Imajem : Papa Leão XIV
SAPNewsTL : Papa Leão XIV sita “Gaudium et spes” Konsíliu Vaticano II nian, hodi hanoin hikas katak “Maromak nia Oan-Mane revela an mai ita liuhusi matan konfiante labarik ida nian, nune’e hatudu mai ita modelu umanidade santa nian ne’ebé ita hotu bele banati tuir”.
“Konfia mós mai ha’u, atu nune’e ha’u bele sai administradór fiel ida hodi favorese Korpu Místiku tomak Igreja nian, bele sai hanesan liután sidade ida ne’ebé hari’i iha foho leten (kf. Apok 21,10), arka salvasaun nian ne’ebé semo liuhosi laloran istória nian”.
“Farol ida ne’ebé fó naroman ba kalan nakukun no mundu ida-ne’e la’ós tanba grandeza boot ninia estrutura sira, maibé tanba ninia membru sira-nia santidade”. Hateten Papa Leão XIV iha nia omilia dahuluk iha Kapela Sistina, 09/05/2025
Fila fali ba epizódiu bíbliku ne’ebé konta iha Mateus, Leão XIV mós reflete kona-ba Jesus nia resposta ba Pedro, bainhira nia dehan “Ema dehan Oan-Mane ne’e sé?”
Papa Leão XIV dehan ida-ne’e iha relevánsia boot ohin loron nian, tanba iha interpretasaun posivel rua. Ida uluk maka ida ne’ebé identifika Jezús nu’udar ema ida ne’ebé laiha importánsia, iha másimu personajen kuriozu ida, hanesan abitante sira Sezareia Filipe nian halo.
Resposta seluk ne’ebé posivel mak ema baibain nian, ne’ebé haree Jesus la’ós nu’udar ema ne’ebé loos, aten-barani ne’ebé hateten justisa, maibé sira konsidera nia nu’udar ema de’it tanba ne’e, iha momentu sira perigu nian, durante paixaun, sira abandona nia.
“Ohin mós, iha kontestu barak iha-ne’ebé fiar sarani konsidera nu’udar buat absurdu ida, ne’ebé destina ba ema fraku no la matenek sira;kontestu sira iha-ne’ebé seguransa sira seluk prefere ba ida-ne’e, hanesan teknolojia, osan, susesu, podér no ksolok.”
“Loos duni, la’ós de’it ho ha’u, maibé ho ita hotu. Ha’u nia maun-alin kardeál sira, bainhira ita selebra ohin dadeer, ha’u konvida imi atu reflete kona-ba milagre sira ne’ebé Na’i halo ona, bensaun sira ne’ebé Na’i kontinua fakar mai ita hotu liuhosi Pedro nia serbisu”.
“Na’i bolu ha’u atu lori krús ida-ne’e no atu hala’o misaun ida-ne’e, no ha’u hatene katak imi ida-idak nia misaun kontinua la’o hamutuk ho ha’u nu’udar Kreda, nu’udar komunidade belun Jezús nian, nu’udar fiar-na’in atu haklaken Liafuan Di’ak, haklaken Evanjellu”. Hateten Papa Leão XIV
Papa Leão XIV reflete kona-ba fraze ne’ebé Simão Pedro dirije ba Jezús, ne’ebé kontein iha kapítulu 16 Evanjellu Mateus nian: ‘Ó mak Kristu, Maromak moris nia Oan-Mane’”.
Amu-Papa ne’ebé foin eleitu ne’e esprime iha sumáriu patrimóniu ne’ebé Kreda prezerva, hakle’an no tranzmite durante tinan rihun rua liuhusi susesaun apostólika. Ho liafuan seluk, Jezús mak Maksoin úniku no reveladór Aman nia oin.
Ne’e mak ambiente sira iha-ne’ebé la fasil atu fó sasin ka haklaken Evanjellu, iha-ne’ebé sira ne’ebé fiar hetan sira-nia an hetan ridíkulu, kontra, desprezu, ka, iha máximu, tolera no laran-susar.
Maibé, justamente tanba razaun ida-ne’e, sira-ne’e mak fatin sira iha-ne’ebé misaun sai urjente, tanba falta fiar nian dala barak lori ho nia drama sira hanesan lakon sentidu moris nian, haluha mizerikórdia, violasaun ba dignidade ema nian, krize família nian no kanek barak seluk tan ne’ebé ita-nia sosiedade sofre, no la uitoan.
“To’o ohin loron, la falta kontestu sira iha ne’ebé Jesus, maski hetan apresiasaun nu’udar ema, simplesmente redús ba espésie ida líder karizmátiku ka superman, no ida-ne’e la’ós de’it entre sira ne’ebé la fiar, maibé mós entre ema batizadu barak ne’ebé ikus mai moris iha nivel ida-ne’e, iha ateízmu prátiku.”
Liafuan sira-ne’e, fó hanoin fali kompromisu irrevogavel ida ba sira ne’ebé ezerse ministériu autoridade nian iha Kreda:atu lakon, Kristu bele hela nafatin, halo an ki’ik atu ema bele koñese no fó glória ba Nia, gasta an to’o limite atu ema ida labele husik lahó oportunidade atu koñese no hadomi Nia.
“Maromak haraik mai ha’u grasa ida-ne’e, ohin no nafatin ho Maria Kreda nia Inan nia intersesaun laran-sadia nia tulun.”
Jornalista : Marciana da Conceição