Imajem : Madre Kongregasaun Fillas de Maria Auxiliadora, Ernestina Fatima de Jesus iha Comoro, 17/06/2024.
SAPNewsTL, Díli – Hafoin fasilita formasaun ba komunidade sira, Irma Ernestina Fatima de Jesus husi Kongregasaun Fillas de Maria Auxiladora, haktuir formasaun ne’e fahe esperiensia ba komunidade sira halo fermentasaun.
Madre Ernestina Fatima de Jesus, fahe koñesimentu ne’ebé nia hetan ba komunidade no alunu sira, hodi halo fermentasaun Eco Enzyme ne’ebé bele kura moras no proteze ambiente iha sosiedade.
“Ha’u gosta fahe buat ne’ebé ha’u aprende no hatene ba ema seluk, tanba ne’e di’ak ba komunidade, laos ba saúde de’it maibé ba mos ambiente, tanba ne’e ha’u fahe esperiensia ne’e ba sira atu sira mos bele aprende, konvida maluk hodi mai aprende hamutuk, sira akonpaña prosesu halo Eco Enzyme depois sira bele ba halo iha uma, no bele hatutan fali ba ema seluk”. Dehan Irma Ernestina Fatima de Jesus ba jornalista SAPNews iha Comoro, 17/’06/2024
Irma Ernestina Fatima de Jesus hateten, Eco Enzyme la’os ai-moruk maibé likidu fermentasaun ne’ebé halo husi lixu organiku sira, no formulasaun ne’e durasaun to’o fulan tolu (3) hafoin sai Eco Enzyme hodi bele utiliza.
Irma Ernestina akresenta, Eco Enzyme hanesan modifikasaun ar, halo rai sai bokur tanba bele kontra rai lakan no reduz elektromagnetiku, liu-liu kura kanek ne’ebé dehan labele kura ona, tantu kanek tuan no foun, no mos ba ema ne’ebé mora diabetes.
“Eco Enzyme ne’e uza ba moris lor-loron, hanesan modifikasaun ar, hadia rai atu sai bokur, tanba ECO Enzyme mengaktifkan ion negatif bele kontra rai lakan, bele mos reduz elektromagnetiku, no bele kura kanek ne’ebé ema dehan labele kura, bele kose ba kanek foun ka kanek tuan hotu, inklui ema sira ne’ebé diabetes labele kura ne’e mos bele kura hotu, dalabarak ema diabetes sira ba konsulta ka hetan kanek ruma doutor dehan kura labele, ikus mai bele amputasi (tesi) sira nia liman ka ain tanba labele uza ai-moruk”. Hateten Irma Ernestina.
Iha fatin hanesan, Marcelino Sarmento hanesan komunidade, fiar katak Eco Enzyme bele kura moras ne’ebé nia enfrenta hela Durante tinan sia (9) nia laran.
“hakarak hetan di’ak no fiar katak Eco Enzyme bele kura ha’u nia moras, tanba ne’e Madre sira konvida ha’u mai, oinsa atu bele rezolve ha’u nia situasaun ne’ebé ha’u enfrenta hela durante tinan sia (9) nia laran, liu husi meius ida ne’e bele rezolve no kura moras ne’ebé ha’u iha, ho motivasaun ida ne’e ha’u mai besik hodi haree prosesu halo Eco Enzyme”. Marcelino informa.
Aleinde ne’e, Marcelino mos hateten tuir informasaun ne’ebé nia hetan husi Irma Ernestina katak, Eco Enzyme la’os kura moras deit maibe bele proteze mos ambiente ba jerasaun tuir mai.
“Eco Enzyme mos bele proteze ita nia Meiu-Ambiente ne’ebé ita hasoru hela iha viajen moris ida ne’e ho Eco Enzyme bele tulun ita, oinsa bele prevene ita nia ambiente sai protezidu ba jerasaun oin mai, ida ne’e bele tulun ha’u no familia sira oinsa atu bele kuidadu ambiente iha ita nia moris lorloron nian”. Nia hakotu.
Benefisiaria Joana Pereira hatutan, nia parte sai ona benefisiariu ba Aimoruk Eco Enzyme, iha ne’ebe bele kura kanek sira, isin moras, no isin kolen, tan ne’e nia kontinua hola parte iha programa ne’e hodi halo transformasaun ba eco enzyme.
“Ha’u sai ona ema ne’ebe benefisiaria, la’os ha’u deit maibe ema sira ne’ebe sofre moras isin no kanek ne’e foti ona aimoruk ne’e hodi kura, ikus mai sira hetan isin diak no kurativu, entaun ha’u interesadu tebes atu kontinua hola parte iha grupu ne’e hodi halo transformasaun ba eco enzyme”.
Enkuantu, Aimoruk eco enzyme refere kura ona komunidade balun ne’ebe sofre moras oioin liliu kura kanek sira, isin moras, no isin kolen.
Jornalista : Marciana Fernandes