Imajem : Kordenador Komisaun Organizador Octávio da Conceição iha Estadium Municipal Dili segunda (10/02/2025).
SAPNewsTL, Dili : Orgaun Liga Futebol Timor-Leste (LFTL) ofisialmente anunsiu rejistrasaun ba prezidente foun periodu 2025-2029 durante loron sanulu.
“Ohin ofisialmente ami anúnsiu ba publiku katak prosesu rejistrasaun kandidatura ba kongresu prezidente foun, nune’e bele mai foti formuláriu iha komisaun organizador sira nia liman hodi kandidata sira nia an tanba nakloke ba públiku maibe tenki tuir kriteria komisaun organizador preparadu ona, kriteria sira ho rekezitu sira ami tau ona nu’udar sasukat baze ida ba sidadaun Timoroan hotu mak iha komitmentu, kunesimentu no domin ba dezenvolvimentu futebol iha Timor-Leste”, dehan Koordenador komisaun organizador Octavio da Conceição ba jornalista liu konferensia imprensa iha Estadium Municipal Dili segunda (10/02/2025).
Koordenador informa tan, iha prosesu kandidatura ne’e sei iha loron sanulu nia laran komesa loron 10 to’o loron 20 fulan fevereiru 2025, depois loron sanulu nia laran kandidatu sira komisaun organizador sei halo verifikasaun no fo sai sira nia rezultadu no mos fo tempu ba kandidatu sira la pasa tuir kriteria sira para halo rekursu fali durante loron rua nia laran molok ba kongresu.
Assembleia Jeral LFTL ba Daruak ne’ebe komisaun planeia ona sei hala’o iha fulan fevereiru nian laran, hafoin liu husi diskusaun lubuk ida liu husi asembleia jeral, fundador no klube sira ne’ebé hari’i LFTL ne’e
Octavio hatutan tan, kriteria sira ba kandidatu sira tuir rejimentu interna kongresu nian iha artigu 9 kona ba kriteria jeral sira no artigu 10 iha kriteria espesial sira, nune’e iha artigu 9 koalia kona ba kandidatu tenki idade minimu 25, residensia permanente iha Timor-Leste, la okupa kargu ruma iha klube divizaun dahuluk ho daruak iha liga futebol Timor-Leste, labele kandidata ema kondenadu husi kualker atividade desportu ho punidu ho natureza krime, kandidatu tenki hetan asinatura minimu 10 husi fundador sira ho klube sira, proponente labele apoiu liu ema nain ida, klube degrada no la ativu ona labele sai proponente ba kandidatu no tenki iha karta aseitasaun husi kandidatu katak nia prontu kandidata an no tuir eleisaun ba orgaun ezekutivu LFTL.
Nia Salienta tan, Iha artigu 10 kriteria espesial koalia kona ba kandidatu labele hala’o knaar ruma iha instituisaun estadu Timor-Leste, tenki sidadaun Timor-Leste, residensia permanente iha Timor-Leste, minimu idade 25, tenki esperensia minimu tinan 5 hala’o knaar iha desportu futebol.
“Kandidatu la okupa kargu ruma iha klube divizaun dahuluk ho daruak iha liga futebol Timor-Leste, tenki iha abilidade ho jestaun organizasional no tenki iha paixaun, kunesimentu no komitmentu klean ba dezenvolvimentu futebol iha Timor-Leste”.
Reportajen: Augusto Dos Santos