Imajem : Padre Domingos da Silva Soares Maubere wainhira hasoru malu ho Primeiru Ministru Kay Rala Xanana Gusmão. Foto : Xanana Ba Ema Hotu
SAPNewsTL, Dili : Saudozu Padre Domingos da Silva Soares (Maubere) konsege hameno mensajen ikus nian ba Maun Boot Xanana, (atuál Primeiru Ministru IX Governu Konstitusionál, Kayrala Xanana Gusmão) antes termina ninia jornada moris iha Mundu hodi husik iis ba dala ikus iha oras 7:10 dadeer iha loron 16 Maiu 2025 iha ICU-HNGV.
Dircia Baptista Belo – SAPNewsTL
“Ba fó hela ha’u-nia obrigadu ba Maun Boot Xanana,” konta Agostinho Letêncio de Deus iha diskursu família ninian iha ámbitu ‘misa requem’ ba Amu Du iha Catedral da Imaculada Conceição Dili,19/05/2025
Letêncio haktuir Liafuan “obrigadu” hanesan Amu Du ninia instrusaun no mensajen ikus nian ba Timor iha 7 de Maiu, bainhira sei iha hela Malázia. Iha momentu-momentu ikus nian, Amu Du fó obrigadu no husu deskulpa ba familia sira hotu no hameno hela atu hato’o ninia mensajen ikus ba Maun Boot Xanana.
Letêncio relembra katak Amo Du sempre kuda buat rua iha família maka “tenke hatene fó obrigadu no hatene husu deskulpa hodi rekoñese sala sira.”
Parte família rekoñese sá maka Maun Boot Xanana halo ba Amo Du, parte família sente katak sura labele, no labele selu tan. Parte família rekoñese Papel Maun Boot Xanana nian hodi delega Padre Domingos Maubere nu’udar enviadu espesiál hodi lidera enkontru sira timoroan nian iha diáspora.
Liga ho kondisaun ikus Amu Du nian, Prezidente Repúblika Jose Ramos Horta deside la partisipa serimónia inaugurasaun Papa Leão XIV iha Vatikanu-Roma.
“Ha’u hakarak iha ne’e. Ita hotu hamutuk fó omenajen, Boa viajen ida laiha regresu, viajen ida la fila ba Amo Domingos Maubere” afirma PR Horta.
PR Horta rasik koñese besik bainhira Amu Du ba Portugal hamutuk ho lider rezisténsia Timoroan sira halo konvensaun Peniche.
PR Horta konta, “bainhira nia moras iha Malazia, haruka whatsapp (mensajen) ba ha’u dala barak, la ko’alia kona-ba nia moras. Nia ko’alia ninia preokupasaun, ninia laran susar, kona ba edukasaun, saúde, povu nia moris no kiak sira nia moris”.
Nia hakat ona ba mundu seluk, husik ezemplu korajen, domin no integridade, la ta’uk podér, maibé ta’uk de’it maka podér espirituál. Amo Domingos Maubere ninia sakrifísiu, hanoin no lisaun sei hamutuk ho ita nafatin.
Estadu Kondekora Pe. Domingos da Silva Soares “MAUBERE” ho grau órden Nicolao Lobato ho títulu Postumu, durante selebrasaun misa fúnebre. Saudozu Padre Domingos da Silva Soares “Maubere” haloot iha fatin ikus lokaliza iha Semitériu ba Nai Lulik sira iha Ailok-Laran, Maloa.
Iha misa funebre, Kardeal Dom Virgílio do Carmo da Silva hateten Padre Domingos da Silva Soares hanesan padre ne’ebé domin na’in no hatudu dedikasaun estraordináriu iha vokasaun tomak durante sei moris.
Amu Du nia dedikasaun ne’e estraordináriu. Nia oferese ba igreja madre, padre no leigu lubuk ida, amu Du kari ona fini vokasaun nian iha ita-nia rain, nia sei tau matan nafatin ba ita iha lalehan.
“Obrigadu Amu Du, tan sai ona amu lulik vokasaun nian iha Timor, ita prepara foin-sa’e sira ba igreja no nasaun. Nia domin ba rai ne’e sasukat -laek, nia fo an tomak ba rai ida ne’e, nia kontribui maka’as ba luta auto determinasaun Timor-Leste nian” espresa Kardeal do Carmo”. Dehan Dom Virgílio Cardeal