DILI- Organizasaun Persaudaraan Setia Hati Terate (PSHT) fo gradusaun ba membru foun nain-8599 iha territóriu Timor-Leste, Prezidente PSHT Baltazar Lemos hateten membru sira ne’e tuir ona sira nia treinamentu, prontu ona sai membru ba organizasaun ne’e.
“Ohin loron ami fo gradusaun ba membru foun iha territóriu Timor-Leste hamutuk nain-8.599 tanba membru sira ne’e tuir treinamentu, prontu ona atu sai membru ba organizasaun PSHT, ami hala’o iha fatin haat Dili, Baucau, Manufahi no Bobonaro ne’ebe graduasaun ami sei hala’o iha loron rua nia laran iha kapital Díli halo iha loron 18-19 fulan agostu 2022, rejiaun sira sei halo iha loron 19-20 fulan agostu tinan ne’e”. Prezidente PSHT Baltazar Lemos iha nia diskursu iha Jinaziu Desportu Díli Caicoli, Kinta (18/08).
Prezidente ne’e fundamenta, Serimonia Graduasaun PSHT ida ne’e partisipa mos husi membru sira mai husi Sentral Madiun, Timor-Leste hamutuk nain-105 no sira agradese mos ba governu Timor-Leste reativa fila fali organizasaun PSHT hala’o aktividade iha Timor-Leste
“Ami superiodade sira mai husi sentral Madiun, Indonesia hamutuk nain-105 tanba ami hetan suportasaun husi embaixada Indonesia iha TL hamutuk ho governu TL husi SEJD, ami mos agradese ba primeiru ministru ho nia konsellu ministru no sekretariu estadu sira ne’ebe mak reativa fali organizasaun PSHT ne’ebe estabelese iha Timor-Leste hodi harii paz no estabilidade ba dezenvolvimentu nasional no tama ba kompetisaun internasional sira”, tenik prezidente
Iha biban hanesan, Prezidente PSHT Sentral Madiun, Indonesia Isbiantoro husu deskulpa karik durante ne’e membru sira halo sala iha Timor Leste.
“Ami husu deskulpa ba povu Timor-Leste karik durante ne’e ami nia membru PSHT sira halo sala ruma iha ne’e no PSHT sempre hanorin nia membru sira hodi sai ema ne’ebe diak tuir maromak nia hanorin, respeita inan aman no ema hotu hodi nune’e membru PSHT sira tenki harii paz no estabilidade iha Timor-Leste” tenik Isubiantoro
Prezidente ne’e husu membru foun sira tenki iha benefisiu ba família, komunidade no nasaun
“Ohin loron sai membru PSHT, ha’u husu tenki iha benefisiu ba família, komunidade no nasaun hodi tuir norma relijiaun ne’ebe maromak haraik mai ita hodi sai membru diak iha organizasaun no ohin ami superiodade husi PSHT mai husi sentral fo gradusaun ba membru PSHT foun hamutuk nain-8599 iha Timor-Leste ne’ebe ami entrega membru foun ba governu Timor-Leste”, Isubiantoro hateten
Jornalista : Augusto dos Santos
Editor : Ekipa Editorial