Imajem : Militante PD Munisipiu Bobonaru, 22/04/2023
SAPNewsTL, Bobonaro : Partidu Demokrátiku (PD) hala’o komísiu iha Munisipiu Bobonaru, Presidente PD Mariano Assanami Sabino hateten tempu ona halakon diskriminasaun hodi salva estadu no nasaun, la’os tempu atu entrega estadu ba partidu ne’ebe lori ba estadu ba interese partidu tanba ema hodi estadu ba la’o sala ona
“Tempu ona ita hamutuk salva estadu no nasaun, la’os tempu atu entrega estadu ba partidu ne’ebe lori ba estadu ba interese partidu tanba ema hodi estadu ba la’o sala ona, ita tenki halakon diskriminasaun, ita tenki hatur estadu nu’udar Repúblika Demokrátika de Timor Leste katak estadu la’os grupu nian no partidu maibe estadu ba ema hotu no maubere oan hotu”. Tenik Presidente PD Mariano Assanami Sabino ba militante sira iha Bobonaru, 22/04/2023
Assanami hatutan, wainhira PD manan sei tau iha Gabinete Primeiru Ministru, Munisipiu, Postu no Suku juventude inovador no transformador hodi halo estadu sai estadu juvenil
“Loke estadu ba povu hotu, Ita sei tau iha Gabinete Primeiru Ministru, Munisipiu, Postu no Suku juventude inovador no transformador hodi halo estadu sai estadu juvenil, estadu enérjiku para kompete ho rai seluk, joven sira bele halo transformasaun no inovasaun, imi iha responsabilidade atu luta kontinua hodi hadia rai ida ne’e, estadu sei kria kampu servisu, imi sente livre, ema hotu tenki respeitu mak lei”. Nia hatete
Imajem : Presidente PD Mariano Assanami Sabino Lopes
Lider PD ne’e fundamenta, tempu to’o ona para hamos estadu husi odiu no vinga malu, labele uza partidu partidu polítiku no guvernu para satan malu, izola malu, hatun malu no hasa’e malu, sai
“Hari’i estadu Timor ida laiha odiu no vinga malu, labele uza partidu partidu polítiku no guvernu para satan malu, izola malu, hatun malu, hasa’e malu buka previléziu, maibe uza guvernu no parlamentu para sai murador, asulear, soldadu no lutador ba povu hodi lori estadu la’o ba oin. Tanba ne’e ita tenki hadia politika ne’ebe saudável, diak, koordena no rekunese partidu hotu inklui sira ne’ebe laiha partidu fo espasu para servi ninia rain”.nia kestiona
Presidente PD akresenta, veteranu sira ne’e sagradu, laos partidu mak selu sira, veteranu sira tenki tau dignu tanba ne’e labele politiza veterenus hodi hetan votus, jovens tenki hamriik defini futuru
Entretantu, Assanami mos promete, wainhira PD fila fali ba ukun sei hadia infraestrutura liliu estrada ligasaun Postu Administrativu Lolotoe, Ligasaun Aiasa no estrada rural sira husi Aldeia ba Suku no Postu ba Munisipiu sira
Jornalista : Ferderita Miranda