atu halo auditoria ba instituisaun públika sira hotu hodi evita irregularidade tamba Osan povu nian.
7. Ikus Maun Boot Kay Rala Xanana Gusmão hanesan Presidente partido CNRT hamutuk ho Prezidente Partido Democrático kompaneru Mariano Assanami Sabino husu ba membru governu no bankada governu iha parlamentu nasional, IX governu mai Laos atu ukun maibe mai atu servi rai doben Timor-Leste.
Entretantu, reuniaun ne’e partisipa husi membru koligasaun demokratika XI Governu Konstitusional entre CNRT-PD, Deputadu husi bankada Governu no membru IX Governu Konstituisional sira, iha ne’ebé diskute mós kona-ba Orsamentu Jeral Estadu (OJE) 2025 no Hametin koordenasaun servisu entre membru governu sira atu implementa ho diak planu no programa anual ba tinan 2025.
Enkuantu, Nonu governu konstituisionál forma governu iha tinan 2023, governante sira simu tomada de posse husi Prezidente Repúblika José Ramos Horta iha loron 01 Fulan Jullu 2023.
Fo hanoin fali katak, Governu prevé ona Orsamentu Jeral Estadu tinan 2025 hamutuk billiaun 2.6 no submete ona ba Parlamentu Nasionál ne’ebé sei halo debate no aprovasaun.
Jornalista : Guilhermino Ramos da Cruz