Imajem : Bibi-Rusa ne’ebé susar ba bee no hahan iha Jaco,20/11/2024. Foto : Dircia Baptista Belo
SAPNewsTL, Lautém – Relasiona ho balada sira ne’ebé susar ba bee no hahan iha illa Jaco ka Totina, Lekirauk fo han bibi-rusa tan ne’e iha posibilidade bele muda sira ba parke nasionál Nino Konis Santana.
Xefe Suku, Bauru Florindo Miranda hateten, suku ne’ebe sofre ba problema mudansa klimátika, implika ba sobrevivénsia fauna no flora iha area protezida Parke Nasionál Nino Konis Santana liuliu iha iha Illa Jaco, banhira tempu bailoron naruk.
“Mudansa klimátika afeita tebes ba animal protejida sira iha ai-laran liliu ba Rusa fuik, Meda, Kakatua, Loriku, Lekirauk, sai afeitadu iha Parke Nasional ne’e.” Dehan Xefi Suku Bauro Florindo Miranda, ba Jornalista sira iha Nia kna’ar fatin, Segunda, (18/11/2024)
Imajem : Xefe Suku Bauro Florindo Miranda
Xefi Suku ne’e salienta, iha loron hirak liu ba suku sira ne’ebe pertense ba Parke Nasional enkontru ho diresaun Floresta atu kaer rusa iha Jaco lori fali mai pertense ba Parke Nasional hodi nune’e bele proteze animal hirak ne’e.
Iha sorin seluk, Peskador Emilio dos Santos hateten atu muda animal sira ne’ebé iha Totina/Kotu la hanesan ho balada sira seluk, bainhira atu muda presiza haree didiak.
“Animal iha ne’e atu muda tun sa’e ne’e, ha’u hanoin buat ne’ebe bele ba iha ne’ebá, ne’e katuas sira balun bele aseita ka lae, depois animal iha ne’e laos animal hanesan babain husi uma ne’ebá”.
Peskador Emilio dos Santos
“Iha ne’e tempu ida ne’ebe hanesan bailoron boot ida bainhira sira mate husi tasi laran ikan mak sai fila an ba animal iha ne’e, tempu iha ne’e aserta liu ona populasaun barak liu iha ne’e haree mak animal rusa ho meda sira ne’e mak fila an sai ba ikan iha tasi laran”. Peskador ne’e sublinha
“Animal iha ne’e manu, rusa, meda kuandu tempu sira fila an ba ikan iha tasi laran, ikan presiza liu hahán iha ne’e sira sei fila an mai iha rai maran ne’e husi avo sira hateten to’o mai agora”. Nia hateten
Peskador ne’e informa, durante tinan 2024, ema seidauk lori bee ba ense profil, entaun rusa sira iha ne’e susar tebes ba bee wainhira hamrok hodi rezulta rusa sira sai krekas.
“Rusa sira krekas hotu ne’e servisu parte guarda floresta nian maibe durante tinan 2024 ne’e ema seidauk lori bee mai iha ne’e, Ha’u peskador iha ne’e, momentu 2023 mak lori mai, bee mós lori husi ne’ebá mai”.Nia informa
Iha fatin hanesan, Tito da Costa informa wainhira vizitante sira lori bee no hahan mak rusa sira bele maus no hakbesik an tanba ih/a ne’e sira susar ba bee no hahan.
“Ha’u haree risa mai hasoru ita ne’e, ita lori hahan ai-tahan ka bee rula mak sira kmaus no besik ita, wainhira la lori bjat ida sira hadok an, tanba tinan barak ona ema lori bee no hahan mai, entaun sira toman ona ida ne’e”.
“Ami fornese nafatin bee ba animal, ita bele kuda ai-tahan ka duut hodi sustenta sira mais agora bee laiha tanba tempu bai-loron naruk, ita bele kuda mós nia la moris, iha Janeiru 2024, Sekretariu Estadu Kooperativa mai kuda batar Kayrala iha ne’e maibé la moris tanba iha ne’e bee laiha ne’e”.
Guarda Floresta Tito da Costa
Tito akresenta, iha animal barak nekebé kokaliza iha Jaco, maibe bibi-rusa mak susar tebes ba hahan, dala barak lekirauk mak fo han bibi-rusa.
“Lor-loron ha’u mai iha ne’e, animal sira ne’e iha bibi-rusa, lekirauk, meda,manu-fuik no loriko, hahan ba animal sira seluk iha, bibi-rusa nian mak laiha, ha’u haree baibain bibi han ai-tahan ne’ebé hatun hosi lekirauk sira iha leten, bibi-rusa han fali iha kraik, ha’u haree lekirauk fo han fali ita nia bibi-rusa”.Tito informa
Enkuantu, kobertura ne’e SAPNews halo durante loron rua (19-20/11/024) liu hosi programa media tour ne’ebé organiza hosi Timor-Leste Press Union (TLPU) no hetan apoia hosi Sekretariu Estadu Komunikasaun Sosial (SEKOMS).
Jornalista : Dircia Baptista Belo