Imajem : Koordenador Grupu Kontent Kreator Manecas Lobo iha Palasiu Governu Dili, 13/03/2025
SAPNews TL, Dili : Promove kriatividade Timoroan, Governu liu husi Sekretariu Estadu Komunikasaun Sosial (SEKOMS) sorumutu ho joven kontent kreator sira ne’ebe kriatividade hakerek kona-ba promosaun setor turizmu, traveling, no komedia Timor-Leste.
Sekretariu Estadu Expedito Loro Dias hateten joven konten kreator Timor nian no joven sira ne’ebé durante ne’e servisu halo duni kreatividade ne’ebé di’ak lori Timor ba mundu liu husi sira nia matenek hakerek kona-ba turizmu, traveling, kulinaria, saúde, komedian no halo komik.
“Ida ne’e ohin ami hasoru malu atu bele troka nafatin impresaun, hanoin, informasaun oinsá esforsu governu nian, SECOMS hamutuk ho Ministeriu Transporte no Teleomunikasaun espesial ba iha Teknolojia Informasaun Komunikasaun (TIC), nune’e esforsu nafatin iha loron ruma Timor-Leste sei iha reprezentasaun Google youtuber iha Timor-Leste”. Dehan Sekretariu Estadu, Quinta (13/03/2025)
Governante ne’e salienta, daudaun ne’e iha Timor-Leste adapta teknolojia avansa iha era dijital, espasu dijital ne’ebé iha oinsá mak ema uza ho didiak no bele fo benefisiu iha sosiedade no nasaun Timor-Leste.
“Ba joven sira hotu atu sai nafatin kontent kreator ne’ebé saudavel, konten kreator ne’ebé uja matenek atu bele lori Timor ba mundu ho nia kapasidade matenek ne’ebé iha, tanba ne’e maka IX governu konstitusionál komprometidu atu oinsá bele nafatin halo esforsu hodi loron ruma halo reprezentasaun Google youtube ne’e iha Timor-Leste”.
Imajem : SEKOMS Expedito Loro Dias Ximenes
Expedito hatutan, joven sira ohin hamutuk iha ne’e oinsa, halo hanesan petisaun ida fo sai ba públiku iha Google youtube hodi sira mós senti katak Timor prontu ona atu bele iha reprezentasaun Google youtube iha Timor-Leste.
“Durante ne’e governu esforsu oinsa kriteria principal husi SEKOMS no mós TIC halo enkontru ona ho reprezentante tekniku sira iha Singapura no Jakarta iha kriteria lubuk ida maibé kriteriu prinsipal mak velosidade internet, ita hotu hatene katak oras ne’e dadaun ita nia internet sei paradu hela hanesan la’o neineik liu”. Expedito sublinha
Tuir nia esplika, IX governu esforsu hela tinan ida ne’e maximu fulan Juñu fibra ótika ne’e bele funsiona ho di’ak fila fali ho nune’e iha tempu ne’e kedas konserteza nia velosidade ba internet sei la’o di’ak liután, iha rekezitu daruak maka literásia mediatika ne’e oinsá esforsu atu bele vizita.
Iha fatin hanesan, koordenador kontent kreator Manecas Lobo afirma, objetivu husi enkontru ho SEKOMS hodi troka ideia hodi konsolida forsa liu husi kontent kreator nian iha parte Youtube, Facebook no Tiktok.
“Ita konsolida maluk sira ne’ebé mak ho sira nia talentu no kreatividade, sira mai hamutuk ho governu ita atu hanoin katak halo petisaun ida ne’ebé nakloke ba ema hotu ne’ebé utiliza rede sosial atu bele fo apoiu ba ita nia entidade sira ne’ebé mak uja konten kreator, ita hahú halo buat ruma ba Timor liu husi plataforma sira”.
Koordenador Manecas dehan, joven kriatividade sira oinsa servisu hamutuk ho governu atu bele konsolida forsa joventude nian kona-ba produtu ne’ebé mak la hanesan, nune’e produz petisaun ida ne’ebé kualidade reprezenta ema hotu iha Timor
“Konten kreator iha espasu kreatividade, koñesimentu no kapasidade maibé atu eleva kompetensia governu tanba estadu ida ne’e governu mak responsabiliza entaun hanesan joven mai husu maneira oinsá governu bele fo espasu ba ita-nia petisaun lori ba iha plataforma sira”.
Entretantu, iha sorumutu ne’e partisipa hosi koordenador konten kreator Manecas Lobo, ho ekipa joventude kriatividade kontent kreator, Sekretariu Estadu Komunikasaun Sosial Estadu Expedito Loro Dias, no ekipa SEKOMS.
Jornalista: Dircia Baptista Belo