Imajem : Resisténsia
SAP News TL : Loron 3 fulan Marsu estadu Timor-Leste dekreta nu’udar loron veteranus, loron nasionál ne’ebé fanun timoroan hotu hodi hamutuk halo reflesaun, fo onra no glória ba aswa’in funu na’in sira hotu ne’ebé fila ona ba Aman Maromak nia kadunan santu tanba kauza luta ba ukun rasik an.
Timor-Leste nia guerilla hahú iha tempu kolonial portugés nian no kontinua iha invazaun Indonéziu nia okupasaun iha tinan 1975, hafoin Presidente Nicolau Lobato mate iha loron 31 fulan Dezembru 1978, baze apoiu hahú rahun, ema barak tun ba villa, balun rende no barak mate, maske nune’e maibé barak nafatin iha ailaran hodi luta ba ukun rasik an.
Iha loron 3 fulan Marsu tinan 1981, funu na’in sira hahú reorganiza an iha Maubai hodi define no reafirma estratejia luta ba ukun rasik an to’o konkista independésia liu hosi referendum iha loron 30 Agustu 1999.
Tuir mai, iha loron 20 fulan Maiu tinan 2002, Timor-Leste restaura hikas nia independénsia, hafoin ukun an, estadu Timor-Leste dekreta loron 3 fulan Marsu sai nu’udar loron nasionál ba veteranu sira.
Tinan ne’e, Timor-Leste komemora loron 3 Marsu ba dala 44⁰, maske governu la selebra loron nasionál ne’e maibe Ministériu Asuntu Combatentes Libertasaun Nasionál (MACLN) sei dada bandeira hodi fo omenagem ba sira ne’ebé mate ba kauza libertasaun nasionál.
Minutu ida hakmate ba aswa’in funu na’in sira hotu
3 de Março 1981 — 3 de Março 2025
Viva Veteranus
Viva FALINTIL
Viva Timor-Leste
Jornalista : Marciana da Conceição