Imajem : Representante Oxfam Adilson da Costa Junior no Prezidente AJTL hala’o press komferensia iha salaun Oxfam Hudi-Laran, 29/05/2024
SAPNewsTL, Dili- Oxfam no AJTL hala’o media tour liga iha asaun ba justisa klimátika iha Postu Administrativu Lore, Munisipiu Lautém.
Iha press komferénsia, Strategy and Engagement Lead Oxfam in Timor-Leste Adilson da Costa Junior informa Oxfam servisu hamutuk ho Asosiasaun Jornalista Timor-Leste (AJTL) hodi halo media tour, asaun ba justisa klimátika liu husi halo kobertura kona ba mudansa klimátika ninia impaktu ba komunidade liliu ema vulneravel feto no Ema ho Defisiensia (EhD).
“Ohin, ita halo press komperensia atu ko’alia kona-ba Media Tour ne’ebe hala’o husi AJTL, programa ida ne’e ita bolu asaun ba justisa klimátika, Oxfam servisu hamutuk ho AJTL nu’udar parseiru estratejiku ida atu kontinua halo kobertura konaba asuntu mudansa klimátika ninia impaktu ba komunidade sira liuliu ba ema vulneravel feto no EhD sira”. Tenik Adilson da Costa Junior ba Jornalista sira iha Salaun Oxfam Hudi Laran, 29/05/2024
Adilson informa, Oxfam servisu hamutuk ho AJTL iha loron 27-28 Maiu, fasilita ona workshop ba jornalista sira molok halo Media Tour iha Lautèm.
“Ita organiza workshop, Ita konvida mos husi La’o hamutuk fahe oituan esperiensia no informasaun liga ba Mudansa Klimatika, ita mos konvida PERMATIL, KEJUS hanesan grupu movimentu husi Sagadati ne’ebe durante hala’o servisu ba konservasaun Bee iha Laga”.
“Media Tour ida ne’e sei la’o durante loron tolu nia laran, jornalista sei vizita Munisipiu Lautem Postu Administrativu Lore halo kobertura kona-ba asuntu oinoin ne’ebe mak deskuti iha loron rua ne’ebe liga ho agrikultura, infraestrutura estrada, produsaun agrikola no asuntu ambiente”.
Nia akresenta, programa media tour ne’e bele fo informasaun naton hodi informa ba governu, oinsa bele halo politika orsamental liga ba asuntu mudansa klimátika.
“Programa Media Tour ida ne’e sei hetan informasaun ne’ebe naton sai evidensia hodi kontinua informa ba governu, oinsa sira nia programa ou politika no orsamentu liga ba asuntu ne’ebe sai prioridade liliu situasaun Mudansa Klimatika ba komunidade nia moris ne’ebe iha area rural ne’eba”. Nia Teni
Nia hatutan, programa media tour ne’e hala’o ona iha Munispiu Baukau, Ermera no RAEOA, ohin kona fali Munisipiu Lautém postu administrativu Lore.
“Ita iha diskusaun antes halo dezisaun konaba identifikasaun area kobertura ba Media Tour laos akontese Postu Lore deit maibe ita mos halo media Tour ba Oe-Cussi, Baucau no Ermera, ita deside area sira ne’e tanba ita hotu hatene katak kobertura ba Media asuntu sira iha area remotas ne’e susar tebes”. Nia argumenta
Impaktu husi Mudansa klimatika ne’e estrada sira sai aat liu tan to’o agora, joven barak lakon vida tanba estrada ne’e rasik, difisil tebes komunidade nia asesu ba merkanu no saude.
“Tinan rua ba kotuk estudante nain rua husi Lore sira halo viagem mai eskola depois fila karreta baku fila sira tenki lakon sira nia vida, no mos komunidade barak afeita estrada ne’e rasik no labele lori produtu mai faan iha merkadu, susar atu asesu ba saude no feto tenke lakon nia vida tanba problema estrada”. Nia informa
Imajem : Ekipa Media Tour
Iha fatin hanesan, Prezidente AJTL Maria Zeovonia Vieira Fernandes apresia tebes ba servisu kolaborasaun ho Oxfam iha Timor Leste ne’ebe envolve assosiasaun jornalista Timor-Leste hodi halo advokasia konaba problema asunto Mudansa Klimatika no oinsa mak halo advokasia makaas liu tan ba justisa klimatika .
“Ami apresia tebes ba Oxfam, AJTL kontinua fo espasu ba nia membru sira hakerek barak liu kona ba lian kbit laek sira ne’ebe mak sente mudansa injustisa akontese ba sira liuliu mudansa klimatika ne’ebe fo impaktu ba to’os na’in, feto vuneravel no ema difisiensia sira no ferik katuas sira ne’ebe mak hetan impaktu bo’ot husi krize Mudansa Klimatika”. Prezidente AJTL Zeovania Vieira dehan
AJTL kontinua enkoraja membru sira hodi halo kobertura sira ne’ebe mai husi kbit laek sira, nune’e bele ajuda governu atu tau importansia ba problema mudansa klimatika no oinsa tau prioridade ba asuntu justisa klimátika.
“Nune’e, ema vulneravel sira sente iha impaktu Mudansa Klimatika bele sobrevivente no adapta, hadia estrada sira ne’ebe mak hetan estragus barak liu ba ema ne’ebe tesi ai arbiru”.
Lider jornalista ne’e ne’e afirma, AJTL kontinua servisu hamutuk ho Oxfam hodi promove no luta ba justisa klimatika katak justisa klimatika akontese tanba ema povu ki’ik sira hetan afeita bo’ot liu ba problema mudansa klimatika.
“Ohin loron Media Tour, AJTL ba dahuluk lansa liu projetu Oxfam apoiu husi Hongkong sei ba Munisipiu Lautem Postu Administrativu Lore, atu bele foti asuntu sira ne’ebe durante ne’e Jornalista sira seidauk halo kobertura ba problema asesu bee moos, estrada no asuntu sektor produtivu sira ne’ebe seidauk to’o ne’eba”. Nia dehan
Zeovania Vieira garante jornalista sira sei kolleta informasaun sira ne’ebe interesante hodi halo advokasia ba governu, nune’e ukun nain sira bele tau orsamentu no hatan ba preokupasaun kbit laek sira nina iha area remotas.
“AJTL fo espasu ida ne’e ba jornalista sira espera katak imi bele hetan informasaun interesante iha valor notisia no imi nia advokasia bele ajuda ita nia governu, atu bele tau politika no mos tau orsamentu ida hodi hadia tuir preokupasaun ne’ebe kbit laek sira durante ne’e eziji”. Nia hakotu
Enkuantu, programa media tour ne’e la’o durante loron tolu, hahú iha loron 29 to’o 31 Fulan Maiu. Agora daudaun ekipa media tour iha ona munisipiu Lautèm no sei fila hikas iha loron 01 Fulan Junhu.
Jornalista : Ermelinda Soares