Imajem : Pe. Helder da Costa Henriques iha Parokia Manatutu, 14/12/2024. Foto : Daniel da Silva
SAPNewsTL, Manatutu : Durante misa nova ba padre foun, Pe. Helder da Costa Henriques hateten vokasaun ne’ebe nia simu prontu servi, maromak fo misaun ba ema feto no mane hodi haklaken ba mundu katak Maromak iha kompaixaun boot ba ema hot-hotu.
“Vokasaun katak Maromak fo ba ema feto no mane misaun servi no haklaken nian, nune’e ema hotu bele partisipa iha salvasaun, Maromak bolu ema hotu atu tuir nia, rona nia, fiar nia no halo tuir nia hahalok sira”. Tenik Pe. Helder da Costa Henriques liu hosi omilia iha Parokia Santu António Lisboa Manatuto, 14/12/2024.
Pe. Helder deklara vokasaun ne’e mai hosi Maromak, tan ne’e nia sei firme no hakaas an hodi sai Na’i Lulik ka Bibi Atan di’ak ba sarani.
“Ohin iha leitura haktuir, ‘ha’u mak ne’e keta ta’uk’, liafuan ne’e mak inspira no sai ha’u nia mata dalan sai Na’i Lulik katak vokasaun ne’e mai hosi Maromak”.
“Ha’u foti lema ‘Ha’u mak ne’e, keta ta’uk’, tanba ha’u nu’udar oan mane mesak iha uma laran, ha’u hili vokasaun ne’e hodi servi maun alin sira. Ha’u konsiente katak ha’u iha limitasaun, frakeza ne’ebé halo ha’u tauk no lakon esperansa maibé ha’u sei la mesak tanba buat ne’ebé ha’u halo ne’e mai hosi Maromak”.
Bibi atan foun ne’e dehan Maromak sempre akompanha ema hotu no nunka taka matan ba ne’ebé tau fiar no esperansa iha nia.
“Maromak ne’ebé laran diak sempre hatudu kompaixaun, akompanha ninia ema sira no nunka taka matan ba nia emar sira”. Pe. Helder dehan
Bispu Dom Leandro Maria Alves hetan tara tais hosi Pe. Helder da Costa Lopes
Iha fatin hanesan, Bispu Dioseze Baukau Dom Leandro Maria Alves sente kontente tanba padre foun na’in lima kompleta ona misa moruk ba sira nia ordenasaun saserdotal.
“Ohin ita hotu hamutuk iha ne’e sente kontente tanba ita nia Padre foun na’in lima kompleta ona misa moruk, espera katak sira sai la’o no fo sasin diak hodi lori ema hotu ba Maromak”. Hateten Bispu Dom Leandro Maria Alves
Sarani iha Parokia Santu António Lisboa Manatuto selebra misa nova ba Padre Helder da Costa Henriques, Iha omilia Padre Selebrante ne’e deklara
Fo hanoin fali katak Padre Helder da Costa Henriques simu ona ordenasaun saserdotal hosi Bispu Dioseze Baukau Dom Leandro Maria Alves iha Igreja Catedral St. António Baucau, loron 30 fulan Novembru 2024.
Iha serimónia misa nova ne’e hetan partisipasaun maksimu hosi familia sira, sarani sira, padres, madres no Bispu Dom Leandro Maria Alves inklui autoridade munisipiu sira.
Jornalista: Daniel da Silva