Imajem : Prezidente Konselho Diretivu Agensia Notisiaza Timor-Leste Tatoli I.P Noémio Mateus Soares Falcão iha Dili,10/01/2025
SAPNewsTL, Dili – Sekretario Estadu Komunikasaun Sosial (SEKOMS) Espeditu Loro Dias Ximenes fo tomada de posse ba Prezidente Konselho Diretivu Agensia Notisiaza Timor-Leste Tatoli I.P Noémio Mateus Soares Falcão ba Periodu 2025-2029.
Iha diskursu SEKOMS Espedito Dias Ximenes hateten sai prezidente Tatoli presiza iha ema ida ne’ebe esperensia naruk iha media, atualiza nia an iha dezenvolvimemto teknologia no loyal ba estadu loyal.
“Sai prezidente Tatoli, I.P presiza iha esperiénsia, aktualiza an iha teknolojia no loyal ba estadu no governu, oinsa Tatoli bele ba oin. Tatoli agensia notisioza ida ne’ebe iha multikanal tuir dekretu lei”. Tenik SEKOMS Espedito Dias Ximenes ba jornalista sira iha Palasiu Governu Dili,10/01/2025
Imajem : SEKOMS Espedito Dias Ximenes
Espedito Dias hatutan Tatoli tenki sai fornesedor informasaun, arkiva dokumentu estadu no sentru informasaun ba públiku inklui fornese notísia ba média sira seluk iha nasionál, rejional no internasional.
“Tatoli mos tenki sai sentru produsaun sinema nian hanesan dokumentasaun ba estadu no mos institutu opiniaun públiku, durante ne’e Tatoli senti an hanesan fali media sira seluk, lolos tatoli tenki sai sentru informasaun estadu nian ne’ebe nia maka fornese informasaun ba media sira seluk katak bainhira iha atividade balun so Tatoli no RTTL maka bele halo kobertura, Tatoli tenki sai fornesedor notisia, hein katak Prezidente foun bele halo ida ne’e”.
Iha fatin hanesan, Prezidente Tatoli I.P Noémio Soares Falcão fo agradese ba lideransa sesante no rekuhnese katak funsaun Prezidente sai hanesan onra, priviléziu no mos oportunidade diak atu bele didika funsaun tomak ba Tatoli,I.P durante mandatu.
“Agradese ba ekipa tomak ne’ebe maka kontribui ona liu husi nia dezempenhu hodi apoiu Prezidenti sesante durante ne’e, tempu maka sei fo reposta, asaun diak ka ladiak, so tempu maka bele fo resposta kona ba servisu, planu durante mandatu maka sei servisu hamutuk ho parte relevante hodi kumpri deit lei”. Afirma Prezidente Tatoli I.P Noémio Soares Falcão
Prezidente Tatoli I.P Noémio dehan sei esforsu hodi trasa programa no ajenda klaru nu’udar fontes informasaun ofisial estadu nian iha eskola nasionál to’o internasionál.
“Durante tinan haat nia laran tenki trasa programa no agenda klaru foka ba objetivu prinsipal no prezisa kaer metin objetivu estabele agensia Tatoli,I.P sai fontes informasaun ofisial estadu Timor-Leste nian tenki iha duni kapasidade no kbiit, ba oin tenki hatur instituisaun iha nia karakter rasik ho informasaun iha eskala nasional, regional no internasional”. Nia dehan
Nia akresenta, “Tatoli tenki sai dapur ba informasaun hotu estadu nian ho rápidu no vigor, hahú knar ho mandatu foun ne’e prezisa konfesa katak maske seidauk iha esperensia diak no luan atu dirije servisu instituisaun ida ne’ebe kompostu husi elementos besik 70 maibe iha konfiansa total ba apoiu no servisu hamutuk diak liu husi elementos ne’ebe maka haknar an iha Agensia Notisioza Tatoli I.P konta ho apoiu laiha rezerva”. Nia sublinha
Iha serimonia toma posse refere hetan mós presenza hosi Sekretario Estadu Komunikasaun Sosial (SEKOMS) Espeditu Loro Dias Ximenes, Sekretariu Estadu Igualdade (SEI) Elvina Sousa de Carvalho, Diretor Mídia, Xefe Redasaun, jornalista no família sira.
Jornalista : Ermelinda Soares & Dircia Baptista Belo