Imajem : MCI Nino Pereira iha Eskritoriu MCI, 3rd Floor, Tersa, 17/06/2025
SAPNewsTL, Dili : Ministériu Komérsiu no Indústria (MCI, sigla Portugés) lansa programa “Dalan ba Negosia”, Kompetisaun Negosiu Inovativu (KNI) ba dala-V, Ministru Komersiu no Industria Nino Pereira hateten, lansa programa refere hodi apoiu mikropekena medias imprenza, oinsa hasa’e kompetividade merkadu lokal, nasional no Internasional.
Angelina da Costa & Anastacia Dita – SAP News TL
“Ohin, lansa programa ba negosiu ho modalidade kompetisaun negosiu inovativu hanesan atividade ne’ebe atu apoiu ba mikropekena medias emprensas liu-liu ba empreza lokal hala’o husi timoroan ho idade produtivu”.
“Negosiu foun no negosiu sira ne’ebe estabelesidu ho ideia ne’ebe inovasaun no kreatividade ne’ebe iha produtu ho servisu ne’ebe halo ona hodi hasa’e kompetividade merkadu lokal, nasional no posiblidade ba iha merkadu global ka internasional”. Dehan Ministru Komersiu no Industria Nino Pereira ba jornalista sira iha Eskritoriu MCI, 3rd Floor, Tersa, 17/06/2025
Ministru Komersiu no Industria Nino Pereira hateten, objetivu programa dalan ba negosiu hodi fortifika kapital investimentu makina no ekipamentu ba empreza foun ne’ebe eziste hodi mellora produsaun ne’ebe efisiente ho kualidade no kuantidade aas.
“Objetivu prinsipal husi dalan ba negosiu hodi fortifika kapital investimentu makina no ekipamentu ba empreza foun ne’ebe eziste mellora prosesu produsaun ne’ebe efisiente liu ho kualidade no kuantidade ne’ebe aas, hasa’e kompetividade ba merkadoria, garantia sustentabilidade produsaun no komersializasaun ne’ebe hamosu joven emprendedor ne’ebe kompetente no inovativu”. Nia subliña.
Nino Pereira akresenta, programa ne’ebe implementa iha espektativa sei lori benefisiu ba joven vendedor ne’ebe kria kampu traballu ba sira nia aan rasik no ba ema seluk hodi hasa’e produtividade joven, rendimentu ekonomia familia no nasaun.
“Wainhira haree implementasaun programa ne’e ninia impaktu iha espektativa implementasaun sei lori benefisiu ba joven vendedor sira ne’ebe ita dehan kriasaun kampu traballu ba aan rasik no mos ba ema seluk, hasa’e produtividade joven no hasa’e rendimentu ekonomia familia no nasaun substituisaun ba produtu importasaun no kriasaun kadeia de valor”.
Nia informa, programa dalan ba negosiu ho modalidade negosiu inovativu ne’ebe ohin sira lansa hahu loke ona aplikasaun ba joven sira ne’ebe iha ideia inovativu hodi aplika.
“Wainhira impleta programa dalan ba negosiu ho modalidade negosiu inovativu ne’ebe hahu ohin ho lansamentu ne’e hahu loke ona aplikasaun ne’ebe joven sira iha ideia inovativu ba negosiu ne’ebe iha kreatividade oin-oin bele aplika hodi tuir kompetisaun ne’ebe sei taka iha loron 04 fulan Jullu”.
Aplikasaun programa dalan ba negosiu ho modalidade negosiu inovativu ne’ebe sei taka iha loron 4 fulan Jullu, Ministru Komersiu Industria Nino Pereira esklarese, sei prolonga tempu karik sei iha antusiasme husi aplikante ne’ebe hakarak aplika.
“Ami mos sei haree karik antusias barak sei tetu hodi bele prolonga tan tempu ba inskriasaun nian, depois sei iha tan sensiblizasaun fahe informasaun ne’ebe planea iha loron 23 to 25 fulan ida ne’e, depois sei iha tan faze ne’e ba seleksaun dokumentus, enkontru komisaun diretiva ne’e iha fulan jullu iha loron 09 to 11”.
Parte kompetente sei vizita fatin negosiu sira hodi verifika fatin sira ne’e eziste duni ka lae, hafoin sei anunsiu rezultadu ba faze akampamentu depois sei kontaktu kandidatu sira ne’ebe tama ona iha faze refere.
“Sei iha mos vizita ba fatin negosiu iha fulan jullu loron 04 to 16, iha dia 18 de jullu ne’e sei anunsiu rezultadu ba faze akampamentu depois hahu husi 21 to 23 jullu ne’e kontaktu no konfirma kandidatu ne’ebe tama ona faze akapamentu”.
Nia hatutan, “Iha fulan julhu 28 to’o 30 agustu ne’e implementa faze akapamentu, kontinua mos iha loron 04 jullu, aprezentasaun final, kandidatu sira sei demostra sira nia kapasidade oinsa bele haree katak sira nia negosiu ne’e viavel duni, hafoin sei simu apoiu iha ne’eba”.
“Fulan Agustu loron 14 sei assina kontratu e simu mos fundu ou ekipamentu, depois Ministeriu Komersiu Industria kontinua halo akompanhamentu iha faze inkovasaun negosiu no haree katak negosiu la’o ho susessu to’o faze ida ne’e mak foin halo graduasaun”.
Nia fiar katak joven ne’ebe iha interese liu-liu iha espiritu emprendedorismu ne’ebe hakarak transforma ba moris emprezarial, dalan ba negosiu nakloke no espera bele hetan oportunidade.
Ministru ne’e fiar katak joven sira ne’ebe iha interese liu-liu sira ne’ebe iha espiritu emprendedorismu no hakarak transforma aan ba moris empresarial, dalan ba negosiu nakloke no espera katak bele hetan oportunidade mai halo registu no hatudu kapasidade liu husi eventu ne’e.
Nino Pereira salienta, sira sei fó apoiu fundu orsamentu ba kada programa iha 200.000 hodi finansia atividade dalan ba negosiu.
“Ministériu Komersio Industria sei fo apoiu fundu ba programa ne’e iha orsamentu sempre temi beibeik por programa tau iha 200 mill ne’ebe atu finansia aktividade dalan ba negosiu kompetisaun inovativu”.