Sekretariu Jeral klube AD SLB Domingos Caeiro
SAPNewsTL, Dili: Klube AD SLB Laulara hahu prepara ona jogador ba Liga Timorense epoka 2022-2023 tanba sira rona informasaun husi orgaun Liga Futebol Timor-Leste (LFTL) katak liga sei hahu iha iha loron 17 fulan fevereiru tinan ne’e.
“Ami nia klube husi parte jestor sira orienta ona treinador hodi prepara ami nia jogador sira ba Liga Timorense epoka 2022-2023, ne’e duni ami nia treinador prepara ona jogador sira no agora ami nia jogador sira treinu hela iha ekipa nasional nian”, dehan Sekretariu Jeral klube AD SLB Domingos Caeiro ba jornalista SAPNewsTL via whatsApp tersa, (17/01).
Sekretariu jeral informa, Liga Timorense epoka ne’e ho jogu dala ualu deit ne’e sira laiha hanoin atu kontratu ho jogador estranjeiru, tanba kustu administrasaun boot los, ne’ebe sira kontinua ho baliza deit no posivel sira sei bolu fali jogador estranjeiru Balu mai reforsa sira nia ekipa no kona ba rejistu ne’e AD SLB Laulara babain loron ikus atu taka mak foin sira ba rejistu
Nia informa, finanseiru suportasaun ba klube sira ba liga tinan ne’e ofisialmente klubu sira sidauk simu husi orgaun LFTL no FFTL, sira rona deit katak orsamentu ba realiza kompetisaun tinan ne’e hamutuk 440,000 USD (240,000 USD husi SEJD) no (200,000 USD husi FFTL), maibe sira sei hein hela informasaun husi orgaun LFTL.
Antes ne’e iha loron 12 fulan fevereiru 2023 diretor Relasaun publika LFTL Diogo Neto Fraga hatete, kick off Liga Timorense epoka 2022-2023 iha loron 17 fulan fevereiru 2023 remata iha loron 30 fulan abril 2023 ne’ebe janela transferensia ba klube sira hahu iha loron 12 fulan janeiru to’o loron 11 fulan fevereiru 2023.
“Ita nia jogu kick off iha loron 17 fulan fevereiru 2023 no sei remata iha loron 30 fulan abril selae inisiu fulan maiu ne’eba ami reafirma fali rejistrasaun ba klube liuliu loke janela transferensia hahu husi loron 12 fulan janeiru 2023 to’o loron fulan 11 fevereiru 2023 tanba klube sira husi divizaun dahuluk no daruak Liga Timorense epoka 2022-2023 aseita hotu on”, tenik Diogo.
Reportajen: Augusto dos Santos