Imajem : Vise Ministru Administrasaun Estatal Jacinto Rigoberto iha resintu MAE Kaikoli, Tersa (21/01/2025).
SAPNewsTL, Díli — Vice Ministru Administrasaun Estatál Jacinto Rigoberto informa, Politika IX Governu Konstitusionál liu husi Ministeriu Administrasaun Estatál (MAE sigla Portugués) sei eleva prosesu desentralizasaun lokal hodi define estatutu munisípiu 13 ho kategoria prezidenti autoridade munisipiu
Tuir Vice Ministru MAE esplika, Governu Timor-Leste liu husi nia aparelu MAE sei eleva politika desentralizasaun lokal hodi fó poder ba munisipiu sira atu dezenvolve an no hadia estatutu Prezidenti autoridade.
“IX Governu liu husi MAE sei reforsa politika kona-ba desentralizasaun lokal ne’ebe antes ne’e iha ona planu tuir lei ho objetivu atu hadia estatutu munisípiu hodi dezenvolve an” Dehan Vice Ministru MAE Jacinto Rigoberto ba Jornalista sira iha resintu MAE Kaikoli, Tersa (21/01/2025)
Nia salienta, Eleisaun kamara munisipiu sei iha fase avaliasaun ho kondisaun mínimu ne’ebe mak kada munisipiu iha, nune’e prosesu sira, agora la’o hotu ona, hein avaliasaun sei deside munispiu ida ne’ebe mak sei halo eleisaun uluk.
“Planu eleisaun refere iha ona avaliasaun ho kondisaun tuir prosesu ne’ebe la’o entaun ita sei hala’o fazeadamente iha tinan 2027, bainhira to’o ona iha fase refere sei hare prestasaun servisu liu-liu administrativu sei muda ba iha munisipiu no postu administrativu sira”.
Vice MAE hatutan, Ministériu Estatál ho parte relevante sira servisu hamutuk atu bele prense kriteriu mínimu ruma molok hakat ba implementasaun politika desentralizasaun lokal.
“Infraestrutura balun komunidade sira iha suku komesa la’o dadaun ona hanesan Programa Nasionál Dezenvolvimentu Suku (PNDS) no programa PDM nian, ne’ebe Ministeiru Obras Publika (MOP) no Ministeiru relevante sira”.
Politika desentralizasaun poder garantidu iha Konstituisaun Republika Demokratika Timor-Leste (K-RDTL). Iha KRDTL artigu 79 kona-ba Poder Lokal, numeru 1, hatete: “Sei harii kbiit lokal ho ema ne‘ebé koletivu iha rai-laran ne’ebé iha orgaun reprezentativu, ho knaar atu organiza partisipasaun sidadaun ida-idak nian kona-ba solusaun problema rasik iha sira-nia komunidade no atu promove dezenvolvimentu lokal, no la afeta partisipasaun Estadu nian
Jornalista : Marcela Mery da Costa