Imajem : Prezidente Repúblika José Ramos Horta kondekora média nasionál hamutuk 12 iha Palasiu Presidensial Aitarak-Laran, 12/12/2025. Foto : Média PR
SAPNewsTL, Dili : Prezidente Repúblika Jose Ramos-Horta kondekora Medalla Méritu prestijiozu ba mídia nasionál sanulu-resin-rua ba sira-nia kobertura esepsionál ba Sua Santidade Papa Francisco nia Vizita Apostólika dahuluk mai Timor-Leste, Enkuantu Média Nasionál sira seluk Ramos Horta nega hodi la valoriza sira nia servisu durante vizita Papa Francisco.
Diretora Média ONE Timor Suzana Cardozo kestiona Prezidente Repúblika tanba laiha konsiderasaun ba média nasionál sira seluk ne’ebé hala’o mós papel kobertura iha vizita Santu Padre Francisco.
“Husi Media ONE Timor durante vizita Amu Papa Francisco mai Timor-Leste mos halo kobertura ho Plataforma Dijital online no hetan asesu kobertura mos ba Palásiu Prezidente”.
“Média ONE Timor mos seidauk hatene kriteria saida mak uza hodi avalia Media sira. Tanba ne’e maka media la hetan konsiderasaun maibe tuir loloos tenki publika kriteria sira, nune’e Media ONE Timor mos kestiona kona-ba kondekorasaun ida ne’e”. Tenik Diretora ONE Timor Suzana Cardoso iha Dili,13/12/2024
Imajem : Diretora Mídia ONE Timor Suzana Cardoso
Konselleira Konsellu Imprensa ne’e dehan Média sira seluk ne’ebé kobertura mós foti output hosi Rádio Televisão Timo-Leste (RTTL, E.P) maibé tanba sa mak mosu ida ne’e akontese.
“Media sira seluk halo kobertura ne’e mos halo transformasaun ne’ebé uza hosi RTTL,EP ne’ebé fasilita hosi SECOMS, laiha media ida maka halo kobertura mesak eseptu GMN TV. Media hotu-hotu depende deit ba RTTL,EP ne’ebé fasil los hodi halo transmisaun direta”. Suzana sublinha
Imajem : Jornalista SAPNews kobertura iha vizita Papa Francisco. Tasi-Tolu, 10/09/2024. Foto : Ekipa SAPNews
Iha sorin seluk, Prezidente SAPNews Clementino Bragança Machado konsidera Prezidente Repúblika nega matak deit média sira seluk ne’ebé halo kobertura ba vizita Sua Pontífise iha Dili.
“Prezidente Repúblika Demokrátika Timor-Leste José Ramos Horta Halo diskriminasaun no nega tomak kontribuisaun média sira seluk nian hodi fo de’it kondekorasaun no sertifikadu apresiasaun ba média sira ne’ebé nia kunhese maske media sira hotu hola parte iha kobertura vizita Papa Francisco”. Hateten Prezidente Média SAPNews Clementino Bragança Machado
Bragança Machado hatutan, Prezidente Repúblika maka hatudu ezemplu diskriminasaun ba media sira liu hosi ninia sertifikasaun ba média ne’ebé nia kunhese maske media hotu hatudu prestasaun voluntáriu ba vizita apostólika refere.
“Média hotu hola parte no servisu fo an tomak durante preparativus até simu vizita Papa Francisco nian maibé Prezidente Repúblika haluha no nega hotu ami nia kontribuisaun ne’ebé ho voluntariu sein doit metan ruma husi parte komisaun organizadora altu nivel kompara ho média boot sira ne’ebé hetan kontratu husi governu, Prezidente Repúblika rasik hatudu ezemplu diskriminasaun boot ba media sira”. Nua konsidera
Lideransa SAPNews ne’e deklara la hirus nein ódiu maibe agradese tanba Lider Igreza Katólika Mundial ida bele halo vizita mai rai doben Timor-Leste.
“Ami la hirus no la rai odiu ba ita Nai Prezidente Repúblika maibé ami agradese wain ba Nai Maromak ne’ebé haruka ninia Bibi Atan, Papa Francisco bele mai vizita ami hodi lori paz no estabilidade ba povu doben Timor-Leste”.Nia agradese
Tuir informasaun ne’ebé SAPNews asesu liu hosi Pajina Prezidente Repúbliku José Ramos Horta informa katak Medalla Méritu ne’ebé estabelese tuir Dekretu Lei No. 15/2009 hodi rekoñese kontribuisaun sira ne’ebé destakadu hodi hametin orden sosiál no promove pás no estabilidade nasionál.
Presidente Ramos Horta dehan Mídia onrada sira hatudu profisionalizmu ezemplár iha sira-nia kobertura komprensivu kona-ba Vizita Papal hodi fahe okaziaun importante ida-ne’e ho mundu no dokumenta fiar kle’an povu timoroan nian.
“Kobertura klean no profisionál ne’ebé fó hosi ami nia mídia estatál no privadu sira durante Papa Francisco nia vizita hatudu la’ós de’it signifikadu istóriku hosi okaziaun ne’e maibé mós kompeténsia no dedikasaun esepsionál husi jornalista sira iha ita-nia nasaun”. Hateten José Ramos Horta iha Palasiu Prezidensial Aitarak-Laran, 12/12/2024
Prezidente Ramos-Horta hatete. “Sira nia serbisu garante katak eventu importante ida-ne’e prezerva ba jerasaun sira iha futuru no partilla iha nivel nasionál no internasionála”.
Mídia nasionál sira ne’ebé simu Medalla Méritu no sertifikadu rekoñesimentu maka 1. Rádiu no Televizaun Timor-Leste, Empreza Públika (RTTL, E.P.) 2. Ajénsia Notisioza Tatoli, I.P. 3. Grupu Mídia Nasionál (GMN) 4. Televizaun Edukasaun Timor (TVET) 5. Suara Timor Lorosa’e (STL), 6. Diário Timor Post 7. Jornal Independente, 8. Dili Post, 9. SMNews, 10. Hatutan.com, 11. Vídeo Information Provider (VIP TV) no 12. Lafaek News
Enkuantu, Média ne’ebé ladauk hetan kondekorasaun maka Média ONE Timor, SAPNews, Diligente, Lian Orluli, Média Mudansa, Media Loluwari, Guardamor News, LABEH, no MGTV.
Entretantu, antes ne’e Governu liu husi Sekretáriu Estadu Comunicão Sosiál (SECOMS) distribui sertifikadu apresiasaun ba média nasionál hanesan SAPNews, Radio Televizaun Timor-Leste (RTTL), GMN, jornal Timor Post, Jornal Díli Post, Jornal Independente, Lafaek News, G-News, Média Mudansa, Labeh TV, TVE MFTV, Média ONE Timor, SMNews, Loluwari, VIP TV, STL no seluk tan.
Jornalista : Marciana da Conceição