Imajem : Papa Leão XIV iha Praça São Pedro Vaticano, 08/06/2025. Foto : Vatican News
SAPNewsTL, Vatikanu: Durante misa solenidade Pentekostes nian, Amu-Papa Leão XIV hatetefronteira sira ne’ebé sei loke hosi iis divinu maka “iha ita-nia laran, iha ita-nia relasaun entre povu sira”.
Marciana Da Conceição Jurnalis – Sapnews Media / Fontes – Vaticano News
Amu-Papa nia pedidu invoka “Espíritu domin no dame nian” hodi hasoru Maromak no “loke fronteira, sobu didin sira no halakon ódiu”: “pentekostes mak hafoun Kreda no hafoun mundu!” Dehan Papa Leo XIV iha Prasa São Pedro, Vaticano, 06/08/2025. Sitasaun husi Notísia Vatikanu
Papa Leão XIV prezide misa ba peregrinu rihun ba rihun no reflete kona-ba Espíritu ne’ebé “loke fronteira” iha ita-nia laran, iha ita-nia relasaun no entre povu sira.
Omilia Susesór foun Pedro nian sai hanesan impulsu boot ida atu loke “fronteira fuan nian” liuhusi “anin maka’as Espíritu Santu nian” no mós ho lembransa ba ninia antesesór Bento XVI no Francisco nian.
Loron solene iha Vatikanu hahú ho paseiu papemóvel ida ne’ebé dura besik minutu 30: Leão XIV hala’o viajen tantu liuhosi Prasa S. Pedro no parte ida hosi Via della Conciliazione hodi kumprimenta sarani rihun ba rihun.
Loke fronteira sira iha ita-nia laran
Iha ninia omilia no liuhusi Saun Agostinho nia liafuan sira, Amu-Papa fó hanoin katak ida-ne’e mak loron ne’ebé, “depois de nia Moris-Hi’as no depoizde glória ninia Ascensaun nian, Jezús Kristu Ita-nia Na’i haruka Espíritu Santu” (S. Agostinho, Sermón 271, 1)”.
Don ida ne’ebé “halo buat ne’ebé estraordináriu iha Apóstolu sira nia moris”, tulun atu interpreta Jezús nia mate no fó ba sira forsa no korajen atu “sai ba hasoru ema hotu no haklaken Maromak nia obra sira”.
Iha festa Pentekostes nian, Leo hanoin hikas iha Bento XVI nia liafuan iha tinan 2005, odamatan kuartu leten nian nakloke tanba Espíritu loke fronteira sira. No husi ne’ebé Pontífise hahú ninia meditasaun ba loron ne’e:
“Espíritu loke fronteira sira, liuliu iha ita-nia laran. Ne’e maka Don ne’ebé revela ita-nia moris ba domin. No Na’i nia prezensa ida-ne’e halakon ita-nia toos, ita-nia taka-an, ita-nia egoízmu, ta’uk sira ne’ebé trava ita no narsisizmu ne’ebé halo ita nakfilak de’it iha ita-nia an rasik”.
“Espíritu Santu mai atu dezafia ita hasoru risku moris ida ne’ebé atrofia, maran hosi individualizmu. Triste atu haree oinsá, iha mundu ida ne’ebé oportunidade sira ba sosializasaun aumenta, ita halai risku atu sai paradoksalmente mesak liután, sempre iha ligasaun maibé labele halo ‘rede’, sempre mergulha iha ema lubun nia leet maibé nafatin mesak no viajante sira.”
Maromak nia Espíritu, envezde, “loke ita ba enkontru ida ho ita-nia an rasik, liu fali máskara sira ne’ebé ita uza; lori ba enkontru ida ho Na’i”, Amu-Papa afirma. Hodi hakuak Liafuan ho domin, ita “transforma” hosi nia, hodi halo ita-nia moris sai “espasu ida akollimentu nian”.
Iha ninia omilia, Leão XIV reflete kona-ba Iis Divinu ne’ebé loke baliza fuan nian.
“Espíritu, liután loke baliza sira iha ita-nia relasaun sira mós”. No ho ida-ne’e duni “domin Maromak nian ne’ebé hela iha ita-nia laran, ita sai kapas atu loke ita-nia an ba ita-nia maun-alin sira, atu manán ita-nia rigidez, atu manán ita-nia ta’uk ba buat ne’ebé diferente”, Pontífise hatete.
Espíritu transforma “perigu sira ne’ebé subar liu ne’ebé estraga ita-nia relasaun sira, hanesan dezentendimentu sira, prejuizu sira, esplorasaun”:
“Ha’u mós hanoin – ho laran-susar maka’as – kona-ba bainhira relasaun ida hetan infestasaun hosi hakarak atu domina ida seluk, atitude ida ne’ebé dala barak lori ba violénsia, hanesan kazu barak no resente sira kona-ba femisídiu infelizmente hatudu.”
Espíritu Santu, iha sorin seluk, “halo tasak iha ita ai-fuan sira ne’ebé tulun ita atu moris relasaun loos no di’ak”, habelar baliza ita-nia relasaun ho ema seluk.
Leão XIV alerta katak “ida-ne’e mós krusiál ba Kreda: ita só loloos Kreda Ida-ne’ebé Moris-Hi’as nian no dixípulu sira Pentekostes nian, se la iha fronteira ka divizaun sira entre ita, se iha Kreda ita hatene diálogu no simu malu hodi integra ita-nia diferensa sira, no se nu’udar Kreda, ita sai espasu akollidu no ospitaláriu ba ema hotu”.
Loke fronteira sira entre povu sira
Ikusmai, “Espíritu mós loke fronteira entre povu sira”. Iha Pentekostes, Pontífise hatete, ita hanoin hikas importánsia atu hahú “iha viajen”, “iha fraternidade”, tanba “Iis divinu halibur ita-nia fuan sira no halo ita haree iha ema seluk maun-alin ida nia oin”: envezde divizaun no konflitu, prejuizu no lójika eskluzaun nian, diskordánsia no indiferensa nian, hanesan Francisco observa iha 2020 “hamonu Espíritu fronteira sira no sobu muru sira indiferensa no ódiu nian”, hanesan funu sira rasik, ba “rikusoin komún ida”:
“Mai ita invoka Espíritu domin no dame nian, atu nia bele loke fronteira sira, sobu moru sira, halakon ódiu no tulun ita atu moris nu’udar oan sira husi Aman ida de’it ne’ebé iha lalehan.”
“Maun-alin sira: Pentekostes mak hafoun Kreda, hafoun mundu! Anin maka’as Espíritu nian tun mai ita no loke fronteira sira ita-nia fuan nian iha ita-nia laran, haraik mai ita grasa enkontru nian ho Maromak, habelar orizonte domin nian no sustenta ita-nia esforsu sira atu harii mundu ida iha-ne’ebé ukun dame.”