Imajem : Tenente Jeneral Lere Anan Timur, iha Kuartel Jeral Fatuhada Dili,20/08/2024. Foto : Conzita Mota
SAPNewsTL, Dili – Durante komemora loron Forsa Armada Libertasaun Nasionál Timor-Leste (FALINTIL) ba dala XLIX, Tenente Jeneral Lere Anan Timur haktuir Frente Revolusionáriu Timor-Leste Independente (FRETILIN) mak muda ba FALINTIL.
Tenente Jeneral Lere Anan Timur parabeniza fundador no membru FALINTIL sira ne’ebe luta durante tinan-24, tanba husi sira nia terus, fakar ran no mate maka Timor-Leste hetan ukun rasik an.
“Ohin 20 Agostu, loron FALINTIL ba dala-49, loron rezisténsia FALINTIL nian, parabens ba fundadores FALINTIL no membru ne’ebe luta durante tinan 24, gloria no onra ba sira ne’ebe mate no parabéns ba sira ne’ebe sei moris”. Tenik Tenente Jeneral Lere Anan Timur ba jornalista sira iha kuartel jeral fatuhada, 20/08/2024.
Lere Anan hatutan, FALINTIL nu’udar liman kroat povu maubere nian iha tempu funu nia laran, sira mak forsa povu nian.
“FALINTIL uluk iha tinan 24 nia laran (1975-1999), sai liman kroat povu maubere nian, FALINTIL luta mesak iha ai-laran, haka’as aan hodi buka kilat no ai-moruk husi sira nia esforsu rasik. Tinan rua-nulu (20) resin ema haluha ami iha ai-laran maibe ho povu nia forsa, ohin balun sei moris hodi haree ita nia ukun rasik aan”.Nia dehan
Aswa’in funu na’in ne’e konta, FRETILIN mak muda ba FALINTIL, hafoin ukun an FALINTIL transforma ba Forsa Defeza Timor-Leste.
“Uluk ita ko’alia FALINTIL, tanba FRETILIN mak muda ba FALINTIL, durante tinan 24 nia laran ita bele dehan FALINTIL luta mesak iha ai laran, hakas an, halo tun no halo sa’e, buka kilat atu bele sobrevive, buka hahan hodi bele tahan an, buka ai-moruk hodi kura an no halo buat hotu husi nia esforsu rasik, depoisde ukun rasik an FALINTIL transforma ba Forsa Defeza Timor-Leste nu’udar liman kroat povu maubere nian nafatin”. Lere Anan Timur hateten
Prinsipiu FALINTIL nian maka povu sai hanesan be’e no FALINTIL sai hanesan ikan, rua ne’e labele haketak malu, tan ne’e husu ba F-FDTL hamutuk esforsu hodi serví no hadomi povu.
“Povu maka bee, FALINTIL mak ikan, entaun moris nafatin tama iha situasaun difisil, tanba ne’e FALINTIL transforma ba Forsa Defeza Timor-Leste iha loron 2 Fevereiru 2000, katak F-FDTL sai forsa ne’ebé profesional, kualifikadu no forte hodi defende povu no nasaun”.
Lere Anan husu ba joven hirak ne’ebe sai ona membru F-FDTL tenki hatene hadomi no respeitu malu, hadomi inan aman sira, hadomi povu no nasaun ne’e.
“Jerasaun foinsa’e sira ne’ebe sai forsa, imi maka lutu no liman kroat nasaun nian, imi tenki hatene hadomi no respeitu malu, imi tenki hadomi no respeita uluk ita nia inan aman sira, hafoin hadomi povu no nasaun”. Nia sublinha
Iha sorin seluk, Veteranu Celestino de Carvalho Alves hateten, nia parte sente kontente bele partisipa iha loron FALINTIL, maske hasoru sofrementu barak iha tempu funu nia laran.
“Ami hotu nia esforsu to’o hetan ukun rasik an, kontente bele partisipa iha loron komemorasaun FALINTIL ba dala 49, maske hasoru terus no sofre barak maibe konsege hetan resultadu ukun rasik an”, Dehan Veteranu Celestino de Carvalho Alves.
Veteranu ne’e husu ba sidadaun hotu atu servisu makaas, moris hamutuk iha damen, unidade no fraternidade nia laran hodi kontribui no partisipa ativa iha prosesu dezenvolvimentu nasionál.
“Sidadaun hotu tenki partisipa ativamente iha dezenvolvimentu nasionál, ema hotu presiza moris iha unidade no fraternidade hodi goza nasaun nia ukun rasik an ba futuru, governu tenki aselera dezenvolvimentu no involve ema hotu iha dezenvolvimentu”. Hateten Celestino
Jornalista : Ermelinda Soares & Juvita Guterres